RUSİYA POLŞA SƏRHƏDLƏRİ YAXINLIĞINDA HƏDƏFİ YÜKSƏK DƏQİQLİKLƏ VURAN YENİ SİLAH SİSTEMLƏRİ YERLƏŞDİRƏ BİLƏR Bunu Rusiya Dövlət Dumasının müdafiə komitəsinin sədri, general-polkovnik Viktor Zavarixin deyib. Onun sözlərinə görə, bu addım Polşanın öz ərazisində Amerika Birləşmiş Ştatlarının hava hücumundan müdafiə sistemləri yerləşdirməsinə cavab olaraq həyata keçiriləcək. /İctimai TV/ ------------------------------------------------------------------ Dörd nəfər namizədliyini geri götürdü ALDP sədri MSK-ya 44818 imza təqdim edib Dünən Mərkəzi Seçki Komissiyasının (MSK) növbəti iclası keçirildi. İclasda əvvəlcə prezidentliyə namizədliyi özü tərəfindən irəli sürülmüş İntiqam Çərkəz oğlu Məmmədovun namizədliyinin təsdiq olunması məsələsinə baxıldı. MSK katibi Natiq Məmmədov bildirdi ki, İntiqam Məmmədov 1961-ci ildə anadan olub, ali təhsillidir. Sözügedən şəxsin sənədlərinin tam qaydasında olduğunu deyən N.Məmmədov onun namizədliyinin təsdiq olunması üçün heç bir problem olmadığını söylədi. Komissiya üzvləri yekdilliklə İ.Məmmədovun prezidentliyə namizədliyini təsdiq etdilər. Daha sonra prezidentliyə namizədliyi təsdiq olunmuş şəxslərin bəzilərinin müraciətləri əsasında onların namizədliyinə xitam verilməsi məsələsinə baxıldı. N.Məmmədov bildirdi ki, namizədliyi təsdiq olunmuş Teymur Pərviz oğlu Quliyev sentyabrın 3-də MSK-ya müraciət edərək namizədliyinə xitam verilməsini istəyib. Namizəd buna səbəb kimi Cənubi Qafqazda gedən proseslərin mürəkkəbliyini göstərib və qeyd edib ki, bu prosesləri görəndən sonra prezident olmağın nə qədər çətin olduğunu başa düşüb. Digər namizəd Fikrət Əhmədov isə imzatoplama kampaniyasını mütəşəkkil təşkil edə bilmədiyini səbəb göstərərək namizədlikdən imtina etdiyini bildirib. N.Məmmədovun sözlərinə görə, F.Əhmədov namizədliyin qeydə alınması üçün lazım olan 40 min imzanı toplaya bilməyib və xahiş edir ki, namizədliyinə xitam verilsin. MSK üzvləri isə bütün bunları nəzərə alaraq T.Quliyev və F.Əhmədovun namizədliyinə xitam verdilər. Fizika-riyaziyyat elmləri doktoru Qüdrət İsaqov prezidentliyə namizədliyini geri götürənlər sırasındadır. O, öz niyyətini dünən KİV-ə göndərdiyi məktubda açıqlayıb (APA). Qüdrət İsaqov bildirib ki, namizədliyini indiki prezident, YAP-ın namizədi İlham Əliyevin lehinə geri götürür. Yeri gəlmişkən, prezidentliyə namizədliyi yenicə təsdiq olunan İntiqam Məmmədov namizədlikdən imtina etdiyini açıqlayıb. O, buna səbəb kimi bir gün ərzində 40 min imzanı toplaya bilməyəcəyi ilə əlaqələndirib. İ.Məmmədov bu gün namizədliyinə xitam verilməsi ilə bağlı ərizə ilə MSK sədri Məzahir Pənahova müraciət edəcəyini bildirib. Daha sonra MSK nəzdində Mətbuat qrupunun yenidən təşkili məsələsinə baxıldı. Sözügedən qrupa MSK üzvləri Azər Tağıyev, Fuad Cavadov, Almas Qəhrəmanlı, MSK-nın mətbuat katibi Azər Sarıyev, AzTV, Lider, ANS televiziyaları, APA, Turan, Azərtac agentlikləri, "Azərbaycan", "Yeni Müsavat", "525-ci qəzet"in nümayəndələri təsdiq edildi. MSK üzvü Almas Qəhrəmanlı qrupdan namizədliyinin geri götürülməsini xahiş etsə də, komissiyanın sədri Məzahir Pənahov "Almas xanımın təklifi qəbul olunmur" deyərək məsələni səsə qoydu və Mətbuat qrupunun tərkibi yekdilliklə qəbul olundu. MSK sədrinin müavini Svetlana Qasımova isə sözügedən qrupa istənilən mətbuat nümayəndəsini qəbul etməyə hazır olduqlarını bəyan etdi: "Kim istəyir bizə müraciət etsin, biz də onu Mətbuat qrupuna daxil edək". Sonda komissiya üzvləri 55 saylı Xaçmaz, 38 saylı Gəncə (Nizami), 2 saylı Şərur, 52 saylı Quba, 95 saylı Tərtər və 70 saylı Masallı Dairə Seçki Komissiyalarının tərkibində dəyişikliklər etdilər. Qeyd edək ki, bu gündən etibarən prezident seçkilərinin birinci mərhələsi başa çatır. Bu müddət ərzində namizədliyi təsdiq olunmuş şəxslər imza vərəqələrini axşam saat 18.00-dək MSK-ya təhvil verməlidirlər. MSK-nın mətbuat şöbəsinin müdiri Azər Sarıyevin "Ekspress"ə verdiyi məlumata görə, dünən axşam saatlarına qədər digər namizədlər imza vərəqələrini quruma təqdim etməyiblər. Onun sözlərinə görə, bu günə kimi yalnız 5 namizədin - İlham Əliyev, İqbal Ağazadə, Fazil Qəzənfəroğlu, Hafiz Hacıyev və Qüdrət Həsənquliyevin imza vərəqələri MSK-ya təhvil verilib. Onlardan ikisinin - İ.Əliyev və İ.Ağazadənin namizədliyi qeydə alınıb, digər üç şəxsin məsələsinə isə bir neçə gün ərzində baxılacaq. Maraqlıdır ki, namizədliyi elə ilk gündən təsdiq olunan "sanitar" Sevinc Quliyevadan da bir xəbər yoxdur. Yeri gəlmişkən, Azərbaycan Liberal Demokrat Partiyasının (ALDP) sədri Fuad Əliyev prezidentliyə namizədliyinin təsdiqlənməsi üçün lazım olan imzaları dünən MSK-ya təqdim edib. F.Əliyevin sözlərinə görə, imzalar 69 dairədən yığılıb. Ymumilikdə, ALDP sədri MSK-ya 882 imza vərəqəsi dolduraraq, 44 min 818 imza təqdim edib. Aqil ASLAN express