ABŞ-ın VİTSE-PREZİDENTİNİN BAKI SƏFƏRİNIN NƏTİCƏSİ NƏ OLACAQ? Qabil Hüseynli: “O, Azərbaycanın təhlükəsizliyinə zəmanət verib getdi” ABŞ-ın vitse-prezidenti Dik Çeyni Bakıya rəsmi səfərini başa vuraraq Gürcüstana getdi. Gürcüstan və Ukraynadan fərqli olaraq Azərbaycanın müstəqilliyi dönəmində hələ indiyədək, ABŞ-dan bu ranqda dövlət məmuru ölkəmizə təşrif buyurmamışdı. Onun Azərbaycana gəlişinə münasibətlər müxtəlif olsa da, hamı etiraf edir ki, Çeyni dünya siyasi müstəvisində sıradan birisi deyil. O, təkcə siyasi fiqur yox, həm də enerji məsələlərinə bağlı bir şəxs kimi kifayət qədər ciddi simadır. Belə bir siyasətçinin regiona məhz indi gəlməsi Birləşmiş Ştatların Rusiyanın hərəkətlərinə nə dərəcədə ciddi yanaşmasının göstəricisidir. Politoloq Qabil Hüseynli bizimlə söhbətində Çeyninin səfəri ilə bağlı bir neçə maraqlı məqama toxundu. Qabil bəyin dediyinə görə, səfərin əsas məqsədi həm Azərbaycanın, həm də bütünlükdə Cənubi Qafqazın təhlükəsizliyi ilə bağlıdır: “Bildiyiniz kimi, NATO artıq Gürcüstanı hava hücumundan qorumaq üçün ciddi tədbirlərə əl atıb, bu ölkənin səmasının təhlükəsizliyi baxımından ən müasir qurğular quraşdırılır. Artıq Rusiya son müharibədə olduğu kimi Gürcüstanın hava sərhədlərini pozmaq qabiliyyətində olmayacaq. Bundan başqa ABŞ Gürcüstanın quru qoşunlarını da ən yüksək səviyyədə hazırlayacaq. Və Rusiyanın yenidən ”ildırımsürətli müharibə" aparacağı mümkün deyil. Qərbin Azərbaycanda marağı isə təbii ki, başadüşüləndir. Söhbət Qərbə axan enerjidaşıyıcılarından gedir. ABŞ çox gözəl bilir ki, Azərbaycan birmənalı şəkildə qərbpərəst mövqe tutmur. Necə deyərlər bir gözü həmişə Rusiyadadır. Azərbaycan tərəfi isə təbii ki, Gürcüstan hadisələrindən sonra Qərbdən təhlükəsizliyi ilə bağlı bir zəmanət istəyir". Bəs görəsən, Çeyni rəsmi Bakıya belə bir zəmanət verdimi? Politoloqun fikrincə, belə bir zəmanət verilib və Azərbaycan tərəfi təhlükəsizliyi ilə bağlı ciddi şəkildə təminat alıb. Ümid Partiyasının sədri, prezidentliyə namizəd İqbal Ağazadə isə bizimlə söhbətində bildirdi ki, Çeyninin səfəri əslində Cənubi Qafqazda baş verənlərə və bu arada Azrbaycanın tutduğu mövqeyə aydınlıq gətirməyə yönəlmişdi. “Hesab edirəm ki, Çeyninin bu səfəri strateji məqsədlərə yönəlik bir səfər idi. Və bu strategiyanın nəticəsini həm Azərbaycan, həm də Cənubi Qafqaz ölkələri özləri də tədricən yaxın vaxtlarda hiss edəcəklər”. Politoloq Hikmət Hacızadə isə mətbuata verdiyi açıqlamasında bildirib ki, ABŞ-ın vitse-prezidenti Dik Çeyninin Azərbaycana səfərindən sonra rəsmi Bakının xarici siyasətində hansısa dəyişiklikləri gözləmək olmaz. “İndi Gürcüstan olayları, Rusiyanın yeni siyasəti, onun təcavüzkarlığının artması və ona qarşı mümkün müdafiə üsulları müzakirə olunacaq. Mümkündür ki, NATO məsələsinə də toxunulsun. Amma strateji seçim məsələsi bir az arxa plandadır. Çeyninin səfəri Azərbaycanın bu hadisələrin fonunda hansı addımları atmasını müəyyənləşdirəcək”. H.Hacızadə hesab edir ki, Dik Çeyninin regiona səfəri qarşıdakı bir ayın və ya yarım ilin strategiyasını müəyyənləşdirmək üçündür. Politoloq Vəfa Quluzadə isə bildirib ki, Dik Çeyninin Azərbaycana gəlişi ya heç nə verməyəcək, ya da çox böyük əhəmiyyətə malik olacaq. “Hazırda Azərbaycan və Ukrayna işğal təhlükəsi qarşısındadır. Bunu ABŞ mənbələri özləri deyirlər. Ona görə də ABŞ Azərbaycan iqtidarını demokratiya basqıları ilə Rusiyaya meylləndirməkdə davam etdirməkdənsə, ona təhlükəsizlik təminatı verməlidir. Çünki bu məsələləri həll etmədən heç bir enerji təhlükəsizliyi barədə danışmağa dəyməz. Çeyni isə Corc Buşun əsas nümayəndəsidir. Corc Buş Çeyniyə öz səlahiyyətlərini verib göndərib bu regiona. Əgər Amerika artıq gücdən düşübsə, onda Dik Çeyninin bu səfərinin heç bir mənası olmayacaq. Yox əgər Birləşmiş Ştatlar öz müttəfiqlərinin arxasında dayana bilirsə, bu artıq başqa məsələdir”. Səbuhi MƏMMƏDLİ musavat