RUSİYA UKRAYNADA SİYASİ BÖHRAN YARATDI Baş nazir Yuliya Timoşenko moskvameylli qüvvələrlə birləşərək prezidenti yıxmağa çalışır Ukraynada baş nazir Yuliya Timoşenkonun başçılıq etdiyi eyniadlı blokun moskvameylli Regionlar Partiyası və kommunistlərlə birləşərək prezidentə qarşı impiçment prosedurunu sadələşdirən qanun layihəsini qəbul etməsindən sonra yaranmış siyasi gərginlik davam edir. Xəbər verildiyi kimi, baş nazirin bu addımından sonra prezidentə sadiq “Bizim Ukrayna” bloku hakim koalisiyanın tərkibindən çıxdığını və müxalifətə keçdiyini elan edib. Bununla da bir il əvvəl qurumuş “narıncı koalisiya” dağılıb. Ukrayna Prezidenti Viktor Yuşşenko bu hadisəni qiymətləndirərək bəyan edib ki, ölkədə antikonstitusional çevriliş başlayıb. O, parlamentin 3 böyük fraksiyasını çevriliş hazırlamaq cəhdində ittiham edib. Prezident bildirib ki, hakim koalisiya dağıldığına görə, hökumət istefa verməli və parlament çoxluğundan ibarət yeni koalisiya qurulmalıdır. Əks halda Yuşşenko parlamenti buraxacağı ilə hədələyib. “30 gün ərzində yeni koalisiya yaranmazsa, mən parlamenti buraxmaq və növbədənkənar seçkilər çağırmaq hüququmdan istifadə edəcəyəm,” - deyə Yuşşenko televiziya ilə çıxışında bildirib. Timoşenko isə öz rəqibini xaos yaratmaqda ittiham edib və deyib ki, koalisiyanın dağılmasına baxmayaraq, Ukrayna kabineti öz işinə davam edəcək. “Mən təəssüf edirəm ki, Prezident məsuiliyyətsiz hərəkət edir” - Yuliya Timoşenko kabinetin iclasında deyib. O, əlavə edib ki, koalisiya məhz Prezidentin göstərişlərinə əsasən dağılıb. Qeyd edək ki, Ukraynada baş nazir və prezident arasında ziddiyyətlər Gürcüstan hadisələri zamanı daha qabarıq şəkildə üzə çıxmağa başladı. Belə ki, Yuşşenko birmənalı şəkildə Gürcüstanı dəstəkləsə də, Timoşenko baş verənlərə münasibət bildirməyib müəmmalı sükut nümayiş etdirdi. Daha sonra prezident administrasiyası bəyan etdi ki, baş nazirin Rusiya ilə işbirliyinə getməsi haqda məlumat var və xüsusi xidmət orqanları bu məlumatları araşdırır. Bildirilirdi ki, Rusiya 2010-cu il prezident seçkilərində Timoşenkonu dəstəkləmək haqqında qərar qəbul edib, baş nazir isə öz növbəsində Rusiyaya müəyyən vədlər verib. Maraqlıdır ki, Timoşenkonun partiyası bir gün əvvəl parlamentin Moskvanı ittiham edən qətnaməsinin əleyhinə də səs verib. Bu gərginlik ABŞ-ın vitse-prezidenti Dik Çeyninin Ukraynaya planlaşdırılan səfərindən bir gün öncə baş verir. Müşahidəçilər şübhə etmir ki, Ukraynada bu dəfə əvvəl birmənalı şəkildə Qərbyönümlü mövqe tutan baş nazirin əliylə siyasi böhranı Moskva təşkil edib. Bu, prezidentin Gürcüstan hadisələrinə dair tutduğu mövqeyə cavabdır. Dünən Regionlar Partiyası prezident Yuşşenkonun təyin etdiyi qərbmeylli xarici işlər naziri Vladimir Oqrızkonun istefası məsələsini qaldırıb. Bir daha aydın olub ki, proseslər Moskvadan idarə olunur. Ukraynada 2010-cu ildə prezident seçkiləri keçiriləcək. Bu seçkilərdə Yuşşenko yenidən namizədliyini irəli sürmək istəyir. Baş nazir Timoşenko indiyədək prezident seçkilərinə qatılacağını təsdiqləməsə də, onun belə niyyəti şübhə doğurmur. Hazırda Yuşşenkonun reytinqi aşağıdır, Timoşenko isə Rusya ilə gizli sövdələşməyə gedərək iki il sonra hakimiyyəti ələ almağı və onu keçmiş baş nazir Viktor Yanukoviçlə bölməyi planlaşdırır. Siyasət şöbəsi musavat