İLHAM ƏLİYEV DİK ÇEYNİ İLƏ GÖRÜŞDƏ BİLDİRİB Kİ, QARABAĞ MÜNAQİŞƏSİNİN DƏ HƏLLİ BEYNƏLXALQ NORMALARA ƏSASLANMALIDIR Azərbaycanda səfərdə olan ABŞ-ın vitse-prezidenti Dik Çeyni ilə sentyabrın 3-də keçirdiyi görüşün media nümayəndələrinin iştirakı ilə keçən hissəsində Azərbaycan prezidenti İlham Əliyev Çeyninin səfərinə böyük əhəmiyyət verdiyini vurğulayıb. Azərbaycan prezidenti deyib ki, görüşdə ikitərəfləri münasibətlər və regional vəziyyət barədə fikir mübadiləsi aparmaq üçün yaxşı imkan oldu: «Bir daha bildirdik ki, ikitərəfli əlaqələrimiz uğurla inkişaf edir və bir çox yeni sahələri əhatə edir. Münasibətlərimizin artıq uzun tarixi var. Əlaqələrimiz, əsasən, enerji məsələlərindən başlanıb. Regionda həyata keçirdiyimiz enerji layihələri Amerika Birləşmiş Ştatlarının güclü dəstəyi və Azərbaycanın təşəbbüsü ilə başlayıb. Bütün bu layihələr artıq reallaşıb. Bunlar, sözün əsl mənasında, uğurlu hadisələrdir. Hazırda biz energetika sahəsində tərəfdaşlığın və enerji təchizatının şaxələndirilməsinin daha da inkişaf etdirilməsi üzərində çalışırıq. Bu, təkcə istehlakçılar üçün deyil, həmçinin Azərbaycan istehsalçıları üçün vacibdir. Bundan sonra ölkələrimiz arasında münasibətlər digər müxtəlif sahələrdə də inkişaf etməyə başladı və hazırda əlaqələrimiz çox geniş formatı əhatə edir. Siyasi əlaqələrimiz uğurla inkişaf edir. Güclü iqtisadi münasibətlərimiz var. Təhlükəsizlik, müdafiə sahəsində əlaqələrimiz, beynəlxalq sülhməramlı əməliyyatlar sahəsində əməkdaşlığımız və sözsüz ki, Ermənistan-Azərbaycan, Dağlıq Qarabağ münaqişəsinin nizamlanması məsələsi bizim üçün çox əhəmiyyətlidir». Azərbaycan prezidenti qeyd edib ki, Minsk qrupunun həmsədrlərindən biri kimi ABŞ hər iki tərəfin münaqişənin həlli yollarını tapması işinə kömək göstərilməsində vacib rol oynayır: «Lakin əlbəttə ki, digər münaqişələr kimi, bu münaqişənin həlli də beynəlxalq hüquq normalarına əsaslanmalıdır. Azərbaycanın, regionun və dünyanın bütün ölkələrinin ərazi bütövlüyünə hörmət edilməsi şərti ilə». Daha sonra dövlət başçısı bildirib ki, D.Çeyni ilə görüşdə regional vəziyyət də müzakirə olunub: «Bildiyiniz kimi, Azərbaycan böyük regional əhəmiyyət daşıyan, hətta ola bilsin, daha geniş məkanı əhatə edən bir sıra layihələrin təşəbbüskarıdır. Bütün bu layihələrin həyata keçirilməsində Azərbaycanla Amerika Birləşmiş Ştatları arasında münasibətlər çox mühüm, hətta mən deyərdim, həlledici rol oynayır. Bu günə qədər əməkdaşlığımız uğurla gedir və planlaşdırdığımız işləri həyata keçirə bilmişik. Əminəm ki, Birləşmiş Ştatlarla Azərbaycan arasında, eləcə də digər regional ölkələrlə güclü tərəfdaşlıq gələcəkdə daha çox müvəffəqiyyətlərin əldə olunması, təhlükəsizlik tədbirlərinin, sülhün, sabitliyin və rifahın daim möhkəmləndirilməsi ilə nəticələnəcək». D.Çeyni Bakıya sentyabrın 3-də gəlib. İ.Əliyevlə görüşməzdən qabaq o, günün birinci yarısında ABŞ səfirliyinin əməkdaşları, «BP» və «Chevron» neft şirkətlərinin rəhbərləri ilə görüşüb. Çeyni Azərbaycandan Gürcüstana, ordan isə Ukrayna ilə İtaliyaya gedəcək. «Media forum»