Buş Gülün Yerevan səfərinə xeyir-dua verdi Daşnaklar isə Türkiyə prezidentini hava limanında "qarşılamaq" istəyirlər Türkiyə prezidenti Abdulla Gülün Ermənistana səfəri beynəlxalq arenada müzakirə olunan ən əhəmiyyətli məsələlər sırasına çıxıb desək, yanılmarıq. Hətta bu məsələ aktuallığına görə Rusiya-Gürcüstan müharibəsini də geridə qoyub. Dünən bu məsələ Birləşmiş Ştatlar prezidenti Corc Buşun Türkiyə prezidenti ilə telefon danışığında da müzakirə olunub. Çox güman ki, Buş Gülü Yerevana getmək üçün dilə tutub. "CNN turk"in yaydığı məlumata görə, prezidentlərin telefon danışığında Türkiyə və Ermənistan prezidentlərinin erməni-türk münasibətlərinin irəliyə doğru getməsi üçün verdikləri dəstək müzakirə olunub. Buş administrasiyasının nümayəndəsi Qordon Condro bildirib ki, prezidentlərin telefon danışığı zamanı Rusiya ilə Gürcüstan arasında münaqişə də müzakirə olunub. A.Gül AB-nin vasitəçiliyi ilə əldə olunan 6 maddəlik atəşkəs anlaşmasının tam şəkildə həyata keçirilməsini zəruri sayıb. Türkiyə prezidenti onların təşəbbüsü ilə ortaya atılan "Qafqazda sülh və əməkdaşlıq platforması" ilə bağlı amerikalı həmkarına məlumat verib. Ümumiyyətlə, Abdulla Gülün Yerevana səfərinin vaxtı yaxınlaşdıqca mövzu ətrafında ən müxtəlif məlumatlar yayılmaqdadır. Bəlli olan odur ki, ermənilərin böyük bir qismi Türkiyə prezidentinin səfərinə razı deyil. Məsələn, Ermənistanın İnqilab Federasiyası "Daşnaksütyun" Türkiyə prezidenti Abdulla Gülün Yerevana səfəri ilə bağlı aksiya keçirməyə hazırlaşır. Məlumatı yurnalistlərə Ermənistan parlamentinin vitse-spikeri, "Daşnaksütyun"un idarə heyətinin üzvü Qrayr Karapetyan verib. Onun sözlərinə görə, etiraz aksiyası Türkiyə prezidentinin təyyarəsinin enəcəyi hava limanından başlayacaq. Vitse-spiker xəbərdarlıq edib ki, aksiyanın gedişində təxribatlar da baş verə bilər və "Daşnaksütyun" tərəfdarlarını bunlara uymamağa çağırıb. Daşnaklardan fərqli olaraq Ermənistanın keçmiş prezidenti Levon Ter-Petrosyan Türkiyə prezidentinin Yerevana gələcəyi təqdirdə onu alqışlayacaqlarını bildirib. Eks-prezident futbol oyununun "iki dövlət arasındakı buzları əritmək üçün çox gözəl fürsət olduğunu" bəyan edib. Ter-Petrosyan qonşu Türkiyənin heç bir dövlət rəhbərinin indiyə kimi Ermənistana səfər etməməsindən heyrətləndiyini bildirib: "Mən prezident olan zaman müxtəlif səbəblərlə Türkiyəni dəfələrlə ziyarət etmişəm". Türkiyənin İqdır bölgəsində fəaliyyət göstərən 10 qeyri-hökumət təşkilatı, həmçinin Cümhuriyyət Xalq və Milliyyətçi Hərəkat Partiyalarının yerli ofisləri prezident Abdulla Gülün Ermənistana gözlənilən səfəri ilə bağlı bəyanat yayıb. Bəyanatda Türkiyə prezidenti Ermənistana getməməyə çağırılır və bildirilir ki, Gülün səfəri azərbaycanlıları ürəkdən yaralayacaq: "Ermənistanın Azərbaycan torpaqlarını işğal etdiyini niyə kimsə görmək istəmir? Biz dünyaya səslənirik: 85 il əvvəl olanları gündəmə daşıyıb, bununla məşğul olmaq cəsarəti tapanlar ermənilərin yaxın tariximizdə Qarabağda törətdikləri vəhşilikləri niyə görmürlər? Ermənilərin 1992-ci ildə Xocalıda törətdikləri soyqırımın başqa bir adı varmı? Unutmayaq ki, Türkiyə ilə Ermənistan arasındakı əlaqələrin normallaşmasında ən böyük əngəl türk düşmənliyi üzərində qurulan erməni siyasətidir. Bütün bunları nəzərə alaraq, prezident Gülü Yerevana getməməyə çağırırıq". Yerevanda səfərdə olan Türkiyə prezidentinin xüsusi nümayəndəsi, Türkiyənin Azərbaycandakı keçmiş səfiri Ünal Çeviköz Ermənistanın xarici işlər naziri Edvard Nalbandyanla görüşüb. Görüşdə Abdulla Gülün Ermənistana səfərinin təfərrüatları müzakirə edilib. Bu barədə "Novosti-Armeniya" agentliyi məlumat yayıb. Görüş zamanı, həmçinin Türkiyənin regionda stabillik və təhlükəsizlik yaranması üçün "Qafqaz ittifaqı" barədə təşəbbüsü də müzakirə edilib. E.Nalbandyan qeyd edib ki, Ermənistan həmişə regionda inam, stabillik və əməkdaşlıq üçün edilən səyləri müsbət qarşılayıb. Onun sözlərinə görə, bu ittifaqın yaranmasını da alqışlamaq olar. Məsələ ondadır ki, Türkiyə mətbuatı Gülünün səfərin baş tutmasının məhz Ünal Çeviközün missiyasından asılı olduğunu yazır. Ermənistan prezidenti Sery Sarkisyan isə mətbuata verdiyi açıqlamada bildirib ki, iki ölkə arasında münasibətlərin normallaşdırılması üçün hər hansı ön şərt irəli sürmək gərək deyil: "Biz bu məsələdə heç bir ön şərt qoymuruq". O, həmçinin qondarma soyqırımı məsələsinə də toxunub: "Yer üzündə soyqırımın olduğuna inanmayan bir erməni belə yoxdur. Ancaq biz heç vaxt soyqırımın tanınmasını münasibətlərimizi qaydaya salmağın şərti kimi irəli sürməmişik". Onun sözlərinə görə, türkiyəli həmkarı ilə görüşünü mənasız saymır: "Məncə, biz elə bir mərhələyə gəlmişik ki, qərar verməliyik. Qərarın asan başa gəlməyəcəyi aydındır. Ona da şübhəm yoxdur ki, qərarı heç də bütün ermənilər və türklər alqışlamayacaq. Ancaq bizim cəmiyyətlərin müsbət qərarları çoxluqla qəbul edəcəyinə inanıram. Bizim tarixən çətin münasibətlərimiz olub, ancaq biz qonşuyuq. Ermənistan heç bir ön şərt qoymadan münasibətləri yoluna qoymağa hazırdır. Türkiyə rəhbərliyindən də bunu gözləyirik". Azər kaspi