Cavab oyunu Sery Sarkisyan Türkiyə-Ermənistan matçını seyr etmək üçün İstanbula dəvət ediləcək Türkiyə prezidenti Abdulla Gülün Ermənistana səfəri realaşmaq üzrədir. Artıq dünən Türkiyənin "NTV" telekanalı belə bir məlumat yayıb ki, Abdulla Gülün sentyabrın 6-na planlaşdırılan Ermənistan səfərini hazırlamaq üçün Türkiyə nümayəndə heyəti bu gün Yerevana yola düşəcək. Heyətə Xarici İşlər Nazirliyinin müşavirinin müavini, Türkiyənin Azərbaycandakı keçmiş səfiri Ünal Çeviköz başçılıq edir. Ermənistan prezidenti Sery Sarkisyan tərəfindən qəbul ediləcək Çeviköz prezident Gülün mesayını ona çatdıracaq və Qafqazdakı gərginliyin aradan qaldırılması üçün yaxşı fürsət yarandığını bildirəcək. Ən yüksək səviyyədə qəbul ediləcək Çeviköz görüş zamanı Ermənistan prezidenti Sery Sarkisyanı Türkiyə-Ermənistan matçının revanş oyunu zamanı Türkiyədə görmək istədiklərini də vurğulayacaq. Türkiyənin "NTV" televiziyası, həmçinin belə bir məlumat yayıb ki, Gülün səfərinin baş tutması Çeviközün missiyasının necə başa çatmasından asılı olacaq. Bir faktı da qeyd edək ki, keçmiş səfir bundan əvvəl iki ölkə arasında keçirilən görüşlərdə də ölkəsini təmsil edib. Maraqlıdır ki, Gülün səfərinə hazırlıq tam sürətlə davam etsə də, Türkiyə rəsmiləri hələ də faktı inkar edirlər. Məsələn, prezident Abdulla Gül paraolimpiyaçıların qəbulu zamanı Yerevana gedib-getməyəcəyi ilə bağlı sualı "hələ qərar verməmişik" deyə cavablandırıb. Xarici işlər naziri Əli Babacan da Gülün Yerevana səfəri ilə bağlı qəti qərar qəbul edilmədiyini bəyan edib. Türkiyə prezidenti Abdulla Gülün Ermənistana səfəri ölkədəki müxalifət partiyalarının narazılığına səbəb olub. Məsələn, müxalifətdə olan Milliyyətçi Hərəkat Partiyasının lideri Dövlət Bağçalı bildirib ki, prezidentin futbol bəhanəsi ilə Ermənistana səfər etməsi əslində iki ölkənin münasibətlərini inkişaf etdirmək məqsədi güdür. Bu davranış isə Türkiyənin qürurunu və heysiyyətini zədələyəcək. D.Bağçalı Ermənistanın Türkiyəyə qarşı düşmən siyasəti yürütdüyünü deyib, bu siyasətdə heç bir dəyişiklik olmadığını vurğulayıb: "Ermənistan Türkiyənin ərazi bütövlüyünü tanımır, Konstitusiyasında Türkiyədən torpaq tələbindən əl çəkməyib. Prezident Türkiyə Cümhuriyyətini təmsil edir, onun bu şərtlərlə Ermənistana getməsi milli mənafe ilə üst-üstə düşmür. Bundan başqa, Ermənistan PKK terror təşkilatına da dəstək verir, Azərbaycan torpaqlarının təxminən 1/4-nü işğal altında saxlayır. Bunlar reallıqdır. Türkiyənin Ermənistanın arxasından getməsinin, əlaqələri düzəltmək istəməsinin heç bir bəraəti yoxdur". Ana müxalifət Cümhuriyyət Xalq Partiyası da AKP iqtidarını buna görə kəskin tənqid edib. Partiyanın lideri Dəniz Baykal milli oyuna baxmaq bəhanəsiylə Yerevana gedəcək prezidenti bu səfərdən çəkinməyə çağırıb. "Türkiyənin beynəlxalq aləmdə qəbul edilmiş sərhədlərini qəbul etməyən Ermənistanın qondarma soyqırımı və Dağlıq Qarabağ məsələsində tutduğu mövqedə bir dəyişiklik yoxdur. Hökumətin Azərbaycana zərər verə biləcək hər bir hərəkətdən uzaq durmasını diləyirəm. Mən Yerevana futbol oyununa getmək əvəzinə Bakıya oyuna baxmağa getməyi təklif edərdim" - deyib. Türkiyə mətbuatı isə belə bir məlumat yayıb ki, Ankara bu səfər üçün Yerevana beş şərt irəli sürüb. "Akşam" qəzetinin yazdığına görə, həmin şərtlər əsasən səfər zamanı hər hansı etiraz aksiyalarının olmaması, təhlükəsizliyin təmin edilməsi ilə bağlıdır. Türkiyədə hesab edirlər ki, səfərin təhlükəsizlik tərəfi son dərəcə önəmli olduğundan Gülün Ermənistana gedib-getməyəcəyi son ana qədər elan edilməyəcək. O da bəlli olub ki, Türkiyənin Hakim Ədalət və İnkişaf Partiyasından 30 millət vəkili öz partiyasına müraciət edərək bu oyunu izləmək üçün Ermənistana getmələrinə icazə verilməsini istəyiblər. Lakin hakim partiyanın qrup toplantısında millət vəkillərinin Ermənistan-Türkiyə oyununu izləmək üçün Ermənistana getməmələri qərara alınıb. Ermənistan paytaxtında iki ölkə prezidentlərinin təkbətək görüşünün keçirilə biləcəyi mümkünlüyü də istisna edilmir. Ermənistanın xarici işlər naziri Edvard Nalbandyanın fikrincə, bu görüş futbol oyunun gedişində, oyundan əvvəl və ya sonra keçirilə bilər. "Türkiyə prezidenti Abdulla Gül Yerevana səfər etsə, futbol oyunun gedişində, oyundan əvvəl və ya sonra Ermənistan və Türkiyə prezidentləri arasında görüş keçiriləcək. Görüşdə prezidentlər beynəlxalq, regional və ikitərəfli məsələləri müzakirə edə bilər" - deyə nazir Yerevan Dövlət Universitetində keçirdiyi görüşdə bildirib. Erməni nazir Ermənistanın xarici siyasət prioritetlərini də açıqlayıb. O məlumat verib ki, sentyabrın 3-də Ermənistanın xaricdəki səfirləri və daimi nümayəndələrinin toplantısının keçirilməsi ilə bağlı paytaxta gələcəklər. Bu arada bəlli olub ki, türkiyəli azarkeşlər də oyunu izləməyəcək. Bunu Ermənistan Futbol Federasiyasının prezidenti Ruben Ayrapetyan bildirib. Onun sözlərinə görə, Ermənistan yığması ilə oyuna Türkiyə tərəfindən 130 nəfərdən ibarət heyət gələcək: "Türkiyə Futbol Federasiyası öz azarkeşləri üçün bilet sifariş etməyib". Xatırladaq ki, Ermənistan-Türkiyə oyunu sentyabrın 6-da Yerevandakı "Razdan" stadionunda keçiriləcək. Azər NURİYEV kaspi