"Ermənilər Türkiyə və Azərbaycana qarşı düşmən münasibətlərini dəyişməyiblər" Yeganə Mehdibəyli: "Əminəm ki, Türkiyənin indiki hökuməti atdığı addımlara görə böyük qınaqla üz-üzə qalacaq" Baş nazir Rəcəb Tayyib Ərdoğan səfərə xeyir-duasını versə də, xarici işlər naziri Ali Babacan turnenin baş tutacağını söyləsə də, prezident Abdulla Gül hələ də sentyabrın 6-da futbol oyununa baxmaq üçün İrəvana getməsinə qəti qərar vermədiyini söyləyir. Türkiyədə və Azərbaycanda siyasi qüvvələrin, ictimaiyyətin sərt təpkisi davam edir. Türkiyədə ana müxalifət partiyasının - CHP-nin sədri Dəniz Baykal AKP hökumətini "Azərbaycana zərər verəcək hər hərəkətdən uzaq durmağa" çağırıb. MHP lideri Dövlət Baxçalı da yazılı açıqlama yayaraq sərt bir dildə Abdulla Gülün İrəvana mümkün səfərini qınayıb, onu belə addım atmamağa çağırıb. BAXCP sədri Qüdrət Həsənquliyev də Abdulla Gülün İrəvana səfərini birmənalı pisləyir. Ramiz Mikayıloğlu Millət vəkilinin sözlərinə görə, ola bilsin ki, Ankara Bakının razılığını alıb: "Amma hər halda Türkiyə belə bir təkliflə çıxış etməməliydi. Əvvala, ermənilər Türkiyəni "soyqırım" kimi bəşəri cinayətdə ittiham edirlər. Bunun müqabilində də birgə futbola baxmağa çağırırlar. Bu, dost ölkəyə yaraşmayan hərəkətdir. Məncə, Türkiyə ictimaiyyəti növbəti seçkilərdə buna münasibət bildirəcək. Əminəm ki, Türkiyənin indiki hakimiyyəti atdığı addımlara görə böyük qınaqla üz-üzə qalacaq". Qarabağ Azadlıq Təşkilatının sədri Akif Nağı da Türkiyə prezidentinə məktub yazıb və onun bu səfərinin Azərbaycanın milli maraqlarına ciddi zərbə vuracağını bildirib. Ermənilər isə öz riyakarlıqlarından qalmırlar. Dünəndən Milli Akademiyanın Erməni Genosidi Muzeyində "1915-ci ilə qədər Osmanlı imperiyasında erməni idman kulubları və futbol komandaları" adlanan sərgi açılıb. Sərgi sentyabırn 15-dək davam edəcək. Qeyd edək ki, Türkiyə 1993-cü ildən Ermənistanla diplomatik əlaqələri kəsib, sərhədləri bağlayıb. Səbəb kimi Ermənistanın Türkiyəyə qarşı ərazi və "soyqırım" iddiaları, Azərbaycan torpaqlrının işğalı göstərilib. AKP dövründə bu ölkəylə hava sərhədləri açılıb, Ermənistan vətəndaşları işləmək üçün Türkiyəyə gedə bilirlər. İndi isə İrəvanın əsas məqsədi quru sərhədlərinin açılmasına nail olmaqdır. Çünki Gürcüstan və İran yolları həm təbii baxımdan əlverişsizdir, dağlardan keçir, həm də regiondakı durum bu yolların da işləkliyini təhlükə altında qoyur. Məsələn, İran Qərbin ciddi iqtisadi sanksiyalarıyla üzləşib, hər an ABŞ və İsrail tərəfindən bombalanması mümkündür. Yüklərin 70 faizinin daşındığı Gürcüstanla Ermənistanın ən yaxın müttəfiqi Rusiya arasında isə vəziyyət son dövrlər gərginləşib. Rus qırıcılarının Gümrüdəki hərbi bazadan qalxaraq Gürcüstanı bombalaması da Tiflisi ciddi narazı salıb. Düzdür, hazırda rus əsgərləri Ermənistana gedən yükləri buraxır, gürcülər də yüklərin daşınmasına problem yaratmırlar. Amma vəziyyətin uzun müddət belə davam edəcəyi ağlabatan görünmür. Tiflisin Moskvayla diplomatik əlaqələri kəsməyə qərar verməsi gec-tez Ermənistana yükdaşımalara da ciddi təsirini göstərəcək. Məhz belə bir durumda Türkiyə prezidentinin İrəvana getmək istəməsi, AKP hökumətinin ciddi-cəhdlə bunun reallaşmasına çalışması narahatlıq doğurmaya bilməz. Çünki bu, sıradan səfər olmayacaq. Diplomatik əlaqələrin bərpası anlamına gələcək. Sonrakı mərhələdə isə sərhədlərin açılması gündəmə çıxacaq. Ermənistanın Türkiyəyə qarşı ərazi "soyqırım" iddialarından, Azərbaycanın torpaqlarını işğal siyasətini davam etdirməkdən əl çəkmədiyi halda sərhədlərin açılmasının nəyə gətirib çıxaracağını da proqnozlaşdırmaq çətin deyil. Blokada təhlükəsindən qurtulan Ermənistanın iddiaları daha da artacaq. Yeri gəlmişkən, Qərbdə, o cümlədən Türkiyədə belə fikirlərə də rast gəlinir ki, guya iqtisadi əlaqələr Ermənistanın aqressivliyini zəiflədəcək və İrəvan iddialarından zaman-zaman geri çəkiləcək. Ancaq yaxın keçmişin təcrübəsi bu iddiaların əsassızlığını sübutlayır. Məsələn, bir zaman Bakı-Tiflis-Ceyhan neft, Bakı-Tiflis-Ərzurum qaz kimi strateji kəmərlərin Ermənistan ərazisindən keçməsi gündəmdə olub. Lakin işğalçı ölkə bunların müqabilində belə Azərbaycan torpaqlarının işğalından əl çəkməklə razılaşmayıb. O da bəllidir ki, AKP-nin hakimiyyətə gəldiyi gündən Azərbaycanda və Türkiyədə bu siyasi qüvvənin Qərbin tövsiyələriylə Ermənistanla quru sərhədləri açacağı ilə bağlı həmişə narahatlıq olub, müxtəlif vaxtlarda bəyanatlar səslənib. İndi də ən acınacaqlısı odur ki, məhz Türkiyənin baş naziri Rəcəb Tayyib Ərdoğan Rusiyanın Gürcüstana hərbi müdaxilə etdiyi bir dövrdə Qafqaz Sabitlik və Əməkdaşlıq Platforması ideyasını gündəmə gətirib. Bu da İrəvanın diplomatik əlaqələrin bərpası, sərhədlərin açılması yönündə ümidlərini artırıb. Məsələylə bağlı fikirlərini öyrəndiyimiz BAXCP-nin Mərkəzi Nəzarət Təftiş Komissiyasının (MNTK) sədri Yeganə Mehdibəyli da Abdulla Gülün səfərini pisləyir və yanlış addım sayır. Onun sözlərinə görə, ermənilər ötən dövr ərzində Türkiyə və Azərbaycana düşmən münasibətlərini dəyişməyiblər və iddialarını davam etdirirlər. Digər tərəfdən, ABŞ, Avropa Birliyi, o cümlədən Azərbaycanı istməyən qüvvələr daim Ankaranın Ermənistanla sərhədləri açmasını gündəmə gətiriblər. AKP hökumətinin son addımlarında da bu "tövsiyyələr" önəmli rol oynayır. Yeganə Mehdibəyli də hesab edir ki, sərhədlərin açılması, iqtisadi əlaqələrin qurulmasından sonra ermənilərin iddialarından geri çəkiləcəklərini düşünmək sadəlövlükdür. Məsələ həm də ondadır ki, Ermənistan müstəqil dövlət deyil, regionda Rusiyanın forpostu rolunu oynayır. Moskvanın isə regionla bağlı maraqlarının Azərbaycan və Türkiyənin mənafeyinə zidd olduğu bəllidir. O, az əvvəl baş verən bir olayı da xatırlatdı. Söhbət Türkiyə və Ermənistanın gənclərdən ibarət milli komandaları İrəvanda qarşılaşarkən ermənilərin Türkiyənin İstiqlal Marşını fitə basmasından gedir: "Erməni xarakteri, xisləti dəyişməzdir və Abdulla Gülün də belə biabırçı olayla rastlaşacağı istisna sayılmamalıdır. Türkiyə dövləti üçün bu, qürurunu təhlükə altına qoymaq anlamını verir". Yeganə Mehdibəyli Gülün səfərinin Türkiyə və Azərbaycan üçün heç bir müsbət nəticə verməyəcəyinə əmindir: "Yaxşı olardı ki, Ankara Azərbaycan torpaqlarının işğaldan azad edilməsi, qaçqınlarımızın torpaqlarına qayıtmasıyla bağlı neytarl bir ərazidə Ermənistan rəhbərliyilə görüşə üstünlük verəydi. Çox təəssüf ki, arxasında siyasət, həm də bizim arzulamadığımız siyasət duran futbol oyunu bir bəhanə olub. Təssüf ki, yuxarıda da dediyim kimi, ABŞ-ın, Avropa Birliyinin, erməni lobbisinin təzyiqləri altında Abdulla Gül İrəvana futbol oyununa baxmağa gedir. Abdulla Gülün İrəvana futbol oyununa baxmağa getməsi Türkiyəyə şərəf gətirən bir hərəkət deyil, yəqin ki, bu gedişlə Türkiyə-Ermənistan sərhədləri də açılar". xalqcebhesi