Daniel Fridin Qərbə xəbərdarlığı "Onun bəyanatı Rusiya ilə mübarizədə Qərb dövlətlərinin potensiallarının səfərbərliyə alınmasına bir çağırışdır" ABŞ dövlət katibinin Avropa və Avrasiya məsələləri üzrə müavini Daniel Frid Gürcüstanla yanaşı, Azərbaycan və Ukraynanın da daha böyük təhlükə altında olduğunu bildirib. O söyləyib ki, bu səbəbdən də vitse-prezident Dik Çeyninin bu həftə regiona gerçəkləşəcək səfəri böyük əhəmiyyətə malikdir: "Cənab Çeyni daha böyük təhlükə altında olan üç ölkəyə-Gürcüstan, Azərbaycan və Ukraynaya səfər edəcək". Politoloq Leyla Əliyeva son vaxtlar Qafqazda baş verən proseslərin ürəkaçan olmadığını və bu müharibə alovunun geniş miqyas alması üçün "kiçik bəhanələrin" axtarıldığını bildirdi. Ekspert Daniel Fridin çağırışlarının həyəcan təbili olduğunu düşünür: "Hər üç ölkə Qərbpərəst siyasətlə tanınıblar. Tural Məhz bu səbəbdən də sözügedən dövlətlər ABŞ-a daha yaxın olan bir qurumda-GUAM-da birləşdilər. Bu qurumda üç ölkənin strateji mövqeləri daha da yaxınlaşıb. Vaşinqtonda da məhz bu məsələləri nəzərdə tutublar. Gürcüstan bu zəncirdə-GUAM-da, ancaq bir hissədir. Moskvanın ilginc proseslərin Azərbaycandan yan keçəcəyini bəyanlamasına baxmayaraq, zəncirin hücuma məruz qalan növbəti həlqəsi Bakı ola bilər. Kremlin Gürcüstana təcavüzü həm də digər Qərbə meyl edən ölkələrə güc göstərmək idi. Daniel Frid də bu kimi amilləri nəzərə alaraq belə bəyanat verib ki, Moskva digər iki dövlətin bu müharibədən dərs götürməyəcəyi halda, yeni təhlükələr yaratmasına çalışacaq". Politoloqun fikrincə, bu gün şimal qonşumuz açıq şəkildə bəyanlayır ki, Mixail Saakaşvilini cəzalandırmağın bir səbəbi var ki, bu da Kremlin regionda mövqeyinin saxlanmasıdır. Yəni dondurulmuş münaqişələrin həll olunmaması Moskvanın regiona nəzarətinin saxlanması deməkdir. Amma Gürcüstan prezidenti bu status-kvonu dəyişmək istədi və Rusiyanın işğalı ilə üzləşdi. Ona görə də ABŞ hiss etdi ki, Gürcüstanla yanaşı, artıq Ukrayna və Azərbaycana da dəstək verməyin vaxtıdır: "Daniel Fridin xəbərdarlığında belə bir çağırış da sezilir ki, bu yolda birləşmək lazımdır. Birlik olmasa Moskva ayrı-ayrılıqda hər ölkə ilə asanlıqla istədiyi rəftarı edəcək". Siyasi şərhçi Aydın Quliyev Daniel Fridin bəyanatının əsaslı olduğunu bildirdi: "Gürcüstanın yaşadığı hazırkı problemlər və Kremlin Ukrayna və Azərbaycan üçün yarada biləcəyi təhlükələrin xarakteri bir-birindən fərqlidi. Amma ümumi şəkildə götürsək, Daniel Fridin bəyanatı tamamilə əsaslıdır. Rusiyanın hazırda potsovet məkanına ünvanlanmış xarici siyasətində, xüsusən, Ukrayna və Azərbaycan üçün təhlükə var. Kiyev indiki şəraitdə açıq şəkildə separatizm dalğasıyla üzləşməyib. Amma bu ölkənin müəyyən iqtisadi əlaqələri var ki, onlar Rusiyadan asılıdır. Xüsusilə də Kiyevin neft-qaz təminatı məsələsində şimal qonşumuzdan asılılığı böyükdür. Daniel Frid çox güman ki, Ukraynanı gözləyən təhlükələrdən danışanda birinci növbədə Rusiyanın Avropaya qarşı enerji şantajının Kiyevə qarşı çevrilə biləcəyini nəzərdə tutur". Aydın Quliyevin sözlərinə görə, Azərbaycanla bağlı gözlənən təhlükə isə fərqlidir. Yəni Bakının 15 ildə Qarabağ problemilə bağlı göstərdiyi dinc cəhdlər heç bir nəticə verməyib. Ölkənin iqtisadi inkişafı və bunun müqabilində Ermənistan iqtisadiyyatının tənəzzül etməsi belə bir perspektiv inkar etmir ki, Azərbaycan da nə vaxtsa öz ərazi bütövlüyünü bərpa etmək üçün hərbi əməliyyatlara əl ata bilər. Belə olan təqdirdə sözsüz ki, Rusiya strateji müttəfiqi olan Ermənistana hərbi yardım göstərəcək. Bu baxımdan ölkəmiz üçün də təhlükə mövcuddur: "Ona görə də Daniel Fridin xəbərdarlığı təkcə Azərbaycan, Ukrayna və Gürcüstanı gözləyən təhlükələrdən xəbər vermir. Eyni zamanda bu bəyanat bizim regionda Qərblə Rusiya arasında strateji mübarizədə Qərb dövlətlərinin potensiallarının daha aktiv şəkildə səfərbərliyə alınmasına bir çağırışdır. Bu çağırışdan sonra Qərbin Cənubi Qafqaz ölkələrinin və Ukraynanın suverenliyinin qorunması üçün hansı daha yeni və real addımlara əl atacağını gələcək göstərəcək. ABŞ vitse prezidenti Dik Çeyninin ilk növbədə bu üç ölkəyə səfəri isə iki məsələnin nümayişinə xidmət göstərir. Birincisi, ABŞ Gürcüstan, Azərbaycan və Ukraynanın dövlət müstəqilliyinin müdafiəsində sona qədər maraqlı olduğunu nümayiş etdirmək istəyir. İkincisi isə, Vaşinqtonda bu ölkələri gözləyən təhlükələri doğrudan da real sayırlar". xalqcebhesi