Qustav" Obamanı dəstəklədi Makkeyn isə vitse-missi viste-prezidentliyə namizəd etdi "Əsrin qasırğası" adlandırılan "Qustav" dünən səhər tezdən ABŞ sahillərinə çatıb. Qasırğaların proqnozlaşdırılması Milli Mərkəzi tropik leysan və güclü külək şəklində gələn təbii fəlakətin Meksika körfəzi sahillərinə güclü ziyan vurduğunu açıqlayıb. "BBC"nin məlumatına görə, güclü qasırğa hələ iki il əvvəl "Katrina" qasırğası tərəfindən yerlə-yeksan edilmiş Yeni Orlean istiqamətində hərəkət edir. Artıq Luiziana ştatını 2 milyon insan tərk edib. Yeni Orleanda isə 327 min əhalidən cəmi 10 min nəfər qalıb. Bundan əvvəl "Qustav" qasırğasına Saffir-Simpson 5 ballıq cədvəli ilə 4-cü təhlükəlilik dərəcəsi verilmişdi. Lakin qasırğanın gücü qismən zəifləyib və hazırda onun 3-cü təhlükəlilik dərəcəsində olduğu bildirilir. "Qustav"ın sürəti saniyədə 51 metrə çatır. Qasırğa özü ilə 6 metrlik dalğalar gətirir və bu da sel basmasına səbəb ola bilər. Respublikaçılar Partiyası isə "Qustav" qasırğasına görə bu gün açılacaq partiya qurultayı çərçivəsində fəaliyyətini məhdudlaşdırmaq qərarına gəlib. Respublikaçılar partiyasının prezidentliyə namizədliyini qəbul etməli olan senator Con Makkeyn deyib ki, indiki anda onun partiyası respublikaçılar qismində yox, amerikalılar qismində hərəkət edəcək. Senator Con Makkeyn bildirib ki, siyasi qayələri kənara qoyub, Amerika qayələrindən düşünmək lazımdır: "Amerika xalqı əməli tədbirlərə çağırılmalıdır. Faciə və fəlakətin yaxınlaşdığı bir vaxt hamı təhlükədə olan həmvətənlərinə köməyə qalxmalıdır". Con Makkeyn amerikalıları bu yolda təbii fəlakətlə üzləşən həmvətənlərinə yardım etmək üçün maddi imkanlarını, iradə və qüvvələrini əsirgəməməyə çağırıb. Prezident Corc Buş isə deyib ki, qasırğaya hazırlığa nəzarət etmək üçün Texasa gedəcək. O amerikalılara televiziya müraciətində deyib ki, əgər qasırğa Amerikanın cənub sahilinə zərbə endirsə, ərazini su basa bilər. Prezident Buş deyib ki, qasırğa ilə bağlı hadisələrə görə respublikaçıların Minnesotadakı qurultayına getməyəcək. O, Texasa gedib Olsendəki fövqəladə əməliyyatlar mərkəzinə baş çəkib orada federal və dövlət qurumlarının koordinasiya işlərinə nəzarət edəcəyini, evakuasiya olunan əhaliylə görüşəcəyini deyib. Respublikaçılardan söz düşmüşkən, partiyanın seçki qərargahı ötən həftənin sonu atdığı sensasion addım geniş müzakirə olunmaqdadır. Söhbət respublikaçıların prezident seçkilərində namizədi olmağa hazırlaşan Con Makkeynin vitse-prezidentliyə "Miss Alyaska" titulunun qalibi, hazırda bu ştatın qubernatoru Sara Peylini irəli sürməsidir. Makkeyn bu təşəbbüsü demokratlardan zərif cinsin nümayəndələrinin səsini əldə etməklə yanaşı, respublikaçıların dəyişikliklərə hazır olduğunu göstərməyə xidmət edir. Lakin bir sıra ekspertlər bu qənaətdədir ki, islahatlar tərəfdarlarına qarşı edilən bu güzəştli addım Makkeyn üçün sarsıdıcı ola bilər. Belə ki, respublikaçıların mühafizəkar hissəsi bunu həddən artıq cürətli addım hesab edər. Makkeynin 44 yaşlı Sara Peylinin üzərində dayanması onsuz da partlayan mərmi effekti doğurub. Seçiciləri qarşısında çıxış edən senator Saranı ölkəyə lazımlı adam adlandırıb. Sara Peylin müstəqilliyi ilə seçilən bir qadındır. Məktəbdə basketbol komandasında oynayıb, 1984-cü ildə isə Alyaskanın vitse-misi seçilib. Son iki ildir ki, qubernator vəzifəsində çalışır. Abortlara qarşı çıxan qubernatorun 5 uşağı var. Əksəriyyət bu qənatətdədir ki, qurultayda Makkeyn və Peylinin namizədlikləri təsdiqlənəcək. Keçirilən son rəy sorğusu göstərib ki, amerikalı seçicilərin rəğbəti yenidən demokratlara tərəf yönəlib. "Gellap" sorğu mərkəzinin keçirdiyi rəy sorğusunun nəticələrinə görə, seçicilərin 49 faizi Barak Obamaya, 41 faizi isə Con Makkeynə səs verməyə hazırdır. Halbuki bir həftə öncə respublikaçı namizəd rəqibini xeyli üstələməyə müvəffəq olmuşdu. Çox yaxın günlərdə Sara Peyli xarici siyasət və milli təhlükəsizlik məsələləri ilə bağlı demokrat rəqibi Cozef Baydenlə teledebata çıxmalı olacaq. Onun Senatın beynəlxalq əlaqələr komitəsinin rəhbərini üstələmək şansı isə sıfra bərabərdir. Beləliklə, ekspertlərin böyük əksəriyəti bu qənaətdədir ki, Makkeyn Peylini özünə vitse-prezident seçməklə böyük bir riskə gedib. kaspi