Dik Çeyninin Azərbaycana səfərindən nə gözlənilir? (politoloqların rəyi) Amerika Birləşmiş Ştatlarının (ABŞ) vitse-prezidenti Dik Çeyni bu gün Azərbaycana gələcək. Vitse-prezidentin ofisinin yaydığı məlumata görə, ABŞ prezidenti Corc Buş vitse-prezidentdən xahiş edib ki, Azərbaycan, Gürcüstan, Ukrayna və İtaliyaya səfər edərək, qarşılıqlı maraq doğuran məsələləri bu vacib tərəfdaşlarla müzakirə etsin. Vitse-Prezident Azərbaycan prezidenti İlham Əliyev, Gürcüstan prezidenti Mixail Saakaşvili, Ukrayna prezidenti Viktor Yuşşenko, İtaliyanın prezidenti Napoliatano və baş naziri Silvio Berluskoni, eləcə də əlaqədar hökumətlərin yüksək rütbəli nümayəndələri ilə görüşəcək. Dik Çeyninin Azərbaycana səfəri çərçivəsində Azərbaycan rəhbərliyi ilə görüşlərində regionda yaranmış vəziyyətlə bağlı məsləhətləşmələr aparacaq, həmçinin terrorla mübarizədə etibarlı tərəfdaş olan Azərbaycana Əfqanıstan və İraqda sülhyaratma prosesində fəal iştirakına görə Birləşmiş Ştatlar hakimiyyətinin minnətdarlığını çatdıracaq. Görüşlərdə enerji məsələləri, Dağlıq Qarabağ münaqişəsinin sülh yolu ilə həlli zərurəti, bu yaxınlarda prezident seçkisi keçiriləcək Azərbaycanda demokratiya və qanunun aliliyinin möhkəmləndirilməsi istiqamətində davamlı səylər ətrafında fikir mübadiləsi aparılacaq. Politoloq Rasim Musabəyovun ANS PRESS-ə bildirdiyinə görə, bölgədə gərginlik yarandığı bir dövrdə Dik Çeyninin səfəri açıq şəkildə Azərbaycana dəstəkdir: «Rusiya bölgədə aqressivliyini artırır. Kimlərsə Azərbaycana, onun bölgədəki mövqeyinə, iştirak etdiyi böyük layihələrə xor baxırsa, bu səfərlə anlayacaq ki, ABŞ Azərbaycandan dəstəyini əsirgəməyəcək. ABŞ Azərbaycana dəstək verəcək». R.Musabəyovun sözlərinə görə, səfər çərçivəsində beynəlxalq terrorizmlə mübarizə məsələləri əsas müzakirə mövzularından olacaq: «Çünki Azərbaycan beynəlxalq terrorizmlə mübarizə koalisiyasının üzvüdür». Politoloqun sözlərinə görə, Rusiyanın NATO ilə münasibətləri pisləşir, bu səbəbdən o, öz ərazilərindən daşınmalara maneə yarada bilər və Azərbaycan bu baxımdan ABŞ üçün olduqca vacib ölkədir. Politoloq Araz Əlizadə isə Dik Çeyninin səfərindən müsbət heç nə gözləmədiyini vurğulayıb: «ABŞ sadəcə bu səfər çərçivəsində Azərbaycanı dilə tutmağa çalışacaq ki, Mixail Saakaşvilinin buraxdığı səhvləri biz də buraxaq və ABŞ baş verənlərə kənardan baxsın». A.Əlizadə qeyd edib ki, səfər çərçivəsində terrorizmlə bağlı məsələlərin müzakirəsi də heç nə vəd etmir: «ABŞ terrorizmlə mübarizə aparmaq istəsəydi, bir dəfə də Ermənistanın Azərbaycana qarşı törətdiyi terrora münasibət bildirərdi. Onları ancaq özlərinə dəxli olan məsələlər maraqlandırır və bu səfər çərçivəsində də belə olacaq». Politoloqun sözlərinə görə, ABŞ-ın vitse-prezidenti Dik Çeyninin Azərbaycana səfəri çərçivəsində Azərbaycanla Ermənistan arasında gedən Dağlıq Qarabağ münaqişəsinin həlli istiqamətində də müsbət irəliləyişə nail olunacağını düşünmək yersizdir: «Dik Çeynidən də yüksək vəzifəli şəxslər, məsələn ABŞ prezidenti Corc Buş da bu problemi həll edəcəyini bildirmişdi. Amma nəticəsi olmadı. Hətta ABŞ BMT-də Azərbaycanın müstəqilliyi ilə bağlı qətnamənin əleyhinə səs vermişdi, ABŞ müstəqilliyimizi tanımamışdı. Belə olan halda, bu görüşdən Dağlıq Qarabağ probleminin həlli istiqamətində nəsə gözləmək lazım deyil». Politoloq Rasim Ağayev isə ANS PRESS-ə bildirib ki, Dik Çeyninin Azərbaycana, Gürcüstan və Ukraynaya səfərə gəlməsi əsasən Gürcüstan məsələləri ilə bağlıdır: «Səfərdə əsasən Gürcüstana hərbi, siyasi, iqtisadi köməkdən söhbət gedəcək. Amerika çalışacaq ki, səfərdə iki məsələ güdsün: GUAM-ı bir təşkilat kimi canlandırsın və Cənubi Qafqazda Rusiya maraqlarına qarşı bir sədd qoysun». R.Ağayevin sözlərinə görə, Dik Çeyni Azərbaycana səfərində Ermənistan-Azərbaycan məsələlərinə də diqqət yetirəcək. Onun fikrincə, ola bilsin Azərbaycanın Ermənistanla iqtisadi əməkdaşlığa başlaması təklif edilsin: «Ermənistanın vəziyyəti ağırdır». O, qeyd edib ki, bununla ABŞ Ermənistanı Rusiya əleyhinə yaranmış cəbhəyə qatmağa çalışacaq. O, həmçinin qeyd edib ki, Azərbaycanla Ermənistan arasında iqtisadi əməkdaşlıq məsələləri gündəmə gəlsə, əvvəlcə Ermənistan qoşunlarının Azərbaycanın işğal olunmuş ərazilərindən çıxarılması barədə yazılı razılaşmanın əldə edilməsi vacibdir: «Əgər Azərbaycan belə bir razılaşma əldə edilmədən Ermənistanla iqtisadi əməkdaşlığa başlasa, demək Ermənistanın iddiaları ilə razılaşırıq və Dağlıq Qarabağ əldən gedir». Röya Rəfiyeva /ANS PRESS/ express