Türkiyədə «Ergenekon qalmaqalı» davam edir Əhalini şoka salan əməliyyata 6 min polis cəlb edilib Türkiyədə “Ergenekon qalmaqalı” çərçivəsində həbslər davam edir. APA-nın məlumatına görə, iyunun 1-də gecə saatlarında Istanbul 11-ci Ağır Cəza Məhkəməsinin qərarı və Istanbul prokurorluğunun göstərişi ilə Ərzurumda daha iki nəfər həbs olunub. Terrorizmə qarşı mübarizə şöbəsinin əməkdaşlarının keçirdiyi əməliyyat nəticəsində həbs olunanların adları açıqlanmasa da, onların istefada olan hərbçilər olduğu ehtimal edilir. Bununla da son iki gündə başlayan həbslərdə saxlanılanların sayı 23 nəfərə çatıb. Həbs olunanlar arasında istefada olan generallar Şener Eruyğur, Xurşit Tolon, Ilker Güven, Levent Ersöz, jurnalistlər Mustafa Balbay, Ufuk Böyükçelebi, Erol Mütərcimlər, Ankara Ticarət Odası başqanı Sinan Aygün və başqa tanınmış simalar var. AKP Balıkəsir sabiq millət vəkili Turhan Çöməz də daxil olmaqla dörd nəfər haqqında isə axtarış elan edilib. Əməliyyatlara 6 min polis cəlb edilib Bu arada məlum olub ki, iyulun 1-də Ankara, Istanbul, Antalya və Trabzonda keçirilən əməliyyatlar 40 ayrı qrup - 6 minə yaxın polis tərəfindən gerçəkləşdirilib. Əməliyyatlar ötən şənbə günü “Ergenekon” adlandırılan gizli təşkilata qarşı istintaqı aparan müstəntiqlər Zəkəriyyə Öz, Mehmet Əli Pekgüzel, Nihat Taşkın və Əmniyyət Müdirliyinin bəzi yüksək rütbəli məmurları tərəfindən planlaşdırılıb. Istanbulun Beşiktaş rayonundakı ədliyyə binasında keçirilən toplantıda polisin hansı ünvanlara daxil olacağı və həbslərin hansı şəkildə aparılacağı dəqiqləşdirilib. Toplantının ertəsi gün Istanbul 10-cu Ağır Cəza Məhkəməsi həbs olunacaq şəxslərin evlərində, ofislərində axtarış aparılmasına icazə verib. Bu qərar əsasında hər biri 120-150 nəfərdən ibarət 40 qrup iyulun 1-də səhər tezdən əməliyyata başlayıb. Nəticədə Türkiyə Cümhuriyyəti tarixində ilk dəfə olaraq iki ordu generalı - Jandarma Qüvvələrinin sabiq komandanı Şənər Əruyğur və 1-ci ordunun keçmiş komandanı Xurşid Tolon, həmçinin Jandarma Qüvvələrinin sabiq kəşfiyyat rəisi, general Ləvənt Ərsöz, admiral Ilkər Güvən, polkovnik Atilla Uğur, Ankara Ticarət Palatasının sədri Sinan Aygün, “Tercuman” qəzetinin baş redaktoru Üfüq Böyükçələbi, “Cumhuriyet” qəzetinin Ankara təmsilçisi Mustafa Balbay kimi tanınmış şəxsiyyətlər də daxil olmaqla 21 nəfər həbs edilib. Onu da qeyd edək ki, iyulun 1-də həbs olunan istefada olan polkovnik Atilla Uğur PKK terror təşkilatının lideri Abdulla Öcalanı həbsxanada dindirən şəxslərdən biri olub. Biznes qurumları da qalmaqala qoşuldu Bu arada Türkiyənin ən nəhəng biznes qurumlarından biri olan Ticarət Palataları və Birjalar Birliyinin sədri Rıfat Hisarcıklıoğlu Ankara Ticarət Palatasının sədri Sinan Aygünün həbsinə sərt reaksiya verib. Türkiyə xəbər agentliklərinin verdiyi məlumata görə, Ankara Ticarət Palatası Məclisinin toplantısına qatılan R.Hisarcıklıoğlu Türkiyə iş dünyasının hər zaman demokratiyanın, şəffaflığın, legitimliyin tərəfində olduğunu, belə bir ailənin hörmətli nümayəndəsinin hərbi çevriliş dövrlərini xatırladan üsulla həbs edilməsinin bütün iş adamlarını dərindən yaraladığını bildirib: “Açıq deyirəm: bu durumu əsla qəbul etmirik. Aygünün adının hələ də ictimaiyyətə açıqlanmamış bəzi qeyri-qanuni fəaliyyətlərdə hallandırılmasını, hər hansı ittiham irəli sürülmədən bu cür davranışa məruz qalmasını pisləyirik”. Başbuğ təkzib edir Dünən həmçinin Türkiyə Silahlı Qüvvələrinin rəhbərliyi “Ergenekon qalmaqalı” ilə əlaqədar bir sıra sabiq general və admiralların həbsinin ordu komandanlığı ilə razılaşdırılması barədə məlumatları təkzib edib. Türkiyə quru qüvvələri komandanı Ilkər Başbuğ həbslərin onunla razılaşdırılması barədə xəbərlərin yalan olduğunu bildirib:"Açıq şəkildə bəyan edirəm. Bununla bağlı fikirlər və düşüncələr kökündən səhvdir. Baş nazir Ərdoğanla bir neçə gün əvvəl keçirilən görüşümüzdə bu məsələ heç bir formada gündəmə gəlməyib". Qeyd edək ki, həbslərdən iki gün əvvəl Ilkər Başbuğla baş nazir Ərdoğanın görüşü olub. Türkiyə mediası baş nazir Ərdoğanın istefada olan generallar Hurşit Tolon, Şener Eruyğur, Ilker Güven və başqalarının həbsinin general Ilkər Başbuğla razılaşdırıldığını iddia edib. Xatırladaq ki, Ilker Başbuğ avqustun 31-dən etibarən Türkiyə Silahlı Qüvvələri Baş Qərargahına rəhbərlik edəcək. O, bu postda təqaüdə çıxan general Yaşar Böyükanıtı əvəzləyəcək. Baş Qərargah açıqlama yaydı Dünən eyni zamanda Türkiyə ordusunun Baş Qərargahı da həbslər və axtarışlarla bağlı rəsmi açıqlama yayıb. Istefada olan generalların evlərində və ofislərində aparılmış axtarışlarla bağlı verilən açıqlamada deyilir: “Həbs və axtarışların bir qismi hərbi məhəllələrdə aparılıb. Bəzi mətbuat orqanlarında bunların Baş Qərargahın icazəsi ilə edildiyi barədə xəbərlər yer alıb. Bildiririk ki, axtarışlar 5271 saylı Cəza Mühakiməsi Qanununun 119-cu maddəsinin 5-ci bəndinə uyğun aparılıb. Həmin bənddə deyilir ki, hərbi məhəllələrdə axtarışlar prokurorun istəyi və iştirakı ilə hərbi orqanlar tərəfindən aparılır”. azadliq