“FATF”, İrana maliyyə qanunlarında islahatlar aparmaq üçün oktyabra qədər vaxt verib

SON XƏBƏRLƏR

“FATF”, İrana maliyyə qanunlarında islahatlar aparmaq üçün oktyabra qədər vaxt verib

2021.10.20, 07:36

Gunaz.tv

GünAzTV: Dünyada qeyri-qanuni yollarla əldə edilmiş çirkli pulların yuyulmasına, maliyyə fırıldaqçılığına və terrorizmin maliyyələşdirilməsinə qarşı mübarizə aparan Maliyyə Tədbirləri üzrə İşçi Qrupu (FATF), iyunun 29-da bəyanat yayaraq, İrana maliyyə qanunlarında islahatlar aparmaq üçün oktyabr ayına qədər vaxt verdiyini açıqlayıb.

Bəyanatda bildirilir ki, FATF, İranı bu qrupun qara siyahısına salmasını müvəqqəti olaraq dayandıraraq, İrana maliyyə qanunlarında düzəlişlər edərək beynəlxalq qanunlarla uyğunlaşdırmaq üçün oktyab ayına qədər möhlət verir: “İran, həmin vaxta qədər terrorçu qruplara dəstək verən maliyyə qanunları strukturuna düzəlişlər etməli, öz qanunlarını beynəlxalq qanunlara uyğun tənzimləməlidir. Əks təqdirdə, rəsmi Tehran, bunun sonrakı mənfi nəticələrini, o cümlədən də sərmayə sahiblərinin bu ölkədə sərmayə yatırmaqdan imtina etməsi riskini qəbul etməlidir.

İran, maliyyə qanunlarında dərhal islahatlara başlamalı, bu istiqamətdə hərəkət edəcəyi barədə bizi əmin etməlidir. İran, qarşıdan gələn oktyabr ayına qədər öz qanunlarını FATF-in qanunlarına uyğun tənzimləməli, terrorizmin maliyyələşdirilməsinə şərait yaradan qanunlarına düzəlişlər etməlidir. Əks təqdirdə Maliyyə Tədbirləri üzrə İşçi Qrupu (FATF), İrana qarşı lazımi tədbirləri görəcək, bununla bağlı qərarlar verəcək”.

Qeyd edək ki, İran prezidenti Həsən Ruhani hökuməti FATF-in tələblərinə uyğun bəzi addımlar atmaq istəsə də, İranın dini lideri axund Əli Xamneyi bir həftə əvvəl parlament deputatları ilə görüşündə FATF-ə qarşı bəyanatlar səsləndirərək, İranın bu qrupa, eləcə də çirkli pulların yuyulmasına və terrorizmə dəstəyə qarşı mübarizə aparan bu kimi beynəlxalq konvensiyalara üzv olmasına qarşı çıxaraq, ölkənin bununla bağlı öz qanunlarını qəbul etməsini tələb edib.

A.M

GUNAZ.TV

SON XƏBƏRLƏR