Abbas Musəvi: “3-cü addım daha möhkəm olacaq”

SON XƏBƏRLƏR

Abbas Musəvi: “3-cü addım daha möhkəm olacaq”

2021.10.20, 07:36

Gunaz.tv

GünAz TV: İran Xarici İşlər Nazirliyinin sözçüsü Abbas Musəvi ölkəsinin öz nüvə öhdəliklərini azaltmaq istiqamətində atacağı 3-cü addımın 1-ci və 2-ci addımlardan daha möhkəm olacağını deyib.

O, eyni zamanda Avropa ölkələri ilə aparılan müzakirələrin nəticə verdiyi təqdirdə, vəziyyətin bir neçə ay öncəki kimi olacağını bildirib.

Xatırladaq ki, İranın Avropa ölkələrinə 3-cü addımı atacağıyla bağlı verdiyi möhlətin bitməsinə 3 gün qalıb. Rəsmi Tehran bildirir ki, əgər Avropa tərəfi verilmiş müddət ərzində İranın nüvə razılaşmasında nəzərdə tutulmuş iqtisadi mənafeyinin təmin edilməsi istiqamətində “əməli addımlar” atmasa, onda onun şərtlərinə əməl etməyə lüzum görmür.

Digər tərəfdən, Avropa ölkələri razılaşmanın qorunub saxlanması üçün bir çox tədbirlər həyata keçirib. Onlardan ən əsası olan “İnstex” adlı barter sisteminə əsaslanan maliyyə kanalının işə salınması da tərəflər arasında fikir ayrılıqlarının aradan qalxmasına zəmin yarada bilməmişdi. Bir çox iranlı rəsmilər neft satışı qarşısında İrana ərzaq məhsullarının ixracını nəzərdə tutan bu kanalı “təhqir” adlandırmışdılar.

İran hökumətinin sözçüsü Əli Rəbii bu gün bildirib ki, ölkəsinin müzakirələr zamanı irəli sürdüyü tələb Avropanın İrandan neft alışına davam etməsidir. O qeyd edib ki, təmsil etdiyi dövlət Avropanın İrandan neft almasını və pulunun da ölkəyə gətirilməsini təmin etməyini istəyir.

Qeyd etmək lazımdır ki, İran cari ilin may ayının 8-dən, yəni Amerikanın nüvə razılaşmasından çıxmasının 1-ci il dönümündən etibarən Avropa ölkələrinə iki dəfə 60 günlük vaxt verərək, onları İranın razılaşmada nəzərdə tutulmuş öhdəliklərini azaldacağıyla bağlı təhdid edib. Bu müddətlər başa çatdıqdan sonra İran zənginləşdirilmiş uran depolanması və zənginləşdirmə faizi ilə bağlı qəbul etdiyi məhdudiyyətləri ləğv edib.

Amerika Birləşmiş Ştatları bu addımlara verdiyi reaksiyada İranın ilk günlərdən nüvə razılaşmasını pozduğunu bildirib.

Ə.A

GUNAZ.TV

SON XƏBƏRLƏR