GünAz TV: Liviyaya (Libiyə) 42 il hökmranlıq etmiş ailənin gerçək siması daha tükürpədicidir.

Liviya diktatoru Müəmmər Qəzzafinin paytaxt Tripolidəki (Trablos) iqamətgahı Bab əl Əziziyyənin müxaliflərin əlinə keçməsindən sonra Qəddafi ailəsinin üzvləri haqda tükürpədici iddialar ortalığa çıxıb.

Diktatorun “Amazonlar” deyilən qadın mühafizəçilərindən ibarət taborun (qrup) 5 üzvünün Qəddafi və oğullarının təcavüzünə məruz qaldığı, oğlu Sədinin ofisindən homoseksual porno filmlər tapıldığı, onunla münasibəti rədd edən oğlan “dostunu” həbsə atdırdığı kimi şok məlumatlar yayılıb.

Qəddafinin digər oğlu Mütəssimin hollandiyalı maniken sevgili isə onunla gecə klubunda tanış olduqlarını bildirib. Maniken Mütəəsimin ayda 2 milyon dollar xərclədiyini də söyləyib.

Sədi Qəddafi nəyə görə 13 illik dostunu həbs etdirib?

İngiltərədə yayımlanan “The Sunday Mirror” qəzetinə danışan Rəda Tavargi adlı liviyalı Sədi Qəddafi ilə 13 il yaxın dost olduğunu söyləyib:“Əl Əhli futbol komandasında (timində) birgə oynamışıq. İki il İtaliyada karyeramızı (Career) davam etdirmişik. Sədi mavidir (həmcensbaz). Mənimlə “daha yaxın dost” olmaq istədiyini biləndə isə onu rədd etdim. Bundan sonra məni həbs etdirdi. Barəmdə heç bir ittham yox idi. Hakimiyyətə qarşı üsyan başlayanda mənim efirə çıxıb rejimə dəstək verməyimi istədi. Mənim şöhrətimdən yararlanmağa çalışırdı. Bundan imtina etdim. İndi ona ilk yumruğu mən atmaq istəyirəm. Tapılsa mənə xəbər verin”.

Bir ayda 2 milyon dollar cibxərcliyi

Qəddafinin beşinci oğlu Mütəəsimlə bağlı iddialar isə “The Daily Telegraph” qəzetində yayılıb. 35 yaşlı Mütəəsimin hollandiyalı sevgilisi, maniken Talita van Zon qəzetə bunları söyləyib: “Mütəəsim ilə 2004-cü ildə İtaliyadakı gecə klubunlarının birində tanış olduq. Müsəlman olsam məni atasıyla tanış edə biləcəyini söyləyirdi. Mütəəsim məni hədiyyə yağışına tutur, bəzən Monakoda keçirilən Formula-1 yarışına, avropalı zadəganların qatıldığı şam yeməklərinə aparırdı. Şəxsi “Boeing”i ilə Karib adalarına gedib, yeni il tətilini birgə keçirdik. Paris və ya Londonda qaldığı zaman ən bahalı otellərin bir neçə mərtəbəsini yoldaşları üçün ayırtdırırdı.

Nə qədər pul xərcələdiyini soruşanda isə dəhşətə gəldim. Mənə 2 milyon dollar xərclədiyini bildirdi. Mən isə hərhalda 1 illik xərcliyinin bu qədər olduğunu deyəndə “xeyr 1 ayda bu qədər xərcləyirəm” cavabını aldım. Liviya xalqının nə halda olduğunu soruşduğumda isə “pulsuz təhsil və səhiyyə xidməti göstəririk, qida da ucuzdur” cavabını verdi. Amma yemək soyuq gəldiyi zaman yerə töküb xidmətçiyə yedirdirdi. Üsyan başlayanda isə vəziyyət və Mütəssim çox dəyişdi. “Liviyada nə işim var” deyə düşünməyə başladım. Bir gün üsyançılar qaldığım otelə hücum etdi. Balkondan atlayıb xilas oldum. Sonra gəmi ilə Maltaya qaçdım”.

Qəddafini mühafizə edənlərin özlərini qoruyan lazım imiş

Müəmmər Qəddafinin “Amazonlar” adlandırılan qadinlardan ibarət mühafizə taborunun 5 üzvünün diktator və oğulları tərəfindən zorakılığa məruz qaldığı məlum olub. “The Sunday Times” qəzetinə danışan benqazili psixiatr (rəvanpezeşk) Siham Sergeva bunları söyləyib: “Qəddafinin Beynəlxalq Məhkəmədə mühakimə olunması üçün hazırlanan ittihamnamədə onun qadın mühafizəçilərinin də ifadələri yer alır. Onlar Qəddafi barəsində şok ifadələr veriblər. Bu ifadələrə görə, Qəddafi və oğulları ən az 5 qadın mühafizəçini zorlayıb. Qadınlardan biri qardaşının narkotiklə (müxəddir maddə) bağlı cinayətə görə həbs edildiyini və “mühafizəçi olmasan qardaşın ömürlük həbsə atılacaq” deyə şantaja məruz qaldığını söyləyib. Mühafizəçi Bab əl Əziziyədəki iqamətgaha çağırıldığı zaman Qəddafinin gecə paltarında onu qarşıladığını bildirib. Diktator həmin qadına çirkin təklif etsə də qadın bunu rədd edib. Lakin öncə diktator daha sonra isə oğlanları ona təcavüz ediblər”. Azadlq qəzeti