İran ermənilərə qıymadı!

SON XƏBƏRLƏR

İran ermənilərə qıymadı!

2021.10.20, 07:36

Gunaz.tv

GünAz TV: İran-Azərbaycan münasibətlərində son aylar hökm sürən soyuqlaşma aradan qalxmayıb. Bu arada isə rəsmi Tehran PKK-nın Ermənistanda təlim keçdiyi xəbərini təkzib edib.

GünAz TV: İran-Azərbaycan münasibətlərində son aylar hökm sürən soyuqlaşma aradan qalxmayıb. Maraqlıdır ki, bu mərhələdə İranın Azərbaycandakı səfirliyi mətbuata yalnız bir təkzib verməklə fəaliyyətini bitmiş saydı.

Sözügedən təkzib isə İran Silahlı Qüvvələrinin Baş Qərargah rəisi Seyid Həsən Firuzabadinin Azərbaycan rəhbərliyinə xəbərdarlığı barədə idi. Səfirlik bu barədə yayılan məlumatı təkzib edib. Firuzabadinin dediklərinin düzgün anlaşılmadığını bəyanladı.

Ancaq maraqlısı odur ki, çox keçmədən İran mətbuatı Bakıdakı səfirliyi vurdu və onun təkzibini təkzib etdi. Bundan sonrakı mərhələdə isə İran səfirliyinin İran-Azərbaycan münasibətlərinin durumu barədə mövqeyində sükut hökm sürdü. "Yeni müsavat" qəzeti yazır ki, Səfirliyə müraciət edib mövcud durumun şərhini almaq istəsək də, bu, mümkün olmadı.

Dünən isə rəsmi Tehranın növbəti təkzibi mediada yayıldı. Bu təkzib İran Xarici İşlər Nazirliyinin mətbuat xidmətinin erməniləri müdafiəyə həsr olunmuş məlumatından ibarətdir.

Lent.az-ın məlumatına görə, bu qurumdan bildirilib ki, terrorçu kürd təşkilatı PEJAK-ın Ermənistan ərazisində təlim keçməsi barədə deyilənlər gerçəkliyi əks etdirmir. Nazirliyin mətbuat xidməti bu təkzibi Tehranda akkreditə (accredited) olunan xarici ölkələrin səfirləri ilə keçirilən görüşdə bəyan edib. Qurumun rəhbərliyi bildirib ki, kürd yaraqlılarının Ermənistan ərazisində təlim keçməsi “dezinformasiyadır (səhv məlumatdır) və rəsmi olmayan mənbələrin məlumatlarına inanmaq düz deyil”.

Xatırladaq ki, bir müddət öncə İranın ali rəhbəri ayətullah Xamneyinin Ərdəbildəki təmsilçisi höccətülislam Seyd Həsən Amili terrorçu PEJAK və PKK qruplaşmalarının təlim keçdiyi yerlə bağlı bunları bildirmişdi: “Bu qruplaşmaların ünsürləri Azərbaycan Respublikasının (Cümhuriyyətinin) Dağlıq Qarabağ ərazisində təlim keçir. Azərbaycan elə düşünür ki, Qarabağ erməninin əlindədir. Dağlıq Qarabağ hazırda ABŞ (Amerika Birləşmiş Ştatları) və sionist (səhyonist) rejimin əlindədir. ABŞ və sionist rejim bu ünsürləri Dağlıq Qarabağda yetişdirir, sonra isə İrana qarşı terror əməliyyatı törətməyə göndərir. PKK və PEJAK İranın bir çox vətəndaşını şəhid edib...”

İran ordusunun polkovniki Əziz Həsən-Azdam isə Qərbi Azərbaycan əyalətindən sıxışdırılan PEJAK yaraqlılarının bir hissəsinin Ermənistana keçdiyini bəyan etmişdi. Yeni müsavat

GUNAZ.TV

SON XƏBƏRLƏR