GünAz TV: Rusiya prezidenti Dmitri Medvedev azərbaycanlı həmkarı İlham Əliyevlə ikitərəfli münasibətlərin genişləndirilməsi, Dağlıq Qarabağ probleminin nizamlanması, həmçinin dünya iqtisadi problemləri ilə bağlı beynəlxalq məsələləri müzakirə edib.

ANS PRESS-in verdiyi xəbərə görə, bu barədə RİA “Novosti” agentliyi (ajansı) məlumat yayıb.

“Əlbəttə, əsas mühüm məsələlərdən biri Dağlıq Qarabağ problemidir. Bundan sonra nə etmək lazımdır, Kazanda baş tutan sonuncu görüş və ondan əvvəlki görüşlər də nəzərə alınmaqla hadisələrin necə inkişaf edəcəyinə dair son dərəcə açıq söhbət aparmaq istərdim”, - deyə görüş zamanı Dmitri Medvedev bildirib.

 Görüş zamanı Rusiya prezidenti azərbaycanlı həmkarına ikitərəfli münasibətlər, gündəliyin regional (bölgəsəl) məsələləri və beynəlxalq problemləri ilə bağlı cari vəziyyəti müzakirə etməyə təklif edib.

 “Qlobal (kürəsəl) maliyyə sisteminin iqtisadi problemləri bizi darıxmağa belə qoymur”, - deyə Rusiya prezidenti qeyd edib.

 Dmitri Medvedev son vaxtlar ikitərəfli münasibətlərin inkişafı istiqamətində çox işlərin görüldüyünü bildirib: “Mən yaxın illərdə əməkdaşlığı müəyyən edən sazişlərin imzalanmasını da nəzərdə tuturam”.

 Rusiya prezidenti həmçinin əlavə edib ki, iki ölkə arasında mal dövriyyəsinin artması münasibətlərin müsbət inkişafına sübutdur. Oun sözlərinə görə, danışıqlarda əsası Soçidə qoyulan əlverişli mühit hökm sürməkdədir.

 Öz növbəsində Azərbaycan prezidenti İlham Əliyev ölkəsinə etdiyi dəvətə görə rusiyalı həmkarına minnətdarlığını bildirib. O qeyd edib ki, ikitərəfli əməkdaşlığın bütün istiqamətləri üzrə müsbət dinamika müşahidə olunur, o cümlədən iqtisadi və humanitar (insani), həmçinin enerji təhlükəsizliyi kimi qarşılıqlı fəaliyyət sahələrində. İlham Əliyev həmçinin həmkarına Rusiynın Dağlıq Qarabağ münaqişəsinin nizamlanması posesində (sürəcində) göstərdiyi səylərə görə də təşəkkürünü bildirib.

 “Aparılan danışıqlar bir qədər tərəflərin mövqelərini yaxınlaşdırıb. Dağlıq Qarabağ münaqişəsi regional (bölgəsəl) təhlükəsizliyin əsas problemidir. Azərbaycan bu münaqişənin nizamlanmasında bəlkə də ən çox maraqlı olan tərəfdir”, - deyə Azərbaycan prezidenti vurğulayıb.

 Rusiya və Azərbaycan prezidentləri Ermənistan prezidentinin də iştirakı ilə müntəzəm olaraq görüşürlər və Dağlıq Qarabağ münaqişəsinin həlli ilə bağlı danışıqlar aparırlar. Sonuncu belə görüş 24 iyun tarixində Kazanda baş tutub.

 İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.

 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in (Avropa Təhlükəsizlik və Əməkdaşlıq Təşkilatı) Minsk qrupunun himayəsi altında, Rusiya, Fransa və ABŞ-ın (Amerika Birləşmiş Ştatlarının) həmsədrliyi ilə hələ də nəticəsiz sülh danışıqları aparılır.

 BMT (Birləşmiş Millətlər Təşkilatı) Təhlükəsizlik Şurasının Dağlıq Qarabağ və ətraf rayonların (məntəqələrin, şəhərlərin) azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.