Azyaşlı uşağın partlayıcı qurğu ilə qətlə yetirilməsini terrordan başqa heç cür adlandırmaq mümkün deyil

SON XƏBƏRLƏR

Azyaşlı uşağın partlayıcı qurğu ilə qətlə yetirilməsini terrordan başqa heç cür adlandırmaq mümkün deyil

2021.10.20, 07:36

Gunaz.tv

GünAz TV: Xarici İşlər Nazirliyinin mətbuat katibi Elxan Poluxov Tovuzda 13 yaşlı qızın ölümü ilə bağlı münasibət bildirərkən, bunu ermənilərin növbəti çirkin siyasəti olduğunu deyib.

Onun sözlərinə görə, azyaşlı uşaqları hədəfə alan Ermənistan dünya ictimaiyyəti qarşısında öz meyllərini yenə də nümayiş etdirərək, günahsız insanların, ələlxüsus uşaqların qanını tökməkdə davam edir.

Xarici siyasət idarəsinin rəsmisi bildirib ki, partlayıcı qurğunun mənbəyini Ermənistan ərazisində götürən və Əlibəyli kəndindən keçən Tovuz çayında tapılması onu göstərir ki, bu qurğu Ermənistan tərəfindən məhz məqsədyönlü şəkildə və xüsusi təyinatla hazırlanıb: “Həmçinin, partlayıcı qurğunun oyuncaq formasında olması əvvəlcədən hədəfin uşaqlar olmasının və erməni tərəfinin əsl niyyətinin göstəricisidir”.

O, Azərbaycanın Ermənistanın bu çirkinliyini və amansızlığını qətiyyətlə pislədiyini və bu cür əməllərin bu kimi həssas dövrdə tərəflər arasında qarşılıqlı etimadın yaranmasına birbaşa zərbə endirdiyini vurğulayıb: “Azyaşlı uşağın partlayıcı qurğu ilə qətlə yetirilməsini terrordan başqa heç cur adlandırmaq mümkün deyil. Erməni tərəfi beynəlxalq qanunvericiliyinin bütün tələblərinə zidd olaraq, dinc əhaliyə, xüsusilə günahsız uşaqlara qarşı dəfələrlə qəddarlıq və amansızlıq nümayiş edərək öz həqiqi sifətlərini bir daha ifşa edib, Xocalı soyqırımının həyata keçirilməsinə göstəriş verən insanlar bu gündə günahsız insanları öldürməyə göstəriş verməkdə davam etdiklərini sübuta yetirib”.

GUNAZ.TV

SON XƏBƏRLƏR