Ayətullah Dəstqeyb ruhaniləri zülm qarşısında susmamağa çağırır

SON XƏBƏRLƏR

Ayətullah Dəstqeyb ruhaniləri zülm qarşısında susmamağa çağırır

2021.10.20, 07:36

Gunaz.tv

GünAz TV: İran İslam Respublikası (Cümhuriyyəti) Üləmalar Məclisinin üzvü ayətullah Seyid Əli Məhəmməd Dəstqeyb iyulun 7-də Şirazda tərəfdarları qarşısında çıxış edərək müxalifət liderləri Mirhüseyn Musəvi və Mehdi Kərrubinin həbsdə saxlanması qarşısında susan din alimlərini kəskin tənqid edib.

GünAz TV mətbuat mərkəzinin “Media forum”a istinadən yaydığı məlumata görə, ayətullah Dəstqeyb deyib ki, yüksək rütbəli din alimlərindən, ruhanilərdən ibarət olan Üləmalar Məclisi hər hansı zülm qarşısında susmamalı, öz vəzifəsini yerinə yetirməlidir: “Cənab Musəvi Üləmalar Məclisinin bütün üzvlərinin vəzifəsini təkbaşına yerinə yetirdi. O, hakimiyyətin ölkə konstitusiyasından (Anayasasından) uzaqlaşması, rəsmilərin qanuna zidd hərəkətləri barədə əvvəlcədən xəbərdarlıq etdi. Lakin onu tutub dama basdılar. Ruhanilər də susdu, heç biri buna etiraz bildirmədi.

Ömrünün böyük hissəsini bu sistemə həsr etmiş şəxslərlə belə rəftar etmək düzgün deyil. Özünüz inqilab edəndə, özünüz İmam Xomeyninin yanında olanda və müharibə illərində inqilabı müdafiə edəndə bu iki alicənab da sizin yanınızda idi və sizə yardım edirdi. Bəs necə olur ki, onlar konstitusiyanın icra olunmasını, xalqın hüquqlarına əməl edilməsini tələb edən kimi birdən-birə “amerikalı” və “israilli” oldular. Bu qanun pozuntularını, zülmləri dini rəhbərin diqqətinə çatdırmaq sizin vəzifənizdir.

Məgər zindanda saxlanan bu mömin şəxslər (Musəvi və Kərrubi) “Quran”ın əmrinə tabe olaraq konstitusiyaya əməl edilməsindən başqa bir şey istəyiblər? Onların günahı nədir ki, aylarla təzyiq atında həbsdə saxlanmalı, barələrində də hər hansı xəbər verilməməlidir? Ey peyğəmbərin paltarını geyib, başına əmmamə qoyan ruhani cənablar! Sizin sükutunuzun bir anlamı var. O da hazırkı vəziyyətdən məmnun qalmağınızdır. Necə olur ki, bu qədər qanuna zidd əməllərdən, zindanlardakı işgəncələrdən xəbərdar ola-ola yenə susursunuz? Əgər bunlardan xəbərimiz ola-ola susub danışmırıqsa, vay bizim halımıza. Əgər bu zülmlərdən xəbərdar deyiliksə, yenə vay bizim halımıza”.

GUNAZ.TV

SON XƏBƏRLƏR