GünAz TV: İslam Respublikası (Cümhuriyyəti) İraq və Əfqanıstanda NATO əməliyyatlarının bitməsindən narahat olmağa başlayıb.

ABŞ-ın (Amerika Birləşmiş Ştatları) İrana hərbi zərbələr endirmə ehtimalı yenidən rəsmi Tehranın ciddi narahatlığına səbəb olub. İndi İranı qorxudan əsas məqam ABŞ-ın İraq və Əfqanıstandakı ordusunu çıxardıqdan sonra diqqətini Tehran hakimiyyətinə yönəldəcəyidir. Bu səbəbdən İran indidən fəaliyyətə keçib. Belə ki, "The Wall Street Cournal" mətbu orqanın yazdığına əsasən, İran İraq və Əfqanıstandakı qanuni hakimiyyətlərə qarşı çıxış edən yaraqlılara yeni növ silah-sursat ötürür. Mənbə bildirib ki, son aylar İran bu yöndə fəallığı artırıb. Buna səbəblərdən biri isə ABŞ-ın tezliklə bu ölkələrdən ordusunu çıxıracağı ilə bağlıdır.

Jurnal öz mənbəyinə istinad edərək bildirib ki, İran İslam İnqilab Keşikçiləri Qvardiyası (Sepah) bu ölkələrdəki yaraqlılara yeni raket sistemi və təlimçilər göndərib. "Taliban" döyüşçülərinə Tehran hakimiyyətinin uzaq radiuslu raketlər tədarük etdiyi də həmin hesabatda öz əksini tapıb. General-mayor Ceyms Bükenen isə müsahibəsində deyib ki, məhz İrandan bu sayaq dəstək alan qüvvələr son zamanlar İraqda daha fəaldır. Onun sözlərinə görə, əvvəllər terror aksiyalarının çoxunu "əl-Qaidə" və ya özlərini "müstəqil" adlandıran yaraqlılar törədirdi. Mənbənin yazdığına görə, son iki ay ərzində ABŞ hərbçiləri belə hərbi bazalardan açılan raket atəşi nəticəsində həlak olub. Jurnalın mütəxəssisləri hesab edib ki, İran Yaxın Şərqdə və Afrikanın Şimalında təsir imkanlarını artırmaq üçün fəallaşıb. Onların qənaətincə, Tehran ümid edir ki, "ərəb inqilablarından" sonra Ağ Ev bölgədə bir sıra müttəfiqlərini itirib. Bu isə Tehranın İslam dini adı altında fəaliyyət göstərən qurumlarla əlaqələri genişləndirmək və onları dəstəkləmək cəhdidir.

Bununla yanaşı, İranın hərbi təlimləri də Qərbin narahatlığına səbəb olub. Böyük Britaniyanın xarici işlər naziri Uilyam Heyq parlamentdə çıxışı zamanı bildirib ki, İran nüvə daşımağa qadir raketlərin məxfi sınaqlarını keçirir. Nazir İranın bu davranışının BMT-nin (Birləşmiş Millətlər Təşkilatının) qətnaməsinə zidd olduğunu diqqətə çatdırıb: "Hazırda İran 10 günlük hərbi təlimlər keçirir. Təlimlər çərçivəsində 2 min kilometr fəaliyyət radiuslu "yer-yer" tipli raketin sınaqları keçirilib. Bir müddət əvvəl Tehran 14 belə raket buraxıb. İndi isə məxfi şəkildə keçirilən sınaqlar BMT-nin 1929 saylı qətnaməsinə birmənalı şəkildə ziddir. İran 2010-cu ilin oktyabrından orta mənzilli ballistik raketlərin ən azı 3 dəfə məxfi sınağını keçirib. İran bu hərəkətlə BMT-yə qarşı çıxır".

Bütün bunlar İrana qarşı Qərb dövlətlərinin hərbi əməliyyatlara başlaya bilmə ehtimalının yüksək olduğunu göstərir. Görünür, bunu İran da yaxşı bilir. Elə bu səbəbdən Tehran ona qonşu ölkələrin də ABŞ-la əməkdaşlıq edə biləcəyindən təşviş keçirir. Tehran İran parlamentinin müdafiə komitəsinin rəhbəri Qulam Rza Kəriminin dililə region (bölgə) ölkələrinə hədələyici mesaj da göndərib. Xatırladaq ki, İran parlamentinin müdafiə komitəsinin rəhbəri Qulam Rza Kərimi "Fars" agentliyinə müsahibəsində Amerikanın ilk səhv addımında İran raketləri onların hərbi bazalarına doğru yönələcəyini bildirib. "Bu halda Amerika əsgərləri öz ölkələrinin regiondakı yanlış siyasətinin qurbanı olacaq". O qeyd edib ki, İran Amerika Birləşmiş Ştatlarının regiondakı İslam ölkələrindəki bazalarından da hücuma məruz qalarsa, o nöqtəni də vuracaqlar. "Amma müsəlmanlar narahat olmasın, raketlərimiz dəqiq olacaq", deyə Qulam Rza Kərimi vurğulayıb. Qeyd edək ki, Birləşmiş Ştatların dünyanın 737 nöqtəsində, həmçinin Fars körfəzində və Türkiyənin İncirlik bölgəsində hərbi bazaları yerləşir.

   İranın Azərbaycandakı səfirliyi ölkə parlamentinin Müdafiə Komitəsinin rəhbəri Qulam Rza Kəriminin sözügedən bəyanatına münasibət bildirib. Səfirlikdən verilən məlumata görə, Amerika İrana hücum edəcəyi təqdirdə bu ölkənin regiondakı hərbi bazaları hədəfə alınarsa, bu ölkələr sırasında Türkiyə yoxdur. Hədəfə alınacaq ölkələrin adlarına gəldikdə isə, səfirlik bununla bağlı hər hansı şərh verməyib. Bu arada İran Azərbaycanın da ABŞ-la əməkdaşlığından açıq narahatlıq duyur. Qeyd edək ki, bunu İran parlamentinin sədri Əli Laricani ölkəmizdə yenidən dilə gətirib. Parlament sədri, həmçinin, ABŞ-ın regional (bölgəsəl) problemləri ilə məşğul olmasını mənfi qarşıladıqlarını vurğulayıb: "Amerikanın regiona girişi nəinki problemi həll etmir, əksinə, yeni problem yaradır. İraq və Əfqanıstana girişindən sonra qaçaqmalçılıq və terror daha da artıb. Fələstin problemində hər dəfə yeni həll yolları ortaya qoymaqla problemin həllini uzadır. Obama son vaxtlar gülünc təkliflər verib. Biz həmişə regional həll yollarını təklif edirik. Çünki bölgədəki dövlətlər bu cür problemlərdə daha çox tanışdır. Azərbaycan istərsə, biz köməyimizi əsirgəməyəcəyik".

Bundan başqa, İran Qarabağ məsələsində daha çox Amerikanı günahlandırır. İranın Ali dini lideri Ayətullah Seyyid Əli Xamneyinin Təbriz üzrə xüsusi nümayəndəsi, Təbrizin imam cüməsi Ayətullah Müctəhid Şəbüstəri "SalamNews"a eksklüziv (özəl) müsahibəsində deyib ki, bu gün Dağlıq Qarabağ münaqişəsində ermənilərə istiqamət verən Amerikadır, çünki ABŞ müsəlmana, İslama düşməndir. Onun sözlərinə görə, İslam dominant (qalib, hakim) hegemonluqla istismara qarşı çıxaraq belə işləri haram buyurub: "Amerika bu niyyətdədir ki, bütün ölkələri nəzarəti altına alsın. Ermənilərə də, sionistlərə də istiqmət verir. Harada Amerika qüdrəti var, orada müsəlmanların vəziyyəti ağırdır". Tahir TAĞIYEV / Bakı-Xəbər