GünAz TV: Mətbuatın yazdığına görə, Rusiya prezidenti Dmitri Medvedyev Dağlıq Qarabağ münaqişəsinin sülh yolu ilə danışıqlar prosesinin (sürəcinin) gələcək inkişafı ilə bağlı fikirlərini yazılı surətdə bildirib.

Ermənistan prezidenti Serj Sarkisyan Kiyevdə ukraynalı həmkarı ilə birlikdə mətbuat konfransında Azərbaycan, Ermənistan və Rusiya prezidentlərinin bu yaxınlarda Kazan şəhərində üçtərəfli görüşünün nəticələri barədə danışarkən qeyd edib ki, D.Medvedyev iyunun (June) 30-u telefonla öz fikirlərini yazılı formada göndərdiyini söyləyib.  

Bu barədə RBK-Ukrayna agentliyi (ajansı) məlumat yayıb. Amma Ukrayna nəşri məktubun Azərbaycan tərəfinə də ünvanlanması barədə məlumat verməyib. Eyni zamanda, "Azadlıq" radiosunun Ermənistan bürosunun məlumatına görə, məktub münaqişə üzrə hər iki tərəfə göndərilib. Xatırladaq ki, iyunun 24-də Kazanda Medvedyevin təşəbbüsü ilə baş tutan üç tərəfli 9-cu görüş də nəticəsiz alınıb. Gözləntilərin əksinə olaraq, həmin görüşdə heç bir əsaslı irəliləyiş əldə olunmadı. Bundan sonra mətbuatda Medvedyevin təşəbbüs missiyasından (görəvindən) imtina etmək niyyətində olduğu, habelə vasitəçiliyin indi də ABŞ (Amerika Birləşmiş Ştatları) prezidenti Barak Obama tərəfindən həyata keçirilə biləcəyilə bağlı fikirlər səsləndi. Görəsən, Medvedyevin məktub məsələsi nə dərəcədə doğru informasiyadır? Digər tərəfdən, belə bir məktub varsa, o orada nəyi yaza bilər?

   Politoloq (siyasi şəthçi) Qabil Hüseynli belə bir məktubun ola biləcəyini istisna etmir. Məzmununa gəldikdə isə, o burada xalqların öz müqəddəratını təyinetmə prinsipinə (ilkəsinə, əslinə) daha geniş yer verilə biləcəyini istisna etmədi: "Rusiyanın Dağlıq Qarabağ probleminin həllinə dair mövqeyi bəllidir. Onlar hər vəchlə çalışır ki, Qarabağ deyilən Azərbaycan ərazisi ya müstəqilliyini elan etsin, ya da Ermənistana birləşdirilsin. Yəni ermənilərin söylədiklərini ruslar da bu və ya digər formada təkrar edir. Rusiya Ermənistana bir əyaləti olaraq baxır. Ona görə də çalışır ki, Qarabağla bağlı hər şey bu əyalətin xeyrinə olsun. Bu nöqteyi-nəzərdən də Medvedyevin məktubunda, yəqin ki, ATƏT-in (Avropa Təhlükəsizlik və Əməkdaşlıq Təşkilatı) cüzi kosmetik dəyişikliklərlə (nümayişi dəyişiklik) nəzərə çarpacaq ənənəvi həll variantları (seçənəkləri) var. ATƏT-in həll variantlarının  hazırlanmasında vaxtilə Kazimirov və digər rus təmsilçiləri önəmli rol oynayıb. Son dövrlərdə isə Qarabağ probleminin həllində Rusiyanın rolunun artması həmin variantların daha da təkmilləşdirilməsi və orada Ermənistanın maraqlarının daha aydın ifadə olunmasına gətirib çıxarıb. Zənnimcə, Medvedyevin məktubunda ərazi bütövlüyü məsələsi vurğulansa da, xalqların öz müqəddəratını təyin etməsi prinsipinə xüsusi diqqət yetirilib. Güman ki, orada Dağlıq Qarabağdakı erməni gəlmələri guya azadlıq mübarizəsi aparıb və bunun nəticəsində öz müqəddəratını təyin etmək haqqına sahibdirlər kimi fikirlər yer ala bilər. Məktubda Azərbaycanın ərazi bütövlüyü təmin edilməli, amma referendum vasitəsilə Qarabağın son statusu (vəziyyəti) müəyyən edilməlidir kimi sözünü də mütləq deyib. Bunun müharibədən sonra yaranmış reallıq olduğunu və hamının bununla barışmalı, habelə məsələnin canlanması üçün bu prinsipə riayət etməli olduğunu söyləyə bilər. Məktubun təxmini məzmunu bundan ibarət olar.

Burada sirr xarakteri (mahiyyəti) daşıyan məqamlar yoxdursa, səmimidirsə onu niyə dərc etmirlər? Dərc olunsaydı, ona daha düzgün şərh etmək olardı. Lakin Rusiyanın bu problemə yanaşmasını illərdir gördüyümüzdən, Medvedyevin nə yazdığını da söyləmək mümkündür". Bakı-xəbər