GünAz TV: Prezidentin komanda (tim, dəstə) üzvlərinə qarşı ölkənin idarəçiliyinin dini xarakterini (mahiyyətinə) dəyişmək cəhdi rəsmi ittiham kimi irəli sürüldü.

İranda cərəyan edən hadisələr bu ölkədə tezliklə hakimiyyət dəyişikliyinin baş verə biləcəyini göstərir. Artıq ölkə prezidenti ilə paralament arasında gərginlik özünün zirvə nöqtəsinə çatmaqdadır. Bu arada İran prezidenti Mahmud Əhmədinejad parlamentin son iclasından sonra mətbuat konfransı keçirib. O, iclasda Nazirlər Kabinetinə və ölkə hakimiyyətinə bir sıra ittihamlar irəli sürüb: "Deputatların (millət vəkillərinin) siyasi mövqeyi mənə aydındır. Bu insanlar cəmiyyəti ayırmağa çalışır. Müəyyən vaxta qədər səbr edirəm. Hakimiyyətə təzyiq göstərilərsə, mən bu sualı İran xalqı qarşısında qaldıracağam".

   Prezident bir neçə şəxsin həbsi ilə bağlı məsələyə toxunaraq söyləyib ki, bununla bağlı şayiələr hakimiyyətin və ölkənin vəziyyətinə mənfi təsir göstərir: "Məndən həmişə soruşurlar, belə vəziyyət nəyə gətirib çıxaracaq və nə etmək lazımdır?!"

   "Son vaxtlar mənim əməkdaşlarım barədə şayiələr yayılır. Belə davam etsə, mən tədbirlər görməyə məcbur olacam. Amma əminəm ki, bunu etməyəcəm"- deyən prezident çıxışında xalqı möhkəm olmağa və vətəndaş həmrəyliyinə çağırıb. Xatırladaq ki, iyunun (June) 26-da İran parlamentinin 100 deputatı prezident Mahmud Əhmədinejadın impiçment (elam-i cürm) olunması üçün parlamentin Rəyasət Heyətinə müraciət edib. Müraciət mühafizəkar deputat Əli Mütəhhərinin təşəbbüsü ilə hazırlanıb. İmpiçment layihəsində Əhmədinejada 11 sual ünvanlanıb. Suallardan 3-ü iqtisadi duruma, 3-ü qanun pozuntularına, 3-ü siyasi, 2-si isə mədəniyyət sahəsinə aiddir.

   İyunun 27-də İran parlamenti Rəyasət Heyətinin üzvü Məhəmməd Dehqan impiçment müraciətinə baxıldığını və müvafiq qərar çıxarıldığını açıqlayıb. O bildirib ki, ölkənin indiki həssas şəraitində Əhmədinejadın impiçment olunması hökumətlə parlament arasında əlaqələri zəiflədəcək, bu isə ölkənin xeyrinə deyil: "Rəyasət Heyəti üzvlərinin əksəriyyəti ölkənin indiki həssas durumunu nəzərə alaraq prezidentin impiçment olunmasını məqsədəuyğun saymadı. Onlar hesab edir ki, indiki şəraitdə bu, ölkənin xeyrinə deyil. Rəyasət Heyətinin iclasında qərara gəlindi ki, Əli Mütəhhəri ilə görüş keçirilərək ölkədəki hazırkı həssas şərait ona izah edilsin və xahiş olunsun ki, prezidentin impiçmentinə dair layihə hələlik parlamentin gündəliyinə çıxarılmasın".

Xatırladaq ki, mühafizəkarların çoxluq təşkil etdiyi parlamentin 100 üzvü cənab Əhmədinejadın idman naziri təyinatının gecikdirilməsi və parlamentin təsdiq etdiyi Tehran metrosu üçün fondların xərclənməsilə bağlı izahat verməsini tələb edir. İran konstitusiyasına (Anayasasına) əsasən, prezident, 290 üzvü olan parlamentin dörddə bir hissəsi onun məclisə gəlməsini tələb etdiyi halda, bunu etməlidir. Lakin onu da qeyd edək ki, İslam İnqilabının Ali dini lideri Ayətulla Xamneyi Məclisin açıq iclasında prezident Mahmud Əhmədinejada qarşı təhqiramiz davranışlardan narazılığını ifadə edib. Bu barədə İran parlamentinin Milli təhlükəsizlik və xarici siyasət Komissiyasının (komisiyonunun) üzvü Fatimə Aliyə məlumat verib. Onun sözlərinə görə, Ayətulla Xamneyi prezidentin nitqinin təhqirlər və yerdən qışqırıqlarla kəsməyin yolverilməz olduğunu qeyd edərək, belə davranışın böyük İran xalqının vicdan və qürurunun təcəssümü olan Məclis üzvlərinə layiq olmadığını deyib.

   Ayətulla, həmçinin, deputatların təhqiramiz hərəkətləri baş verərkən iclası yarımçıq kəsmədiyi üçün Məclis sədri Əli Laricaniyə iradını bildirib. F.Aliyə isə deyib: "Ayətulla Xamneyi parlament üzvlərinin sual vermək və prezidentin impiçmentini tələb etmək hüquqlarının olduğunu xatırladaraq, ölkə prezidentinə qarşı təhqiramiz çıxışların yolverilməz olduğunu vurğulayıb".

   Xatırladaq ki, İranda prezident Əhmədinejad və prezident administrasiyasının (nəhade riyasəte cemhuri) rəhbəri İsfəndiyar Rəhim Məşai tərəfdarlarının həbsi davam edir. Həbs edilənlər arasında Ərvənd azad iqtisadi zonasının rəhbəri Əli Əsgər Pərhizkar, Araz azad iqtisadi zonasının rəhbəri Əli Rza Moqimi, xarici işlər nazirinin keçmiş müavini Məhəmməd Əşrəf Malikzadə də var. Məlikzadə korrupsiya (fəsade mali) və qanunsuzluqlarda ittiham olunur.

   Xatırladaq ki, bu günlərdə İran parlamentinin 25 deputatı xarici işlər naziri Əli Əkbər Salehiyə etimadsızlıq göstərilməsi təşəbbüsü ilə çıxış etmişdi. Buna səbəb nazirin Məlikzadəni özünə müavin təyin etməsi idi.

   İranın baş prokuroru, höccətül-islam Qulam Hüseyn Möhsüni Ecei isə vurğulayıb ki, ölkədə həbslərin davam etməsi ehtimalı var. Baş prokurorun bəyanatına görə, bütün həbs edilən şəxslərin eyni təşkilatın üzvü olmasına baxmayaraq, xarici işlər nazirinin keçmiş müavinin Məhəmməd Əşrəf Malikzadəyə qarşı qaldırılmış cinayət işinin digər cinayət işlərinə birbaşa aidiyyəti yoxdur. Prokuror gələcəkdə bu təşkilatın digər üzvlərinin də həbs ediləcəyini bildirib. Prezident komandasının həbs edilmiş üzvlərinin pozuculuq hərəkatının üzvləri olduğu bildirilir. Mühafizəkarların fikrincə, bu şəxslər İslam Respublikasının (Cümhuriyyətinin)  idarəçiliyində ayətullahların rolunu azaltmağa, beləliklə də teokratik quruluşu devirməyə, islami dəyərlərin əvəzinə isə milli məsələləri ön plana çıxarmağa çalışır. Prezident Əhmədinejada əsl islami dəyərlərə riayət etmək tövsiyə olunub. Əks halda, onu impiçment gözləyir. Bakı-xəbər / Tahir TAĞIYEV