GünAz TV: Dünən Azərbaycanın paytaxtı Bakı şəhərinin Azadlıq meydanında Azərbaycan Silahlı Qüvvələrinin yaranmasının 93-cü ildönümü günü keçirilən hərbi parad (rejə) başa çatıb.

 

GünAz TV mətbuat mərkəzinin ANS PRESS-ə istinadən yaydığı məlumata görə, paradda Azərbaycan Silahlı Qüvvələrinin bütün növləri -6 min nəfərlik şəxsi heyət, 400-ə qədər hərbi texnika və silah sistemləri, o cümlədən 50-yə yaxın modernləşdirilmiş hərbi döyüş texnikası, Azərbaycan istehsalı olan və Azərbaycanda modernləşdirilmiş 60-a yaxın silah, 14 zirehli transportyor (hamil), ölkəmizdə modernləşdirilmiş yüzlərlə hərbi texnikalardan nümunələr, 35 döyüş vertolyotu (helikopter), 22 döyüş, 8 təlim məşq təyyarəsi, Müdafiə Nazirliyinin Hərbi Dəniz Qüvvələrinin 28 gəmisi, kater, qayığı, Fövqəladə Hallar Nazirliyinin 2 yanğınsöndürən gəmisi, 3 xilasetmə kateri, Dövlət Sərhəd Xidmətinin 4 sərhəd gözətçi gəmisi iştirak edib.

 

 Azərbaycan Respublikasının (Cümhuriyyəti) Prezidenti, Silahlı Qüvvələrin Ali Baş Komandanı İlham Əliyev hərbi paradda iştirak edib. Meydana toplaşanlar Azərbaycan Respublikasının Prezidenti, Silahlı Qüvvələrinin Ali Baş Komandanı İlham Əliyevi sürəkli alqışlarla qarşılayıblar.

 

 Müdafiə naziri, general-polkovnik (general sərhəng) Səfər Əbiyev Azərbaycan Prezidenti, Silahlı Qüvvələrin Ali Baş Komandanı İlham Əliyevə raport (qozariş) verib.

 

 Dövlət başçısı, Ali Baş Komandan İlham Əliyev əsgərləri salamlayıb.Müdafiə Nazirliyinin əlahiddə nümunəvi orkestri Azərbaycanın dövlət himnini (milli srud) ifa edib. Azərbaycan Prezidenti, Silahlı Qüvvələrin Ali Baş Komandanı İlham Əliyev nitq söyləyib.

 

 Sonra Silahlı Qüvvələrin şəxsi heyətinin və hərbi texnikanın təntənəli keçidi başlayıb. Meydana əvvəlcə, Azərbaycan Respublikasının (Cümhuriyyətinin)  dövlət bayrağı gətirilib.

 

 Bunun ardınca Cəmşid Naxçıvanski adına hərbi liseyin (hərbi dəbiristan) kursantları, quru qoşunlarının, hərbi hava və hərbi dəniz qüvvələrinin zabit bölükləri, ali hərbi məktəblərin kursantları mətin addımlarla tribunanın önündən keçdilər. Ardınca silahlı birləşmələrin xüsusi təyinatlılarının, Azərbaycan sülhməramlıları, Xüsusi Dövlət Mühafizə Xidmətinin, Milli Təhlükəsizlik Nazirliyinin, Daxili İşlər Nazirliyi Daxili Qoşunlarının, Dövlət Sərhəd Xidmətinin dəstələri də nizami addımlarla tribunanın önündən keçiblər.

 

 Meydana əvvəlcə motosikletlər və avtomobillər daxil olub. Azərbaycan istehsalı olan pilotsuz (idarəçisiz) uçuş aparatlarının (dəstqahlarının) nümayişi hərbi parada tamaşa edənlərdə daha böyük maraq doğurub. Müxtəlif çaplı, müasir tipli yedəkli artilleriya sistemləri (topxana sistemləri), avtomatik minaatanlar, tank əleyhinə toplar, qaubitsalar, qoşqular (poşt bəndlər), zireh sistemləri, “Qrad” yaylım atəşli reaktiv sistemləri, zenit-raket (zidde həvayi) kompleksləri, müxtəlif markalı özüyeriyən artilleriya (topxana) qurğuları, piyadanın döyüş maşınları, modernləşdirilmiş tanklar bir-birinin ardınca tribunanın önündən keçib.

 

 Xəzər dənizinin sahilində, paradın keçirildiyi Azadlıq meydanının yaxınlığında Hərbi Dəniz Qüvvələrinin gəmi və qayıqları hərbi reyddə (nizami yürüş) sıralanıb.

 

 Sonra Azadlıq meydanı üzərində Azərbaycan Hərbi Hava Qüvvələri döyüş təyyarələrinin və vertolyotlarının uçuşu oldu. Şahinlərimiz səmada döyüş təyyarələrini və döyüş vertolyotlarını məharətlə idarə edərək, yüksək peşəkarlıq və döyüş qabiliyyətinə malik olduqlarını bir daha təsdiqlədilər.

 

 Hərbi paradın sonunda bombardmançı və qırıcı-bombardmançı təyyarələr paytaxtın üzərindən keçdilər. Milli şahinlərimiz yüksək pilotaj fiqurlarını məharətlə yerinə yetirdilər. Onların heyrətamiz təmrinləri meydanda alqışlarla müşayiət olundu.

 

 Sonda bir daha Azərbaycan prezidenti, Silahlı Qüvvələrin Ali Baş Komandanı İlham Əliyev hamını bayram münasibətilə təbrik edib.