GünAz TV: Liviyada (Libidə) üsyançıların vəziyyəti son günlər və saatlar ərzində xeyli ağırlaşıb.

İndi Qəzzafinin hava, dəniz və quru qüvvələri üsyançıların son istehkamı olan Benqazi üzərinə baş hücuma keçdiklərini deyirlər.

Dünən gün ərzində BMT (Birləşmiş Millətlər Təşkilatı) Təhlükəsizlik Şurasında Liviya üzərində uçuşlarsız zonanın (məntəqə, hərime həvayi) yaradılması barədə gərgin müzakirələr gedib.

Müxbirlər xəbər verirlər ki, Qəzzafi qüvvələrinin hücumları şiddətləndikcə Britaniya və Fransanın təklif etdiyi qətnamənin qəbuluna meyllənənlərin sayı artır.

Amerika Birləşmiş Ştatlarının dövlət katibi Hillari Klinton ümidvar olduğunu bildirib ki, BMT Təhlükəsizlik Şurasıl Liviya üzərində uçuşsuz zona barədə qətnaməni qəbul edəcək.

O deyib ki, qətnamənin qəbulu üçün səsvermə cümə axşamından gec olmayaraq başa çatacaq. Xanım Klinton deyib ki, belə bir tədbirin görülməsi barədə xahişin Ərəb Ölkələri Liqasından (ərəb ittihadiyyəsindən) gəlməsi xüsusi əhəmiyyət kəsb edir.

Bu arada qətnamənin əleyhinə olan Rusiyanın mövqeyində tərpəniş hiss olunur.

Adının çəkilməsini istəməyən bir diplomat isə bildirib ki, Moskva sadəcə olaraq təklənməkdə davam edir.

Rusiya prezidenti Dmitri Medvedev bildirib ki, Liviya üzərində uçuşsuz zona bu ölkənin qonşularının razılığı ilə edilə bilər.

O deyib kİ, uçuşsuz zonaya kimin nəzarət edəcəyi hələ də açıqlanmayıb.

Qətnamə layihəsinin müəlliflərindən Fransa bildirib ki, o, uçuşsuz zonanın tətbiqində birbaşa iştiraka hazırdır və bu barədə xahişin Ərəb Liqasından gəlməsi belə bir tədbirin beynəlxalq legitimliyini (qanuniliyini) təmin edir.

Bu arada BMT Liviyada dərhal atəşkəsə çağırıb. Baş katibin bəyanatını sözçü Martin Nersirki yayıb:

"Baş katib hakimiyyətin hərbi eskalasiyanı artırmasından bərk narahatdır, çünki bu, Benqazi üzərinə hücum niyyətindən xəbər verir. Belə bir böyük şəhərin bombardman edilməsi mülkilərin həyatını risk altına alır. Baş katib tərəfləri dərhal atəşkəsə çağırır və 1970 nömrəli qətnamənin icrasını tələb edir. Mülkilərə qarşı hərbi qüvvə tətbiq edənlər məsuliyyət daşıyacaqlar”.

BMT sözçüsü deyib ki, atəşkəs barədə tələb baş katibin xüsusi elçisi Abdelillah əl Katib tərəfindən Tripolidə (Trablosda) şəxsən Qəzzafiyə təqdim olunub.

Həlledici döyüşlər gedir

Lakin belə tələblərin Liviya liderinə və onun hərbi əməliyyatlarda aktiv rol oynayan oğlu Saifə çətin ki, təsiri olsun.

Bəzi xəbərlərə görə Benqazidəki üsyançılara bir neçə saatlıq möhlət verilib, Qəzzafi isə Rusiya mətbuatına müsahibəsində deyib ki, ölkədəki nəzaərəti tam özünə qaytara bilsə, heç bir siyasi islahat aparmayacaq.

Liviyanın özündə gedən döyüşlərdən isə qarışıq xəbərlər gəlir.

Hökumət qoşunları Benqazi şəhəri istiqamətində hücumu davam etdirir, üsyançılar isə yenidən qruplaşır və yeni müdafiə xətləri qururlar.

Müxalifət koalisyasından Kamal Hüseyfə BBC-yə bildirib ki, üsyançılar Qəzzafi qüvvələrini Benqaziyə buraxmamaq əzmindədirlər.

"Benqzidə böyük müdafiə əməliyyatı başlanıb, - deyir Hüseyfə, - Bizim qüvvələrimiz şəhəri müxtəlif istiqamətlərdən qoruyurlar”.

Kamal Hüzeyfə deyib ki, Qəzzafi qüvvələrinin uğurları barədə xəbərlər xeyli şişirdilib:

"Qəzzafi rejimi belə şayiələr yayır ki, guya onlar bir neçə şəhərə və ərazilərə nəzarət edirlər. Bu həqiqət deyil. Əslində Qəzzafi öz briqadalarlını şəhərlərin ətrafına toplayır, lakin nəzarəti ələ ala bilmir. Onlar nə Misrata, nə Zəviyə, nə də hətta Breqaya girə biliblər. Onlar yalnız ətrafı tutur su və humanitar yardım təchizatını pozurlar”. BBC