GünAz TV: CNN Beynəlxalq İnsan Hüquqları Təşkilatı və İranda müxaliflərə yaxın olan Səhamniyuz saytına istinadən bildirir ki, Mirhüseyn Musəvi, Mehdi Kərrubi və onların həyat yoldaşları öz mənzillərindən naməlum yerə aparılıb.

Bu xəbər barədə açıqlama verən Kərrubinin sözcüsü də xəbərin düz olduğuna dair ehtimal bildirib. Səhamniyuz saytına müsahibə verən Kərrubinin övladlarından biri isə onların başqa bir yerə aparılmasını qəti şəkildə təsdiqləyib. Səhamniyuz saytı Tehran küçələrində də durumun ağır və təhlükəsizlik qüvvələrinun hələ də küçələrdə daimi mövcudluğunu bildirib.

 Kərrubinin oğlu müsahibədə bildirib ki, qonşuların verdiyi məlumata əsasən Cümə axşamı gecə yarısı Kərrubinin mənzilində olanların hamısın təhlükəsizlik qüvvələrinə məxsus olan Vən markalı avtobusla naməlum yerə aparılıb. CNN kanalı da adını çəkməyən İranlı yetkiliyə istinadən bu barədə məlumat verərək bildirib ki, Kərrubi və Musəvi həyat yoldaşları ilə birlikdə hökumət yetkililəri tərəfindən öz mənzillərindən təhlükəsiz bir yerə aparılıb. Bu yetkili bildirib ki, müxalif qüvvələr şəhid ardınca gəzirlər bu səbəbdən müxalif liderlərə heç bir təhlükə və sui-qəsd olmasın deyə onları daha təhlükəsiz yerə aparıblar.

Beynəlxalq İnsan Hüquqları təşkilatı da liderlərin naməlum yerə aparılmasını bildirib və onların sağlığı ilə bağlı öz narahatçılığını ifadə edib. Təşkilatın sözcüsü Aron Rodz bu barədə məlumat verərək bildirib ki, bu 4 nəfər müxalifdən heç bir xəbər yoxdur: “Onları yoxa çıxarıblar. Saxladığı yer barədə məlumat vermirlər. Bu isə İran və beynəlxalq insan hüquqları qanunlarınının kobud şəkildə pozulması deməkdir və adam oğurlama sayılır.” O bildirib ki, İran rəsmiləri və hökumət adamlarının onları edam etmə barədə çağrışları olmuşdu, bunu nəzərə alsaq onlar barədə narahatçılıq duymağa kifayət qədər çox əsas yaranır.

Müxalif liderlərin yoxa çıxması ilə bağlı İranda yaşayan Şiə müctehidlərdən bir neçəsi də bəyanat verərək bu əməli pisləyiblər. Ayətullah Yusifi Sanei, Ayətullah Əli Dəstğeyb və Ayətullah Əsədullah Bəyat hakimiyyətin belə hərəkətlərini və müxalif liderlərin oğurlanmasını sərt tənqid edib və bunu pisləyiblər.

İranın keçmiş prezidenti Məhəmməd Xatəmi də Musəvi və Kərrubinin həyat yoldaşları ilə birlikdə təcrid olunmasını tənqid edib. Xatəmi bildirib ki, “bu 4 insan İslam Respublikasının inkişafı və qurulmasında çox önəmli keçmişə malikdirlər. Onların nizama bağlılığı hamılar üçün məlumdur. Belə insanlar öz evlərində həbs olunub və təcriddə saxlanıla bilərmi?”

Son gönlərdə İran müxalifəti yenidən canlanmağa başlayıb. Hakimiyyətin basqısı da əvvəlkilərdən daha çox hiss olunur. Müxalif liderlərin bir çoxu həbs olunub və həbsxanalara aparılıb. Rəhbərlər isə bir neçə gündür ki, öz evlərində həbs edilib. Lakin son məlumatlar onların da öz evlərindən naməlum yerə aparıldığını göstərir. Müxalif liderlərin həbsinə etiraz olaraq müxalif qruplar iki gün sonra böyük etiraz aksiyası planlaşdırıblar. Bu aksiya həm də Mirhüseyn Musəvinin ad günü ilə eyni vaxtda təsadüf edir. Bütün bunlar gərginliyin artacağı ehtimalını gücləndirir. Araztm