GünAz TV: Uzun müddət mətbuatda görünməyən İran İslam Respublikasının (Cümhuriyyətinin) Ermənistandakı səfiri S.Saqiyan yeni imicdə, qərb düşüncəsində özünü Ermənistan ictimaiyyətinə təqdim etdi.

 "Səfir Saqiyan DQ münaqişəsi tipli münaqişələrin tənzimlənməsində ərazi bütövlüyü prinsipi (ilkə, əsl) ilə xalqların öz müqəddəratını təyinetmə prinsipini bərabər tutub. Eyni zamanda, o, insan azadlığına daha çox üstünlük verdiyini rəsmi Tehran adından belə deyib, Sudanın parçalanmasına gətirib çıxaran referendumu bariz nümunə kimi göstərib. Ən azı, Ermənistan mətbuatı bu barədə məlumat yayıb və indiyədək də təkzib yoxdu".

Bunu isə Milli.Az xəbər portalına Siyasi İnnovasiya və Texnologiya Mərkəzinin direktoru, politoloq Mübariz Əhmədoğlu bildirib.

 "Bu çıxış, rəsmi Tehranın mövqeyində inqilabi dəyişiklikdir. Əgər insan azadlığı, hətta, xalqların öz müqəddəratını müəyyən etmə hüququnadək əsas götürülürsə, demək, İrandakı bəluclar, kürdlər və azərbaycanlılar seçim qarşısındadırlar. Ya onlar sübut etməlidirlər ki, insan deyillər, yox, əgər insandırlarsa, onların da öz müqəddəratlarını azad təyin etmək hüququ var. Çünki rəsmi Tehran belə arzulayır. Əks təqdirdə, səfir Saqiyanın “Amerikanın casusu” kimi danışması Tehranın din xadimlərinin nəzərindən yayınmazdı.  İranın ölkədaxili mətbu orqanları işə düşməli və İran üçün müjdə hesab olunan bu məlumatı onlara çatdırmalıdır" - politoloq əlavə edib.

Mübariz Əhmədoğlunun sözlərinə görə, Dağlıq Qarabağ münaqişəsinin dini xarakterli olması da Azərbaycandan deyil, Ermənistandan asılı məsələdir. Azərbaycanın dini rəhbəri Şeyxülislam Hacı Allahşükür Paşazadənin bəyanatları və addımları bunu dəfələrlə sübut edib. Ermənistan rəhbərliyinin addımları isə onların münaqişəsinin dini xarakterli olmasında maraqlı olduğunu sübut edir.

"Ermənistan prezidenti Serj Sərkisyan Kaliforniyada ermənilərlə görüşündə Ermənistanı cənubda “ən son xristian qalası” adlandırması bunun üçün tutarlı dəlil olsa da, yeganə deyil. Erməni təbliğatı Avropanı Ermənistanın “unikal coğrafi mövqeyi”nin olmasına inandırıb. Heç bir iqtisadi və kommunikativ mahiyyəti olmayan Ermənistanın coğrafi mövqeyi yalnız xristian missionerliyi prizmasından dəyərləndirilə bilər. “Avropanın taleyinin Dağlıq Qarabağda həll olunması” da xristian parametrli ideyalardan biridir. Ermənistan Apostol Kilsəsi orta mövqedən katolisizmə meyllənib. Çünki katoliklərdə dini missionerlik daha güclüdür. “Ermənistan qeyri-xristian dövlətlərin əhatəsində yeganə xristian dövlətdir”- tezisi Ermənistanın dini doktrinasıdır. Katolisizmə görə pravoslavlıq da xristian dini hesab olunmur" - deyə M.Əhmədoğlu qeyd edib.

Politoloqun fikrincə, Ermənistan qonşu Gürcüstan, Türkiyə, Azərbaycan və İran ərazisindəki kilsələri katolik kilsələr kimi Vatikana təqdim etməklə gələcəkdə bu əraziləri dini münaqişə ocağına çevirmək niyyətindədir. Gürcüstan istiqamətində bu proses aktiv aparılır. Avropada dini missionerliyin səviyyəsini göstərən mühüm faktorlardan biri Azərbaycandan aldığı qazın müqabilində belə Avropa Birliyinin Qarabağ məsələsində ədaləti və ya haqqı müdafiə edə bilməməsidir.  

"Səfir S.Ə.Saqiyanın Dağlı Qarabağ münaqişəsinin dinlə əlaqəsinin olmaması ilə bağlı fikirlərinə İranın Ermənistan qarşısında götürdüyü öhdəliyi yerinə yetirmək kimi baxmaq daha düzgündür. İran İslam Konfransı Təşkilatında ermənipərəst, antiazərbaycan təbliğatı aparmağı öhdəlik götürüb. İran İslam Respublikasının Ermənistandakı səfirliyinin və şəxsən səfir S.Saqiyanın Bakıda fəaliyyət göstərən İran İslam Mədəniyyət Mərkəzinin rəhbəri Ocaq Nenejadın kurasiyasında olduğu bizim üçün sirr deyil" - deyə açıqlama verib.