GünAz TV: "Tehranda İranın vasitəçiliyi ilə Ermənistan və Azərbaycan rəhbərləri arasında sənəd imzalaması ilə Şuşa şəhərinin işğalının eyni vaxta düşməsi müxtəlif şübhələrə əsas yaradıb və yaratmaqdadır.

Bu məsələ heç zaman aktiv və ya rəsmi gündəlikdə olmasa da, zaman-zaman yada düşüb". APA-nın məlumatına görə, bunu Siyasi İnnovasiyalar və Texnologiyalar Mərkəzinin rəhbəri, politoloq Mübariz Əhmədoğlu bildirib.

   Politoloqun sözlərinə görə, rəsmi Tehranın Şuşanın işğalında İranın vasitəçiliyinin rolu haqqında son mövqeyi ondan ibarətdir ki, beynəlxalq güclər onun vasitəçiliyini istəməyib, bu missiyaya zərbə vurmaq məqsədi ilə Şuşanın işğalına şərait yaradıblar: "Rəsmi Tehranın bu mövqeyi həqiqətdən uzaq deyil. Amma burada bir neçə məsələ var. Birincisi, Azərbaycan Şuşanı itirib, ikincisi, Azərbaycan Şuşanı İranın vasitəçiliyinə inanaraq itirib, başqa sözlə, Azərbaycan İranın vasitəçilik missiyasından (öhdəliyindən)  əziyyət çəkib, üçüncüsü, Tehran o dövrdə hər hansı addım atmamışdan qabaq addımının yaradacağı effektləri (təsirləri) hesablamalı idi, amma hesablamadı".

   M.Əhmədoğlu bildirib ki, ermənilər Şuşanın işğalının Tehranın vasitəçilik missiyası ilə eyni vaxta düşməsini təsadüfi hesab etmirlər: "Ermənistanın o zamankı prezidenti Levon Ter-Petrosyanın Azərbaycan prezidentinin səlahiyyətlərini icra edən Yaqub Məmmədovla Tehranda görüşünü Ermənistan tərəfindən hazırlayan V.Papazyan Şuşanın işğalı ilə Tehranın vasitəçilik missiyasının əlaqəli olduğunu etiraf etdi. O zaman Ermənistan prezidentinin müşaviri işləyən Papazyan mətbuata açıqlamasında bəyan etdi ki, Şuşanın işğal vaxtı dəyişdirilirdi. Tehrana səfər etməmişdən qabaq prezident Ter-Petrosyandan Papazyan soruşur ki, o, Tehranda olduğu müddətdə Şuşa işğal oluna bilərmi? Ter-Petrosyan "mümkündür" cavabını verir. Şuşa Azərbaycan və Ermənistan rəhbərliyinin Tehran vasitəçiliyi ilə sənəd imzalayan zaman işğal olundu. Sonradan Papazyan İranın o zamankı prezidenti Rəfsəncaniyə Ter-Petrosyan adından məktub aparmaqla vəziyyəti normallaşdırır (Mənbə: http://www.regnum.ru/news/1336881.html). Məktubda nə yazıldığı indi də bəlli deyil".

   Politoloq deyib ki, İran vəziyyətin ciddi təhlili və yaratdığı fəsadın aradan qaldırılması ilə məşğul olmayıb: "Yenicə müstəqillik əldə etmiş, dövlət qurumları sonadək formalaşmamış Azərbaycan Ermənistanın kələyindən xəbər tuta bilməzdi, yalnız ehtimallar irəli sürə bilərdi. 2500 illik dövlətçilik tarixi ilə öyünən İran nəyin baş verəcəyini bilməyə borclu idi. Əgər İran hadisələrin belə gedəcəyini bilməyibsə, bu, onu məsuliyyətdən azad etmir. İkincisi, İran Şuşanı işğalında bilərəkdən iştirak etməməsini bu günədək arqumentli şəkildə (sənədli şəkildə) sübut etməyib.

   Bilərəkdən və ya bilməyərəkdən Şuşanın işğalında İranın rolu şəksizdir. Dağlıq Qarabağ münaqişəsi ilə bağlı Tehranın vasitəçilik prosesi zamanı Ermənistanın rəsmi Tehrana münasibəti hər halda müsbət qiymətləndirilə bilməz. Ermənistan Tehranın vasitəçilik missiyasının əleyhinə olan qüvvələrlə birlikdə rəsmi Tehrana qarşı fəaliyyətdə iştirak edib. Rəsmi Tehran Ermənistanın ona qarşı münasibətinin bu gün də belə məkrli olmadığına zəmanət verə bilməz. İran İslam Respublikası onu rüsvay etmiş, Azərbaycanı isə Şuşasız qoymuş vasitəçilik missiyasından sonra Tehranın vasitəçilik missiyasının iflasa uğramasında iştirak etmiş dövlətlərlə eyni siyasət apardı, Ermənistana dəstək verməyə başladı. Eyni zamanda Ermənistana dəstək verən İran, həm də Azərbaycana təzyiq etməyə başladı".