GünAz TV başqanı Əhməd Obalının fikrincə Azərbaycan dövləti yarandığı gündən İran ona düşmən kimi baxıb.

Rəsmi Tehran növbəti dəfə İrəvanın təminatçısı rolunda çıxış edib. Bu dəfə Ermənistanın neftə olan tələbatının yarısını ödəmək üçün İran bu ölkəyə neft kəməri çəkməyə razılıq verib. Belə ki, bir neçə gün bundan əvvəl İranın xarici işlər naziri kimi rəsmən təsdiqlənmiş Əli Əkbər Salehinin bu postda qəbul etdiyi ilk xarici qonaq Ermənistanın energetika və təbii sərvətlər naziri Armen Movsisyan olub.

Ekspertlər (karşünaslar) hesab edir ki, son dövrlərdə İran və Ermənistan rəsmilərinin qarşılıqlı səfərlərinin müntəzəm şəkildə həyata keçirilməsi İranın məhz Ermənistanı özünə strateji tərəfdaş seçməsinin göstəricisi hesab oluna bilər. Politoloq Rasim Musabəyov məsələyə münasibət bildirərkən deyib ki, əsas reallıq budur ki, ötən il ən intensiv (davamlı = ardıcıl) səfərləri İrana məhz Ermənistan nümayəndələri həyata keçirib: “Spikerdən (parlament sədrindən)  tutmuş Ermənistanın təhlükəsizlik şurasının katibi, xarici işlər, müdafiə naziri səfər edib. Bu onu göstərir ki, bölgədə dildə bir, əməldə tamamilə fərqli siyasət yürüdülür”.

Qeyd edək ki, erməni nazirin səfəri çərçivəsində İran Ermənistanla münasibətləri genişləndirən növbəti bir addım atıb. İrəvan və Tehran İran neft məhsullarının Ermənistana nəql edilməsi üçün nəzərdə tutulan boru kəmərinin tikintisi ilə bağlı razılıq əldə edib. Boru kəməri Təbriz şəhərindən başlayacaq və Ermənistan sərhədinə qədər uzanacaq. Bu, erməni tərəfinə İran neft məhsulları hesabına özünün tələbatının yarısını ödəməyə imkan yaradacaq.

Ekspertlər hesab edir ki, bu, İran iqtisadiyatına heç bir dividend (puan) gətirmir. Odur ki, razılıq sırf siyasi xarakter kəsb edir. İranla Ermənistanın əlaqəsinin birincinin sonuncuya enerji təminatı verdiyini hesab edən Rasim Musabəyov fərqin bu cür olduğunu söyləyib. “Gürcüstandakı olaylar zamanı Ermənistanın bir həftəlik benzin ehtiyatı olduğu məlum oldu. Qaz kəməri kəsilsəydi, ümumiyyətlə, Ermənistan çökə bilərdi. Ancaq indi Təbrizdən Ermənistana uzanacaq boru kəmərinin cüzi də olsa bir əhəmiyyəti var, baxmayaraq ki, bunun İran iqtisadiyyatına 2 qəpiklik xeyri var. Onların neft kəmərini çəkməkdə məqsədləri Ermənistanın neft məhsulları ilə təminatını etibarlı etməkdir”,-deyə politoloq əlavə edib.

GünAz TV başqanı Əhməd Obalının fikrincə isə Azərbaycan dövləti yarandığı gündən İran ona düşmən kimi baxıb. “Strateji cəhətdən Azərbaycanın varlığı İran üçün qəbuledilməzdir. İranla Ermənistan arasındakı dostluq bu siyasətin bir parçasıdır. Onlar Azərbaycana görə dostluq edir, çünki nə ortaq dinləri var, nə də dostluqları. Bu bizi təəccübləndirmir. “Səhər” televiziyası da onun başqa bir nümunəsidir. “Səhər” televiziyası hər gün Azərbaycanın işinə qarışır. Hamısı onun siyasətinin məhsuludur”.

Mütəxəssisin fikrincə, İran Qafqaz bölgəsində Azərbaycanın güclənməsini arzulamır. Azərbaycanın müstəqil və dünyəvi seçimini İran hakimiyyəti özü üçün təhlükə mənbəyi kimi görür. Ermənistanın Azərbaycanla münaqişə vəziyyətində olduğunu nəzərə alsaq, İran rəhbərliyinin İslam təəssübkeşliyindən dəm vurması tamamilə gülünc görünür.

Qaynaq: Ans press