Azərbaycan Milli Azadlıq Təşkilatının

İran İslam Cumhuriyyəti rejiminin kobudcasına müstəqil Azərbaycan Respublikasının daxili işlərinə qarışma cəhdləri ilə bağlı

Güneyli-Quzeyli Azərbaycan Türk Millətinə

MÜRACİƏTİ

     “Iran İslam Cumhuriyyəti rejimi”  30 ili aşqın   iqtidarı dönəmində özünün qoxumuş və çağdışı dəyərlərini islami dəyərlər adı altında ixrac etmək məqsədi ilə heç bir anti-etik, millətlərarası normalara zidd hərəkət və davranışdan çəkinməmişdir. Bu anti-əxlaqi hərəkət və davranışların isə bəşəriyyət və eləcə də həmin dövlətin öz vətəndaşları üçün nə dərəcədə faciəvi nəticələr doğurduğunu bilməyən yoxdur.

      “İran İslam Cumhuriyyəti rejimi”nin İraqın daxili işlərinə qarışması sonucu ortaya çıxan İran-İraq savaşında hər iki tərəfdən milyonlarla insanın həlak olması, yenə həmin rejimin öz ideologiyasını Livana ixrac etmə cəhdləri ilə bu ölkədə çıxan daxili savaşlar, Qəzzə şəridi əhalisinin illərlədir düşdüyü acınacaqlı durum və s. bu çağdışı dövlətin çağımızın insanına yaşatdığı faciələrin sadəcə bir neçə örnəyidir.

      Heç kim üçün sir deyil ki, Azərbaycan Respublikası öz müstəqilliyini elan etdiyi gündən bəri  “İran İslam Cumhuriyyəti rejimi”nin müstəqil dövlətimizə qarşı apardığı təxribat xarakterli fəaliyyətlərin ardı-arası kəsilməmişdir. İran dövlətinin Daş-qalaq, edam, şallaq, qol kəsmək, göz çıxarmaq, qadınlara zorla hicab geydirmək və s. kimi insani və əxlaqi dəyərlərə tamamilə zidd olan bərbəriyyət dövrünün qayda-qanunlarını basqı yolu və əlaltılarının təzyiqi ilə secular-dünyəvi dövlətimizə təhmil etmə cəhdləri bu təxribatların bir örnəyidir.   Bütün bunların isə İslam adı altında gerçəkləşdirilməsi üzsüzlüyün və riyakarlığın artıq son zirvəsidir. Müsəlman Azərbaycan xalqına qarşı savaş açmış, müsəlman Azərbaycan ölkəsinin torpaqlarını işğal etmiş erməni işğalçılarına  hər cür yardımı edən bir dövlətin islamdan danışmağa, kəsinliklə üzü olmamalıdır. Demək ki, əsl mahiyyət  tamamilə başqadır.

      İşğal etdiyi Azərbaycan torpaqlarında 30 milyondan artıq soydaşımızı ən ibtidai insani və milli haqlarından məhrum etmiş “İran dövləti”  Azərbaycan adında müstəqil dövlətimizin müqəddəs varlığını öz  qeyri-məşru varlığı üçün ciddi təhlükə hesab etməkdədir. Azərbaycan Respublikasının gündən-günə öz müstəqilliyini daha da möhkəmləndirməsi və mütərəqqi dünya dövlətləri içərisində daha da sayqın yer edinməsi “İran” rasist-şovinist dövlətinin təşvişini daha da artırmaqdadır.  Məhz buna görə də,  bütün imkanlarını səfərbər edərək Azərbaycan dövlətinin inkişafı qarşısında əngəllər yaratmaq üçün dəridən-qabıqdan çıxır.

      Son günlərdə hicab məsələsinin siyasiləşdirilməsi yönündə “İran dövləti” və bu dövlətin əlaltılarının xüsusi canfəşanlığı birbaşa dünyəvi dövlətçiliyimizin əsas təməllərini hədəf almaqdadır.

      Belə bir şəraitdə biz- Azərbaycan Milli Azadlıq Təşkilatı (AMAT) olaraq:

      -Harada yaşamasından asılı olmayaraq Güneyli-Quzeyli bütün soydaşlarımıza müraciət edərək bəyan edirik ki, siyasi baxışından asılı olmayaraq özünü azərbaycanlı hesab edən hər kəs böyük öndərimiz M.Ə. Rəsulzadənin əmanəti olan  müstəqil secular-dünyəvi dövlətçiliyimizi qorumağı özünün şərəf borcu bilməli və mümkün olan hər vasitə ilə “İran rejimi”nin dəsisələrinə qarşı durmalıdır;

     -Dindar soydaşlarımıza müraciət edərək “İran rejimi”nin din pərdəsi altında yeritdiyi anti-Azərbaycan siyasətinin fərqində olmalarını, bilməyərəkdən bu dövlətin məkrli siyasətlərinin oyuncağına çevrilməmələrini təmənni edirik;

      -Azərbaycan Respublikasının hüquq-mühafizə orqanlarına müraciət edir və “İran dövləti”nin əlaltılarına çevrilmiş vətən xainlərinə qarşı hüquq quralları çərçəvəsində daha ciddi və təsirli addımlar atmalarını tələb edirik.

       Azərbaycan Milli Azadlıq Təşkilatı (AMAT) adına

       Çingiz Göytürk

      30 yanvar 2011-ci il