GünAzTv: Qarabağda müharibə başlayacağı təqdirdə türk generalları döyüşlərin idarə olunmasında iştirak edə bilər.

Türkiyə Silahlı Qüvvələrinin daha bir yüksək rütbəli komandanı Bakıda səfərdədir. Dünən Azərbaycanın müdafiə naziri Səfər Əbiyev Türkiyənin Jandarma Qüvvələrinin baş komandanı, ordu generalı Necdət Özəli qəbul edib. Müdafiə Nazirliyinin mətbuat xidmətindən ANS-ə verilən məlumata görə, görüşdə Türkiyə ilə Azərbaycan arasında mövcud olan qardaşlıq münasibətləri, hərbi-texniki sahədə əməkdaşlığın dinamikası və regiondakı vəziyyət müzakirə olunub.

Məlumata görə, nazir Səfər Əbiyev bildirib ki, Azərbaycanla Türkiyənin siyasi və hərbi əlaqələri ən yüksək səviyyədədir və bundan sonra da bu əlaqələr genişlənməkdə davam edəcək. Ordu generalı Necdət Özəl isə vurğulayıb ki, güc birlikdədir və Türkiyə hər zaman Azərbaycanın yanında olacaq.Türkiyə Azərbaycanın bir nömrəli hərbi müttəfiqidir və bu baxımdan qardaş ölkənin silahlı qüvvələrinin yüksək rütbəli komandanlarının Bakıya vaxtaşırı etdikləri səfərlər adi qarşılana bilər. O da məlumdur ki, Türkiyə Azərbaycana ordu quruculuğunda əvvəllər və indi güclü dəstək verməkdədir. Son vaxtlar isə bu dəstək daha strateji əhəmiyyət kəsb etməyə başlayıb.“Yeni musavat” qəzetinin Redaksiyasına daxil olan bilgilərə görə, Azərbaycan və Türkiyənin generaliteti işğal edilmiş ərazilərin qaytarılması üçün Qarabağda hər an başlaya biləcək hərbi əməliyyatların planlaşdırılması, idarə olunması, habelə hərbi əməliyyatların hansı ssenarilər üzrə inkişaf edə biləcəyi ilə bağlı müzakirələr aparmaqdadır. Bildirilir ki, mümkün hərbi əməliyyatların idarə edilməsi üçün Bakıda türk generallarının da yer alacağı ortaq qərargahın formalaşdırılması imkanları nəzərdən keçirilir. Yerli və beynəlxalq ekspertlərin təhlillərinə görə, Qarabağda başlayacaq ikinci savaş bir neçə ssenari üzrə inkişaf edə bilər. Ən çox ehtimal edilən variant (seçim) qısamüddətli və sürətli hərbi əməliyyatlardır. Lakin müharibənin başlayacağı təqdirdə hadisələrin necə inkişaf edəcəyini bəri başdan müəyyən etmək çətindir. Ekspertlərə görə, hadisələr elə cərəyan edə bilər ki, Türkiyə, Rusiya kimi regional oyunçular da əməliyyatlara qoşula bilər. Ermənistanın Rusiya ilə hərbi müttəfiqlik müqaviləsi var. Türkiyə isə Azərbaycanla bu cür müttəfiqliyə malikdir. Əgər Rusiya hadisələrə müdaxilə etsə və Ermənistana hərbi yardım göstərsə, o zaman Türkiyə də Azərbaycanın tərəfində müharibəyə qoşula bilər. Bu baxımdan Qarabağda başlaya biləcək mümkün hərbi əməliyyatlar zamanı hadisələrin bütün inkişaf ssenarilərinə hazır olmaq lazımdır.Azərbaycan Silahlı Qüvvələri işğal edilmiş ərazilərin azad edilməsi üçün hərbi əməliyyatların bir neçə variantda planını hazırlayıb. Kompyuter variantında olan bu planlar ötən il prezidentin iştirakı ilə Müdafiə Nazirliyində müzakirə edilmişdi. Lakin hadisələrin bütün inkişaf variantları nəzərə alındığı üçün Türkiyə generaliteti də bu planların müzakirəsində yer alır. Strateji müttəfiq kimi Türkiyə Azərbaycanın hərbi planlarını bilməlidir və orada öz rolunu müəyyənləşdirməlidir. Türkiyə generallarının Bakıya müntəzəm səfərlərinə də bu çərçivədə baxmaq lazım gəlir.