GünAzTv: Tunis prezidenti Zeyn ul-Abidin ben Əli yanvarın 14-də ölkəni tərk edib. Bu sensasion xəbəri ölkənin baş naziri Məhəmməd Qənnuşi dünən dövlət televiziyasının efirindən bildirib.

Baş nazir bəyan edib ki, yeni prezident seçkisi keçirilənədək müvəqqəti olaraq dövlət başçısının səlahiyyətlərini öz üzərinə götürüb.    Son bir ayda səngimək bilməyən kütləvi aksiyalarla əlaqədar olaraq ölkə ərazisində fövqəladə vəziyyət elan olunub. Dekabrın 17-dən işsizliyə və korrupsiyaya etiraz olaraq keçirilən mitinqlər bütün Tunisi bürümüşdü. Həmin gün bir nəfər hökumət küçədə lisenziyasız tərəvəz satmağa ona icazə vermədiyinə görə özünü öldürmüşdü. Bunun ardınca bir neçə oxşar intihar baş vermiş və xalq küçələrə çıxmışdı.    İndiyədək iğtişaşlar nəticəsində onlarla insan həlak olub, yüzlərlə şəxs yaralanıb. İnsan haqları fəalları son bir həftədə keçirilən mitinqlərdə polisin 70-ə yaxın adamı öldürdüyünü bildiriblər.    Məhəmməd Qənnuşi televiziya ilə çıxışında hər kəsi Konstitusiyaya əməl etməyə, "birliyə və vətənpərvərliyə" çağırıb. Baş nazir vəd edib ki, Konstitusiyaya əməl edəcək və ölkədə qayda-qanunu bərpa edəcək.    23 il hakimiyyət başında olan prezident ben Əli bir gün əvvəl ölkə televiziyası ilə çıxışında 2014-cü ildə - prezidentlik müddəti bitən kimi hakimiyyədən gedəcəyini, xalqa siyasi və mətbuat azadlığı vəd etmişdi. O, polisə nümayişçilərə qarşı öldürücü güllələrdən istifadə etməmək göstərişi verdiyini, ölkədə əsas ərzaq mallarının qiymətini endirməyi tapşırdığını demişdi. Lakin Tunis prezidentinin vədləri etirazları səngitmədi. Həmkarlar təşkilatları prezidentin vədlərinə inanmayaraq ölkə boyu etiraz aksiyalarına çağırmışdılar. Dünən paytaxtda minlərlə adam toplaşaraq prezidentin dərhal istefasını tələb etmiş, polis isə aksiyanı dağıtmaq üçün gözyaşardan qazdan istifadə etmişdi. Son iki gündə toqquşmalarda 12 nəfərin öldüyü bildirilir (Reuters).    Dünən səhər isə ben Əli hökuməti buraxaraq ölkədə fövqəladə vəziyyət elan etmiş, hərbçilərə nümayişçilərə qarşı silah tətbiq etməyə icazə vermişdi. Prezident həmçinin yaxın 6 ayda erkən parlament seçkilərinin keçiriləcəyini bəyan etmişdi. Lakin sonradan onun qaçdığı məlum oldu.    Nifrət etdikləri ben Əli qaçdıqdan sonra xalq küçələrdə bu qələbəni bayram edir, hər yerdə sadə adamlar hətta hərbçilər və polislərlə qol-boyun dolanmağa başlayıblar.    BMT-nin Baş katibi Pan Gi Mun ölkədə sakitliyi bərpa etməyə və bütün tərəfləri böhranı aradan qaldırmaq üçün danışıqlara dəvət edib.    Xarici KİV-lərin xəbərinə görə, bu arada "əl-Qaidə" terror təşkilatı fürsətdən yararlanmağa çalışır."Əl-Qaidə"nin Şimali Afrika şəbəkəsinin lideri Ebu Musab Abdülvadud tunisliləri korrupsiyaya bulaşmış cinayətkar və totalitar rejimə qarşı mübarizə aparmağa, şəriət rejimi qurmağa çağırıb.    Əlcəzairdəki etiraz aksiyaçılarını da qürurlu və əzmkar sayan Ebu Musab Abdülvadud deyib ki, əlcəzairlilər yalnız prezident Abdülaziz Buteflika hakimiyyətdən uzaqlaşandan sonra istəklərinə çata biləcəklər.    Prezident Zeyn ul-Abidin ben Əlinin hara qaçdığı barədə dəqiq məlumat yoxdur. "Al Jazeera" telekanalı bildirir ki, Tunisdə hakimiyyət hərbçilərin əlinə keçib, ben Əli isə Parisə uçub. Lakin Fransada Tunis prezidentinin Parisə gəlməsi barədə heç kim heç nə bilmir. Nə prezident Nikolya Sarkozinin administrasiyasında , nə də Fransa XİN-də bu barədə məlumat var.    Ben Əlinin qaçmasından sonra Tunisin hava məkanı bağlanıb. Bəzi məlumatlara görə, Tunis-Karfagen beynəlxalq aeroportunda prezidentin ailəsinin bir neçə üzvü təhlükəsizlik orqanları tərəfindən saxlanılıb.    Qeyd edək ki, Tunis turizm ölkəsidir. Fövqəladə vəziyyətin tətbiqi ilə ölkədə bütün uçuşlar dayandırılıb. Bu isə xarici turistləri çətin vəziyyətə salıb.    Bu arada Parisdə mühacirətdə olan müxalifət partiyalarının təmsilçiləri keçid hökumətinin formalaşdırılmasını tələb ediblər. Bununla bağlı Tunis Milli Konqres Partiyası, Kommunist Fəhlə Partiyası və "Ən Nahda" islam hərəkatı birgə bəyanat veriblər. Bəyanatda bildirilir ki, müvəqqəti kabinetin vəzifəsi Tunisdə azad seçkilərin keçirilməsi olmalıdır. Ben Əlinin qatı əleyhdarı və Tunisin siyasi arenasında önə çıxan müxalifət lideri Nəcib Çələbi də hökumətin buraxılmasını tələb edib və baş verənləri "rejimin dəyişməsi" kimi dəyərləndirib.    İlk "WikiLeaks-inqilab    "Foreign Policy" nəşri Tunisdə baş verənləri WikiLeaks ifşaları kontekstində dəyərləndirir. Qeyd edilir ki, saytın üzə çıxardığı Amerika diplomatlarının gizli yazışmalarında ölkədəki mafiya klanları, iyrənc korrupsiyanın detalları haqqında məlumat verilirdi.    Bütün bunlar tunislilər üçün elə də sürpriz deyildi, lakin onların gümanlarını WikiLeaks faktlarla təsdiq edirdi.    Hakimiyyət internetdə sayta girişi bağlasa da, başqa sosial şəbəkələrdən informasiyaların axınının qarşısını ala bilməmişdi.    "Foreign Policy"də çap edilən məqalənin müəllifi yazır ki, WikiLeaks materialları Tunisdəki son hadisələrdə katalizator oldu və narazı xalqla siyasi hakimiyyətin münasibətlərini öz apogey nöqtəsinə çatdırdı.    Qeyd edək ki, Tunisdə keçirilən nümayişlərdə narazı vətəndaşlar deyirdilər ki, yalnız çörək və qarın davasına çıxmayıblar":Biz onun (ben Əlinin) getməsini istəyirik. Bundan sonra nə lazımdırsa, biz onu edəcəyik".    Faktiki olaraq ben Əli xalqın tələbini yerinə yetirdi - ölkəsindən qaçdı...    P.S. Son xəbərlərə görə, Tunis prezidenti Zeyn ul-Abidin ben Əli Liviya lideri Qəzzafinin himayəsi altında Maltaya qaçıb. Qeyri-rəsmi məlumatlara görə, prezidentin xanımı və qızı istisna olmaqla ( onlar ötən ilin dekabrından Qətərdədirlər) bütün ailə üzvləri həbs edilib.  Ekspress