GünAzTv: Obamanın göstərişi ilə Ağ Ev, Konqres binası və bütün federal idarələrdəki dövlət bayraqları yarıya qədər endirilib.Vaşinqtonda ABŞ (Amerika Birləşmiş Ştatları) Konqresinin üzvü Qabrielle Ciffordsa və onu müşayiət edən şəxslərə qarşı təşkil olunmuş silahlı hücumda həlak olan şəxslərin xatirəsi anılıb. ABŞ prezidenti Barak Obamanın göstərişi ilə Ağ Ev, Konqres binası və bütün federal idarələrdəki dövlət bayraqları yarıya qədər endirilib. Prezident Obama, Konqres üzvləri və bir çox sadə amerikalının iştirakı ilə Konqresin önündə anım mərasimi keçirilib. Mərasimdən dərhal sonra Fransa prezidenti Nikola Sarkozi ilə birgə mətbuat konfransında Barak Obama ölkənin verdiyi itkiyə görə sarsıntının yaşandığını deyib: "Bizim hamımız hələ də kədərlənərək baş verən hadisə ilə bağlı şok içindəyik”. Obamanın sözlərinə görə, ailələr itkilərin dəhşətli miqyası üzündən hələ özlərinə gələ bilməyiblər. Qabrielle Ciffords ABŞ prezidentinin yaxın müttəfiqlərindəndir. Hadisədən sonra Qabrielle Ciffords vertolyotla Arizona Universitetinin tibbi mərkəzinə gətirilib. Həkimlər onun həyata qaytarılması barədə ehtiyatlı optimizmlə çıxış edirlər. 40 yaşlı Qabrielle Ciffords «Konqres sizin küçənizdə!» şüarı ilə seçicilərlə mütəmadi görüşürlər keçirirdi. Polisin məlumatına görə, Qabrielle Ciffords daxil olmaqla 13 nəfər yaralanıb. Atəş açan silahın xəzinəsini tam boşaldandan sonra silahı ikinci dəfə dolduranda yaxınlıqdakı şəxslər onu zərərsizləşdirib. Yerli media onun 22 yaşlı Cerad Louqher olduğunu bildirir. O, hazırda həbsdədir. Əyalət şerifi Klarence Dupnik deyib ki, o, çox problemli şəxsdir: «Cinayət vaxtı iki cəsur vətəndaş şübhəlini zərərsizləşdirib. Bu, ağdərilidir, 22 yaşı var. İndi biz onun adını açıqlaya bilmərik. Onun problemli keçmişi olub. Ancaq əmin deyilik ki, o, tək olub. Bəzi məsələlərə görə, o, hadisə yerinə başqa şəxslərlə birlikdə gəlib». Qətli törədən Cerad Louqher internetdə hökumətə qarşı qəzəb və nifrət dolu çıxışları ilə tanınır. Onun orduya yazılmaq istədiyi, ancaq müraciətinin qəbul edilmədiyi də bildirilir. Onun “YouTube” videopaylaşma səhifəsində sevimli kitabları arasında Hitlerin «Mayn Kampf» və Marksla Engelsin «Kommunist manifesti» adlı kitabları da yer alıb. Şerif Dupnik hadisənin motivinin bəlli olmadığını bildirsə də, deyib ki, güman ki, hədəf Qabrielle Ciffords olub. Demokat Qabrielle Ciffords noyabrda Konqresə keçirilmiş seçkilərdə öz yerini çox çətinliklə qoruya bilmişdi. Alyaskanın sabiq qubernatoru, mühafizəkar respublikaçı Sara Peylin istefaya göndərilməli olan şəxslərin siyahısında Qabrielle Ciffordsu birinci sıraya qoymuşdu. O, «Facebook»dakı səhifəsində hadisənin qurbanlarına dəstəyini də ifadə edib. Son məlumatlara görə, başından güllə yarası almış Qabrielle Ciffords süni koma vəziyyətindədir. 22 yaşlı qatilə isə qətllə bağlı ittihamlar təqdim olunub. Lakin prokurorluq tərəfindən ölüm cəzasının istəniləcəyi məsələsi aydın deyil. 13 dəqiqəlik dinləmələr vaxtı qatil çox qısa suallara cavab verib. O, şəxsiyyətini təsdiq edərək, müdafiə vəkilinin təyinatı ilə tanış olub.