GünAzTv: Ordu komandanları prezidentin təşkil etdiyi ziyafətə qatılmayıb, bəs baş nazirin xanımı niyə saraydakı rəsmi qəbulları boykot edir?

Türkiyədə prezident Abdulla Gülün ölkənin milli bayramı - cümhuriyyətin elan edilməsi münasibətilə ötən həftə təşkil etdiyi qəbulda silahlı qüvvələrin komandanlığından heç kim iştirak etməyib. Hərbçilərin bu addımı qəbulda ölkənin birinci xanımı da daxil olmaqla, dini inancları ilə bağlı baş örtüyündən istifadə edən qadınların tədbirdə iştirakı ilə əlaqələndirilir. İndiyədək Abdulla Gül hərbçilərin başı örtülü qadınların yer aldığı məclislərə münasibətini nəzərə alaraq cümhuriyyət bayramı ilə bağlı iki ayrı mərasim təşkil edirdi. Həmin mərasimlərdən birində prezidentin xanımı da daxil olmaqla, başı örtülü qadınlar yer almırdı.

Lakin bu il Gül Çankaya sarayında tək mərasim təşkil edib və bu da müşahidəçilərin fikrində prezidentin ordunun mövqelərinin zəifləməsindən arxayınlaşdığını göstərən əlamət idi. Lakin Abdulla Gülün bu il ənənəni pozaraq, bütün qonaqları bir qəbula dəvət etməsi baş örtüyü ilə bağlı mübahisələri yenidən ön plana çıxarıb. Ankaradakı prezident iqamətgahında təşkil edilən qəbulda ölkədə ənənəvi olaraq xüsusi nüfuza malik olan silahlı qüvvələrdən bir nəfərin belə iştirak etməməsi bu gün mətbuatın əsas müzakirə mövzularından birinə çevrilib.GünAzTv mətbuat mərkəzinin “Yeni musavat”-a istinadən yaydığı məlumata görə, Hərbçilər həmin saatlarda Ankarada silahlı qüvvələrin Baş Qərargah rəisi İşık Koşanerin təşkil etdiyi başqa bir ziyafətdə iştirak ediblər. Baş nazir Rəcəb Tayyib Ərdoğan məsələyə qısaca olaraq “Komandanlar prezident iqamətgahındakı tədbirə gəlməli idilər” sözləri ilə münasibət bildirib. Ancaq bir gün sonrakı çıxışında baş nazir daha sərt danışaraq deyib ki, cümhuriyyət bayramına qatılmayanlar özlərini xalqdan ayrı tuturlar. Müşahidəçilərin fikrincə, Türkiyədə dini dəyərlərə xüsusi önəm verən prezident və hökumətlə özünü dünyəvi dövlət prinsiplərinin keşikçisi hesab edən ordu arasında həmişə mövcud olan ziddiyyətlər ilk dəfə bu qədər açıq şəkildə özünü büruzə verdi. Bu arada, ana müxalifətdəki Cümhuriyyət Xalq Partiyasından da heç kim prezident iqamətgahındakı qəbulda iştirak etməyib. Türkiyənin digər şəhərlərindəki bayram tədbirlərində də baş örtüyü ilə bağlı problemlər yaranıb. Ərzincanda polis evində təşkil edilən bayram ziyafətinə başı örtülü xanımları ilə birlikdə gələn şəhər bələdiyyəsinin sədri və AKP-nin yerli təşkilatının rəhbəri salona daxil ola bilməyiblər. Onlar başqa otaqda bir qədər gözlədikdən sonra məkanı tərk ediblər. Adana şəhərində isə bayram ziyafətində başı örtülü qadınları görən hərbçilər etiraz əlaməti olaraq tədbiri tərk ediblər.Baş nazir Ərdoğan bəyan edir ki, onun partiyası gələnilki seçkilərdə yenidən təkbaşına iqtidar olacaq və baş örtüsü problemini çözəcək. Baş nazir bu məsələnin yeni konstitusiya ilə həllini tapacağını deyib. Lakin o bildirir ki, əgər müxalifət partiyaları dəstək versə, məsələni indiki parlamentdə də həll etmək olardı. Qeyd edək ki, Çankaya sarayındakı ziyafətə gəlməyənlər arasında baş nazirin xanımı Əminə Ərdoğan da var. Lakin Ə.Ərdoğanın prezident sarayındakı rəsmi ziyafəti boykot etməsinin səbəbi generalların gəlməməsi səbəblərindən fərqlidir. Uzun müddətdir ki, mətbuat baş nazirin xanımı ilə prezidentin xanımı Hayrinisə Gül arasında münasibətlərin pis olması barədə yazır. Münasibətlər Abdulla Gülün prezident seçilməsindən sonra korlanıb. Belə güman olunur ki, bunun səbəbi Əminə Ərdoğann ölkənin birinci xanımı olmaq arzusunun baş tutmamasıdır. Türkiyə mətbuatı yazır ki, Əminə Ərdoğan bu günə qədər prezident sarayında keçirilən rəsmi qəbullarda bir dəfə də olsun iştirak etməyib. Baxmayaraq ki, o, belə qəbulların əksəriyyətinə dəvətli olub. Məsələn, Azərbaycan prezidentinin şərəfinə Çankayada təşkil edilən ziyafətə dəvət edilsə də baş nazirin xanımı mərasimə qatılmayıb və Ərdoğan ora tək qatılıb. Əminə Ərdoğan ertəsi gün prezident İlham Əliyev və xanımının şərəfinə baş nazirin iqamətgahında ziyafət təşkil edib.