Günaz.tv Mətbuat Mərkəzinin bu dəfəki müsahibi Hamburq Azərbaycan Mədəniyyət Cəmiyyətinin rəhbəri, fəal diasporçu Azər Rövşəndır.

Azər bəy, Almaniyada yaşayan Azərbaycanlıların təşkilatlanması neçə gedir?

- Etiraf etmək lazımdır ki təşkilatçılıq o qədərdə asand bir iş deyildir, bəzən elə hallar olur ki keçirdiyimiz bir mühüm tədbirə istədiyimiz qədər soydaşımız qatılmır, amma buna rəğmən hər yerdə olduğu kimi vətənpərvər soydaşlarımız tədbirlərə qatılır və eyni zamanda da cəmiyyət olaraqdan çalışırlar ki, Hamburqda yaşayan soydaşlarımız aktivlik sərgiləsinlər.-Konkret olaraq azərbaycan diasporunun problemləri nədən ibarətdir?

- Problem çoxdur. Amma əsas problem odur ki, bizim diaspor başqa millətlərin diasporlarından fərqli olaraq yalnız hakimiyyətə bağlı cəmiyyətlər və yaxud təşkilatlar maddi və mənəvi cəhətdən dəstəklənirlər. Əslində isə buna bənzər halların normal diaspora ilə heç bir əlaqəsi olmamalıdır. Yəni kiminsə siyasi baxışına görə deyil, onun vətəni üçün nə etməsi öndə olmalıdır. Mən belə düşünürəm ki, bu əsas problem həll olunsa başqa bununla bağlı problemlər də öz həllini tapacaqdır...-Hambuqrda nə qədər Azərbaycanlı yaşayır və onlarla əlaqələr hansı səviyyədədir?

-  Bizdə olan məlumata görə Hamburqda 1500-2000 yaxın azərbaycanlı yaşayır, və bunlardan 150-200 nəfəri ilə birgə tədbirə dəvət alanda ancaq görüşmək mümkün olur.-Ümümiyyətlə, bu gün Almaniyada Azərbaycan haqqında təsəvvürlər neçədir?

- Təbiiki biz istərdik ki, almanların bizim vətənimiz haqda müsbət təəssüratlar olsun, ancaq nə edəsən ki, almanların hava limanında sərnişinlərdən "bizi gör" demirlər, və yaxud bir arayış üçün rüşvət almırlar, yada azadlıq istəyən kəsin polis ağzını yummursa, sizcə Bakıda turist olmuş bir alman vətəndaşı bunları və ya buna bənzər hallarla üzləşirsə Azərbaycan haqda təsəvvürləri necə olar?-Almaniyada 3 milyona yaxın türk yaşayır. Türk-Azərbaycan diasporunun birgə yöndə inteqrasiyası görünürmü?

- Biz ümümiyyətlə türk diasporundan hələ çox şey öyrənməliyik. Ona görə ki, Türk diasporu püxtələşmiş, eyni zamanda cox güclü və təşkilatçı fəaliyyəti ilə seçilir. Bunu vurğulamaq istərdim ki, tədbirlərimizə hər zaman Türk cəmiyyətləri özəlliklə Hamburq Atatürk Kültür Mərkəzi dəstək verir, eyni zamanda da bizdə hər zaman qarşılıqlı tədbirlərə qatılırıq və demək olar ki, birgə fəaliyyət göstəririk. Düşünürəm ki, iki qardaş dövlətlərin birgə diaspora çalışmaları daha fayda verər nəinki ayrı-ayrılıqda. -Fəal diasporçu olaraq Güney Azərbaycan məsələsi ilə bağlı baxışlarınızı bilmək maraqlı olardı.

-Güneydə yaşayan 35 milyon bacı və qardaşlarımızın durumları acınacaqlı olmaqda davam edir. Milli fəalların bir çoxları həbs edilir, edam olunurlar. Təbiiki məndə millətimin orada insan haqlarına haykırı olan bir diktator rejimlə mücadiləsini dəstəkləyirəm və düşünürəm ki, hər bir vətənpərvər övladımız bu mücadiləyə qoşulmalı, və əlindən gələni etməlidir ki, bu gün Güney Azərbaycanda azadlıq günəşi doğsun... -Bir qədər də gələcək planlarınız haqqında danışardınız.

- Səmimi olaraq demək istərdim ki, Vətəni işğal olmuş bir şəxs kimi gələcək planlar haqda nə isə demək doğrusu düz olmaz. Yalnız bircə onu deyə bilərəm ki, artıq zamanı çoxdan gəlib çatıb ki, erməni qəsbkarların işğal etdikləri əzəli torpaqlarımızı geri alaq, eləcədə bir millət olaraqdan, var olduğumuzu bütün xalqlara subut edək. Əks halda nəinki gələcək planlar qurmağa, hətta yaşamağa belə mənəvi haqqımız yoxdur... 

-Təşəkkür edirik suallarımızı cavablandırdığınız üçün və gələcək işlərinizdə uğurlar arzu edirik. 

- Mən Güney Azərbaycan Televiziyasına öz təşəkkürümü çatdırıram ki, xalqımızın haqq səsinin dünya ictimaiyyətinə çatdırılmasında  mühüm rol oynayır. Sizə bütövləşmə yolunda apardığınız milli mücadilədə yorulmazlıq arzu edirəm.

Söhbətləşdi: Elnur Eltürk