GünAzTv: Dünən 2011-ci il dövlət büdcəsi haqqında qanun layihəsi Milli Məclis üzvləri tərəfindən 104 nəfər lehinə və 5 həfər isə əleyhinə olmaqla qəbul edilib.

Beləliklə, 2011-ci il üçün dövlət büdcəsinin gəlirləri 12 mlrd. 61 milyon manat, xərcləri 12 mlrd. 748 milyon manat nəzərdə tutulur. Cari ilin dövlət büdcəsi ilə müqayisədə 2011-ci ilin büdcəsində gəlirlər 4,7% və ya 556 mln. manat, xərclər isə 3,8% və ya 493 mln. manat daha çoxdur. Büdcə kəsirinin isə 2010-cu illə müqayisədə 11,1% və ya 85 mln. manat çox olacağı gözlənilir. Gələn ilin icmal büdcəsinin gəlirləri 15 milyard 558 milyon manat, xərcləri isə 15 milyard 129 milyon manat həcmində müəyyən edilib.

Səhmlərində dövlətin payı olan müəssisələrdən alınan dividendlər 17,3 dəfə artırılacaq

Növbəti ilin dövlət büdcəsinin mərkəzləşdirilmiş gəlirləri 11 mlrd. 613,9 mln. manat və ya 96,2%, yerli gəlirləri isə 447,04 mln. manat və ya 3,8% həddində nəzərdə tutulub. Müqayisə üçün bildirək ki, cari ildə yerli gəlirlərin ümumi büdcə gəlirlərindəki payının 4,6%-ə bərabər olacağı gözlənilir. 2011-ci il dövlət büdcəsinin gəlirləri əksər mədaxil mənbələri üzrə artıb. 2010-cu illə müqayisədə gələn il ölkə ərazisinə malların idxalına görə aksiz, hüquqi şəxslərin torpaq, yol və mədən vergilərində cüzi azalmanın olacağı bildirilir. Digər mədaxil mənbələri üzrə isə artımların olacağı gözlənilir. Fiziki şəxslərin gəlir vergisi 690 mln. manat, hüquqi şəxslərin mənfəət (gəlir) vergisi 210 mln. manat, əlavə dəyər vergisi 2 mlrd. 121,6 mln. manat, malların idxalına görə əlavə dəyər vergisi 818 mln. manat, aksiz vergisi isə 495 mln. manat həcmində nəzərtdə tutulub. Ən böyük artım isə səhmlərində dövlətin payı olan müəssisələrdən alınan dividendlər üzrə olacaq. Cari ildə bu mənbə üzrə büdcəyə 80 min manatın daxil olması nəzərdə tutulmuşdursa, 2011-ci ildə bu göstərici 17,3 dəfə artaraq 1 milyon 380 min manata yüksələcək. Ən böyük artım isə heç şübhəsiz ki, Dövlət Neft Fondundan ayrılan transferlərdə olacaq. Fonddan daxilolmalar 6 mlrd. 480 mln. manat həcmində nəzərdə tutulur ki, bu da ümumi büdcə daxilomalarının 53,7%-ni təşkil edir. Məlumat üçün qeyd edək ki, cari ilin dövlət büdcəsində Neft Fondunun payı 5 mlrd. 915 mln. manata bərabərdir ki, bu da, ümumi büdcə daxilomalarının 48,1%-i həddindədir.

Naxçıvan Muxtar Respublikası

qazandığı qədər xərcləyəcək

Xərclərin istiqamətlərinə gəlincə, büdcənin mərkəzləşdirilmiş xərcləri 11 mlrd. 440,4 mln. manat və ya 89,8%, yerli xərcləri 1 mlrd. 307,5 mln. manat və ya 10,2% həddində nəzərdə tutulub. Gələn il dövlət büdcəsindən ölkənin müdafiə xərcləri üçün 1 mlrd. 325 mln. manat vəsaitin ayrılacağı gözlənilir. Təhsil üçün ayrılacaq vəsaitin məbləği 1 mlrd. 338 mln. manat olacaq. Bundan başqa növbəti ilin dövlət büdcəsində səhiyyə xərcləri 545 mln. manat, sosial müdafiə və sosial təminat xərcləri isə 1 mlrd. 324 mln. manat olacaq. Məlumat üçün qeyd edək ki, cari ilin büdcəsində xərclərin bütün istiqamətlərdə artırılacağı gözlənilir. Naxçıvan Muxtar Respublikasının xərcləri isə (həm də gəlirləri) 393 mln. manat həcmində nəzərdə tutulub. Onu da əlavə edək ki, dünən millət vəkillərinin qarşısında çıxış edən maliyyə naziri Samir Şərifov bildirib ki, qanun layihəsinə Milli Məclisdəki müzakirələrdən sonra bir-sıra əlavələr edilib: “Milli Məclisdəki iradları nəzərə alaraq xərclərə əlavə olaraq 440 min manat, Dövlət Baytarlıq Xidmətinə dərman preparatlarının alınması və epizotik tədbirlər üçün əlavə 500 min manat və  Naxçıvan Muxtar Respublikasına dövlət büdcəsinin digər xərcləri çərçivəsində dotasiya şəklində 2,1 mln. manat ayrılıb”.