GünAzTv: Ermənistan prezidenti “Pzo” ləqəbli kriminal avtoriteti təyyarənin trapı önündə şəxsən qarşılayıb, FTB erməni mafiozların pullarını axtarmaq üçün İrəvana qrup göndərir.

ABŞ-da həbs edilmiş erməni cinayətkar qruplaşmasının Ermənistan hakimiyyəti ilə yeni əlaqələri üzə çıxıb. Ermənistan mətbuatının yazdığına görə, mafiyanın “xaç atası” olan keçmiş Bakı ermənisi, “Pzo” ləqəbli Armen Kazaryan nəinki prezident Serj Sərkisyanın qardaşı Aleksandr Sərkisyanla, o cümlədən onun özü ilə yaxın münasibətlərdə olub.

Hətta məlum olub ki, vaxtilə Serj Sərkisyan İrəvana gələn “Pzo”nu İrəvan aeroportunda, təyyarənin trapı önündə şəxsən qarşılayıb. Xəbər verildiyi kimi, Amerika xüsusi xidmət orqanları tərəfindən ifşa olunan erməni mafiyası yaşlılara pulsuz tibbi xidməti nəzərdə tutan hökumət proqramına yönələn misli görünməmiş maxinasiya qurub. Mafiyanın dövlətə yüz milyonlarla dollar ziyan vurduğu bildirilir.Cinayətkarlar pulu hökumətdən mövcud olmayan 100-dən çox tibbi klinikanı idarə etməklə, saxta müraciətlər göndərməklə və digər fırıldaq üsulları ilə  qoparıblar. Federal Təhqiqatlar Bürosu (FTB) bəyan edib ki, banda yaradıcılarının - 35 yaşlı Davit Mirzoyan və 36 yaşlı Robert Tercanyanın şərəfinə “Mirzoyan-Tercanyan qruplaşması” adlandırılır.Lakin mafiyanın “xaç atası” 46 yaşlı keçmiş Bakı ermənisi, ittiham sənədlərində “vor zakon” kimi göstərilən Armen Kazaryandır. Kazaryan 1996-cı ildə ABŞ-a köçüb, tez-tez Ermənistan və Azərbaycana səfər etməsinə baxmayaraq qaçqın statusu alıb.Amerikada ifşa edilən erməni mafiyası Ermənistanda ciddi qalmaqala səbəb olub. Məlum olub ki, mafiya üzvlərinin, o cümlədən onun liderinin hakimiyyətlə sıx əlaqələri var. Mətbuat “Pzo”nun prezident Serj Sərkisyanın “Saşik” ləqəbli, zəngin kriminal bioqrafiyaya malik qardaşının Amerikadakı biznesini himayə etdiyini, onunla yaxın dost olduğunu və dəfələrlə Ermənistana gələrək yüksək rütbəli hakimiyyət təmsilçiləri ilə görüşdüyünü yazıb. O da məlum olub ki, “Pzo” keçmiş prezident Robert Köçəryanın oğlunun toyunda da iştirak edib və olduqca bahalı hədiyyələr gətirib. “Qraparak” qəzeti yazır ki, “Pzo” sonuncu dəfə Ermənistanda bu ilin yayında olub. Bildirilir ki, kriminal avtoritet Ermənistanın hakim Respublika Partiyasından deputat Levon Sərkisyanla birlikdə Sevan gölünün sahilində əylənib. İrəvana geri qayıdarkən “QAİ” postlarından birində polislər “Pzo”nun və Sərkisyanın şərəfinə stol açıblar. Lakin sərxoş halda olan Kazaryan polislərin açdığı stolu bəyənməyib və onların ünvanına nalayiq ifadələr işlədib. Levon məcbur olub ki, polislərdən üzr istəsin, həmçinin deputat onların cibinə bir qalaq yüzlük dollar da basıb.“Aykakan jamanax” qəzeti isə yazır ki, tezliklə ABŞ FTB-nin 15 nəfərdən ibarət təhqiqat qrupu İrəvana gələcək və mafiyanın əlaqələrini araşdıracaq. Bildirilir ki, FTB-ni xüsusən mafiyanın fırıldaq yolu ilə ələ keçirdiyi pulları hara sərf etdiyi maraqlandırır. Gözlənilir ki, Amerika xəfiyyələri bu təhqiqat çərçivəsində “Pzo”nun hakimiyyət nümayəndələri, o cümlədən Sərkisyan və qardaşı ilə əlaqələrini də araşdıracaq.Qəzet Sərkisyanın Kazaryanla münasibətləri haqda daha bir maraqlı faktı açıqlayaraq yazır ki, “Pzo” 2000-ci ildə İrəvana gələrkən o vaxt prezident Robert Köçəryanın aparat rəhbəri olan indiki dövlət başçısı onu təyyarənin trapı önündə şəxsən qarşılayıb. Lakin tezliklə Köçəryanın əmri ilə “Pzo”nu həbs ediblər. O vaxt S.Sərkisyan kriminal avtoritetin azadlığa buraxılması üçün şəxsən Köçəryandan xahiş edib.Lakin məsələni ancaq Ermənistanın keçmiş baş naziri olan Vazgen Sərkisyanın döyüş yoldaşlarından birinin müraciətindən sonra yoluna qoymaq mümkün olub. “Pzo”nu bu şərtlə azad ediblər ki, bir daha Ermənistana qayıtmasın. Qəzet bu hadisə ilə bağlı baş nazir Sərkisyanın qardaşı Aram Sərkisyana müraciət edib, lakin o məsələni şərh etmək istəməyib.Qeyd edək ki, Ermənistan rəsmiləri prezidentin və digərlərinin “Pzo” ilə əlaqələrini təkzib edir, ancaq bildirilir ki, Amerika hüquq-mühafizə orqanlarına mafiyanın fəaliyyətini araşdırmaqda əməkdaşlıq ediləcək. Yeni musavat