GünAzTv: İran İslam Respublikasının prezidenti Mahmud Əhmedinejadın Livan səfərində “Hizbullah”ın təmsil etdiyi şiələrə ünvanlanan çıxışı şiə əhaliyə sahib ərəb ölkələrində narahatlıq yaradıb. İran prezidentinin Livan səfərindən sonra Orta Şərqdə qarışıqlıq yaranıb. Bu barədə SİA “Hürriyet”ə istinadən xəbər yayıb.

M.Əhmədinejadın Cənubi Livan səfərinin “Hizbullah” tərəfindən planlaşdırıldığını yazan qəzetə görə, qarışıqlığın səbəbi hər vaxt olduğu kimi İsrail deyil: “Əksinə, İsrailin əsas düşməni İrandır. Qarışıqlıq Əhmedinejadın nitqində söylədiklərindən daha çox müraciət etdiyi kütlənin kimliyi baxımından əhəmiyyət daşıyır. Cənubi Livana gedən İran dövlət başçısı burada Livandakı şiələrə müraciət etdi. Təbii ki, bu vəziyyət rəhbərləri sünni ərəb olan, ancaq əhalinin bir hissəsi şiə ərəb olan ölkələri narahat edib. Ərəb ölkələri Əhmedinejadın Livan səfərindən sonra ortaya çıxacaq iki təhlükədən çəkinir. Bunlardan birincisi İranın iraqlı şiələr üzərindəki təsirini artırma təhlükəsidir. İraqla bağlı narahatlıq bu ölkədə hökumətin kim tərəfindən qurulacağının hələ müəyyən olunmamasıdır. İraqı seçkiyə aparan, özü də şiə olan baş nazir Nuru Əl-Maliki ABŞ və Qərb əleyhdarı İrana yaxın şiə qrupların dəstəyini alaraq yeni hökuməti də qurmaq istəyir”.

Qəzetin yazdığına görə, İraqda sünni qruplarının dəstəyi ilə seçkilərdə böyük müvəffəqiyyət qazanan dünyəvi şiələrin nümayəndəsi İyad Allavi isə Malikinin yenidən iqtidara gələcəyi təqdirdə İranın İraq üzərindəki təsirinin xeyli artacağını söyləyərək hökuməti özünün qurmasının lazım olduğunu irəli sürür. Bildirilir ki, İraqın üzərində İran təsirinin artması açıq şəkildə büruzə verilməsə də Türkiyəni də narahat edir.

“Hürriyet”ə görə, Orta Şərqdə ərəb ölkələri arasında qurulacaq sıx diplomatik əlaqələrin bir hissəsi də İraqda qurulacaq yeni hökumətlə bağlıdır. İordaniya kralı II Abdullah İraq baş naziri Malikini keçən həftə sonu qəbul etdi. Maliki İordaniyadan dəstək istədi, ancaq İordaniya kralı mühafizəkar və İran tərəfdarı şiələrin dəstəyini alan Malikiyə dəstək vermədi. Malikinin qarşıdakı həftədə Ankaraya səfər etməsi və yeni hökumətlə bağlı dəstək istəməsi gözlənilir”.

Ərəb ölkələrinə görə, ikinci təhlükənin isə Səudiyyə Ərəbistanı, Qətər, Küveyt kimi şiə azlığına sahib ölkələrdə şiələri rəhbərlik əleyhinə hərəkətə keçmə ehtimalının olduğu bildirilir: “Bu məsələdə ən böyük narahatlığı Səudiyyə Ərəbistanı yaşayır. Necə ki, bu məsələdə sıx diplomatik danışıqlara ev sahibliyi edir. Suriya dövlət başçısı Bəşər Əsəd bu həftə Riyadda Səudiyyə Kralı Abdullah bin Əbdüləziz tərəfindən qəbul ediləcək. Görüşdə başlıca olaraq Livanda “Hizbullah” ilə Livan baş naziri Saad Əl Həriri arasındakı anlaşılmazlıqlar müzakirə olunacaq. Səudiyyə Ərəbistanı baş naziri dəstəklədiyi halda, Suriya “Hizbullah”a daha yaxın bir mövqe sərgiləyir. Səudiyyə kralı Suriya prezidenti Əsədi Həririyə dəstək üçün razı salmağa çalışacaq”.

Suriya prezidentinin Səudiyyə Ərəbistanında olduğu vaxt Livan baş nazirinin ik günlük Səudiyyə Ərəbistanında olacağı bildirilir. Deyilənə görə, kral Abdullah ilə Bəşər Əsəd danışıqları müsbət nəticələnərsə Həriri danışıqlara daxil edilə bilər.