Amerika və Ukrayna danışıqlarının detalları məlum oldu

SON XƏBƏRLƏR

Amerika və Ukrayna danışıqlarının detalları məlum oldu

2025.03.12, 11:24

"Fox News"un jurnalisti Nana Sadjaya danışıqlarda iştirak edən mənbəyə istinadən danışıqların detalları ilə bağlı məlumat paylaşıb.

Gunaz.tv

Ukrayna prezidenti seçkilərinin keçirilməsi və ya Volodimir Zelenskinin istefası Ciddədə keçirilən Amerika və Ukrayna nümayəndələrinin danışıqlarında müzakirə olunmayıb.

"Amerika və Ukrayna arasında aparılan danışıqlarda birbaşa iştirak edən mənbə mənə bildirdi ki, nə prezident seçkilərinin keçirilməsi, nə də Zelenskinin istefası Ciddədə müzakirə olunmayıb", - deyə o, "X" sosial şəbəkəsində yazıb.

Görüşdən sonra Ukrayna Amerikanın 30 günlük atəşkəs təklifi ilə razılaşıb. Lakin bunun üçün əsas şərt Rusiyanın da eyni anda və eyni şərtlərlə bu tələbi qəbul etməsi və yerinə yetirməsidir. Bundan əlavə, Vaşinqton hərbi təchizat və kəşfiyyat məlumatlarının mübadiləsini bərpa edəcəyinə söz verib. Kiyev hərbi yardımı bərpa etdiyini elan edib.

Danışıqlarda iştirak edən prezidentin milli təhlükəsizlik üzrə müşaviri Mayk Uolts bildirib ki, Amerika yaxın vaxtlarda Rusiya tərəfi ilə bunu müzakirə etmək niyyətindədir. Amerika prezidenti Donald Tramp isə bu gün və sabah Moskva və Vaşinqton nümayəndələrinin yeni görüşlərinin keçiriləcəyini açıqlayıb. O, həmçinin bu həftə Rusiya prezidenti Vladimir Putinə zəng etməyi planlaşdırdığını bəyan edib. Amerika dövlət katibi Marko Rubio isə açıqlamasında bildirib ki, top hazırda Rusiyanın meydanındadır.

“Biz onlara deyəcəyik ki, masanın üstündə olan budur. Ukrayna atəşi dayandırmağa və danışmağa hazırdır. İndi hə və ya yox demək onların öz qərarıdır. Əgər onlar yox desələr, onda təəssüf ki, burada sülhə mane olanın kim olduğunu anlayacağıq." - Marko Rubio əlavə edib.

Amerikanın milli təhlükəsizlik müşaviri Mike Waltz əlavə etdi: "Ukrayna nümayəndə heyəti bu gün çox aydın bir şey söylədi: onlar prezident Trampın sülhə dair baxışlarını bölüşürlər".

Zelenski Telegram-da Ukraynanın “sülhə hazır olduğunu” və indi Rusiyanı inandırmağın Amerikanın üzərinə düşdüyünü bildirib. “Ukrayna sülhə hazırdır. Rusiya müharibəni bitirməyə və ya müharibəni davam etdirməyə hazır olduğunu nümayiş etdirməlidir. Tam həqiqətin vaxtıdır”, - deyə Zelenski bildirib.

Şahin Elxanoğlu

GUNAZ.TV

SON XƏBƏRLƏR