Contact Us

SON XƏBƏRLƏR

MOSKVA “İFLİC” OLUB

2025.05.07, 15:44
MOSKVA “İFLİC” OLUB

9 may yaxınlaşdıqca Moskvada vəziyyət daha da gərginləşir. Bir tərəfdən Ukrayna PUA-larının hücumu, digər tərəfdən parada hazırlıq və bununla bağlı görülən təhlükəsizlik tədbirləri şəhəri az qala iflic vəziyyətə gətirib.

Gunaz.tv

GünazTV “AzPolitika”-ya istinadla xəbər verir ki, Moskvaya PUA hücumları nəticəsində Rusiya hava limanlarında vəziyyət durmadan pisləşir. Bəzi reyslər artıq 15 saatdan çox gecikib, onlarla təyyarə havaya qalxmaq üçün növbə gözləyir, sərnişinlər terminallarda yatırlar.

Məsələn, Antalya-Moskva reysi ilə uçan sərnişinlər enişdən sonra 7 saat Pulkovo hava limanında təyyarədə qalıblar. Onların təyyarədən çıxmasına icazə verilməyib. Daşkənd və Çelyabinskdən gələn sərnişinlər isə gecəni təyyarələrdə keçirib, oradan hava limanına getməyə icazə verilməyib.

Ümumilikdə Ukrayna PUA-larının Rusiyadakı hərbi və sənaye obyektlərinə hücumları səbəbindən Moskva hava limanlarında 140-dan çox reys təxirə salınıb. Təxminən 8,5 min sərnişin nə yola düşə, nə də Moskvaya gələ bilib. Bəzi reyslərin marşrutu Sankt-Peterburq, Kazan, Nijni Novqorod və digər şəhərlərə dəyişdirilib ki, bu da hava limanlarının həddən artıq yüklənməsinə səbəb olub. Pulkovoda isə əsl mənada təyyarələrin tıxacı yaranıb.

Hücum təhlükəsi səbəbindən Şeremetyevo, Domodedovo, Vnukovo və Jukovski hava limanları dəfələrlə fəaliyyətini dayandırıb. Şeremetyevo mayın 7-nə keçən gecə iki dəfə bağlanıb: səhər 01:00-dan 04:07-dək və 04:25-dən 05:30-a qədər. Kazan, Nijnekamsk, Kirov və digər şəhərlərin hava limanlarında da məhdudiyyətlər tətbiq edilib. Nəticədə mayın 6-sı və 7-də Rusiyanın Mərkəzi bölgəsində 14 hava limanı müvəqqəti olaraq fəaliyyətini dayandırıb və bu, xaosa səbəb olub. Sərnişinlər hava yollarından, saatlarla gözləmələrdən, yemək, su və gecələmə üçün yerlə təmin olunmamalarından şikayət ediblər. Şeremetyevo və Vnukovoda məlumat masalarında böyük növbələr yaranıb, Vnukovoda 50-yə yaxın reys ləğv edilib.

“Aeroflot” Moskvadan 52, paytaxta isə 54 reysin ləğv edildiyini, habelə gecikmələr və alternativ aerodromlara uçuşların istiqamətinin dəyişdirildiyini bildirib. “Rossiya Hava Yolları” və “Pobeda” da reyslərin ləğvini açıqlayıb.

Həmçinin, bu gün səhər tezdən Moskvada çatdırılma xidmətləri işləmir, mobil internetdə, bankomatlarda fasilələr var, sakinlər nə taksi çağıra, nə də yemək sifariş edə bilirlər, bir sıra mağazalar yalnız nağd pul qəbul edir. Səbəb Qələbə Paradının məşqləri və PUA hücumu təhlükəsidir. Hələlik vəziyyətin sabitləşdiyi barədə hər hansı məlumat verilmir.

 

 

Ş.E

Açar Sözlər :

SEÇİLMİŞ XƏBƏRLƏR

Çox oxunanlar