Banklar iflas astanasında; xalq etirazları ilə eyni vaxtda İranda maliyyə böhranı partlayış nöqtəsinə çatdı

SON XƏBƏRLƏR

Banklar iflas astanasında; xalq etirazları ilə eyni vaxtda İranda maliyyə böhranı partlayış nöqtəsinə çatdı

2026.01.16, 00:00

Gunaz.tv

İranın bank sisteminin vəziyyəti ilə bağlı yayımlanan son məlumatlar bir neçə bankın faktiki olaraq iflas mərhələsinə daxil olduğunu göstərir. Qiymətləndirmələrə görə, İranın üç ən böyük bankından biri sayılan və Sepah ilə ordunun əsas maliyyə təminatçısı olan Bank Sepəh öhdəliklərini yerinə yetirmək qabiliyyətini itirib. Eyni zamanda, ən azı daha dörd böyük bankın da oxşar durumda olduğu bildirilir.

“Wall Street Journal” qəzetinin yazdığına görə, İran Mərkəzi Bankı bu bankların tam çöküşünün qarşısını almaq üçün pul emissiyasına əl atmağa məcbur qalıb. İqtisadçılar isə bu addımın inflyasiyanı sürətləndirəcəyi və iqtisadi böhranı daha da dərinləşdirəcəyi barədə xəbərdarlıq edirlər. Hesabatda ötən payızda “Bank Ayənde”in iflası və ləğvi İran hakimiyyətinin iqtisadi çökməsinin açıq göstəricilərindən biri və 2026-ci ilin Yanvar ayında baş verən ümumölkə etirazlarının əsas zəminlərindən biri kimi qiymətləndirilir.

Qəzet yazır ki, hakimiyyətə yaxın şəxslər tərəfindən idarə olunan Bank Ayənde gecikmiş kreditlər səbəbilə təxminən 5 milyard dollar zərərlə üzləşmiş və faktiki olaraq müflis vəziyyətə düşmüşdü. Beynəlxalq Valyuta Fondunun Yaxın Şərq və Mərkəzi Asiya üzrə keçmiş rəsmisi Ədnan Məzərinin sözlərinə görə, bu hadisə hakimiyyətin legitimliyini itirmə prosesini daha da sürətləndirib.

İqtisadçıların fikrincə, mövcud maliyyə böhranı illərlə davam edən yanlış idarəetmə, artan beynəlxalq sanksiyalar, ötən il İsraillə baş verən müharibənin nəticələri və bank sisteminin siyasi-hərbi maraqlar naminə alətə çevrilməsinin birbaşa nəticəsidir.

Bu kontekstdə Demokratiyaların Müdafiəsi Fondunun aparıcı tədqiqatçısı Riçard Qoldberq İran banklarının “son dərəcə kövrək və riskli” vəziyyətdə olduğunu və tam çöküş astanasına yaxınlaşdığını bildirib.

Eyni zamanda ABŞ-ın maliyyə naziri İran hakimiyyətinin rəhbər şəxslərinin ölkədən milyonlarla dollar çıxardığını açıqladı. Bu isə İran iqtisadiyyatının gələcəyinə dair rejimin daxilində hökm sürən dərin etimadsızlığın daha bir göstəricisi kimi dəyərləndirilir.

Müşahidəçilər vurğulayırlar ki, davam edən etirazların aqibətindən asılı olmayaraq, daxili maliyyə böhranı və xarici təzyiqlər yaxın perspektivdə də İran hakimiyyəti üçün ən ciddi və həll olunmamış problemlərdən biri olaraq qalacaq.

GünazTV

GUNAZ.TV

SON XƏBƏRLƏR