Tramp İrana xəbərdarlıq etdi- Yer üzündən silərik!

SON XƏBƏRLƏR

Tramp İrana xəbərdarlıq etdi- Yer üzündən silərik!

2026.01.21, 11:19

ABŞ Prezidenti Donald Tramp İrana qarşı təhdidlər səsləndirib və özünün həyatı təhlükədə olarsa, bütün ölkəni yer üzündən siləcəyinə söz verib.

Gunaz.tv

Bu barədə Tramp “NewsNation” telekanalının aparıcısının İranın ABŞ prezidentini təhdid etməsi iddiasını şərh edərkən bildirib.

“Əgər nəsə baş verərsə, bütün ölkə havaya uçacaq. Mənim çox aydın təlimatlarım var - əgər bir şey baş verərsə, onlar Yer üzündən silinəcəklər”, - deyə o qeyd edib.

ABŞ lideri, həmçinin sələfi Co Baydeni Tehrana qarşı kifayət qədər sərt siyasət yürütməməkdə ittiham edib.

“Biz həmişə təəccüblənirdik ki, Bayden niyə heç nə demir? Əgər mən o vaxtlar burada (Ağ Evdə) olsaydım və onlar kimisə, hətta prezidenti də deyil, sadəcə, kimisə, məni etdikləri kimi, təhdid etsəydilər, mən mütləq onlara olduqca güclü zərbə vurardım”, - deyə Donald Tramp bəyan edib.

Qeyd edək ki, ötən həftə İran Məclisinin (birpalatalı parlament) sədri Məhəmməd Baqer Qalibaf bildirib ki, əgər Tramp İslam Respublikasına hücum etmək qərarına gələrsə, İran ona “unudulmaz dərs” verməyə hazırdır.

Tehran rəsmiləri ilə ABŞ prezidenti arasında gərginlik İrandakı etirazlarla əlaqədar daha da artıb.

Belə ki, 2025-ci il dekabrın 28-də Tehranda İran pulunun kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İnsan haqları təşkilatlarının bildirdiyinə görə, aksiyalar zamanı minlərlə etirazçı öldürülüb, on minlərlə insan yaralanıb və 30 minə yaxın şəxs həbs edilib.

Aksiyaların səngiməsindən sonra isə təhlükəsizlik məmurları repressiya dalğasının yeni mərhələsini başladıb və etirazlar baş verən bölgələrdə genişmiqyaslı həbslər həyata keçirməyə başlayıblar.

GünazTV

GUNAZ.TV

SON XƏBƏRLƏR