Contact Us

SON XƏBƏRLƏR

Tehran ABŞ-ın dondurulmuş aktivlərlə bağlı planı barədə xəbərlərə etiraz edir

2026.06.10, 08:46
Tehran ABŞ-ın dondurulmuş aktivlərlə bağlı planı barədə xəbərlərə etiraz edir

Vaşinqtonun dondurulmuş İran aktivlərindən Körfəz müttəfiqlərinə kompensasiya ödəmək üçün istifadə etməyi nəzərdən keçirdiyi barədə xəbərlər Tehranda etirazlara səbəb olub.

Gunaz.tv

"Reuters" agentliyi məsələ ilə tanış mənbəyə istinadən xəbər verib ki, Vaşinqton İranın hücumları nəticəsində gələcəkdə yarana biləcək zərərlərin ödənilməsinə kömək etmək məqsədilə dondurulmuş İran aktivlərini Ərəb körfəzi ölkələrindəki tərəfdaşlarının istifadəsinə verməyi nəzərdən keçirir.

Məlumata görə, ABŞ Maliyyə Nazirliyi həmin vəsaitlərin keçmişdə dəyən zərərlərin kompensasiyası üçün istifadə olunub-olunmayacağını da araşdırır və Körfəz müttəfiqlərinin məruz qaldığı itkilərin dəyərləndirilməsinə başlayıb. Bu məlumat hələlik Maliyyə Nazirliyi tərəfindən təsdiqlənməyib.

Söhbət böyük məbləğlərdən gedir. Dondurulmuş İran aktivlərinin həcmi ilə bağlı müxtəlif qiymətləndirmələr mövcud olsa da, onların Cənubi Koreya və İraq kimi ölkələrdə saxlanılan on milyardlarla dollar olduğu güman edilir.

ABŞ Prezidenti Donald Tramp isə bazar günü NBC telekanalına bildirib ki, sülh sazişi əldə olunmadan əvvəl İran aktivlərinin dondurulmasının ləğvi və ya sanksiyaların aradan qaldırılması baş verməyəcək.

Ötən həftə “Əl-Ərəbiyyə” telekanalı dondurulmuş İran aktivləri ilə bağlı danışıqlarda müəyyən irəliləyiş əldə olunduğunu xəbər vermişdi. Lakin vəsaitlərin hansı mexanizm və hansı vaxt çərçivəsində azad ediləcəyi məsələsində tərəflər arasında hələ də ciddi fikir ayrılıqları qalır.

“Gülüncdür və qəbuledilməzdir”

ABŞ tərəfindən hər hansı rəsmi açıqlama verilməməsinə baxmayaraq, Reuters-in məlumatına İran rəsmiləri sərt reaksiya veriblər.

İran xarici işlər nazirinin hüquqi və beynəlxalq məsələlər üzrə müavini Kazem Qəribabadi bildirib ki, Tehranın razılığı olmadan İran aktivlərinin müsadirəsi, köçürülməsi və ya başqa məqsədlər üçün ayrılması beynəlxalq hüququn pozulması hesab olunacaq və İran buna mütənasib şəkildə cavab verəcək.

Parlamentin Milli Təhlükəsizlik və Xarici Siyasət Komitəsinin üzvü İsmayıl Kövsəri də iddia edilən təklifi rədd edib.

“Bu ideya mahiyyət etibarilə gülünc və qəbuledilməzdir”, – o, mühafizəkar “Tabnak” saytına bildirib.

 

- Cəfər Cəfərli

Açar Sözlər :

SEÇİLMİŞ XƏBƏRLƏR

Çox oxunanlar