Vəli Kiçik Paşa: Azərbaycan üçün gərəkirsə savaşaram, canımdan keçərəm VƏLİ KİÇİK PAŞANIN SENSASİON MÜSAHİBƏSİ Məhbəsdəki türk generalı qəzetimizə danışdı “Həbsdən buraxılan kimi ilk öncə Azərbaycana, can qardaşlarımın yanına gedəcəm” “İddiada göstərilir ki, Azərbaycandan 10 min ədəd zirehli geyim sifariş etmişəm...” Son 100 ildə Türkiyə tarixinin ən qalmaqallı məhkəmə prosesi olan “Ergenekon” işi ilə bağlı İstanbula yola düşəndə bu məsələdə adı keçən bir çoxları ilə görüşə biləcəyimi təxmin etsəm də “Ergenekon” işinin ən məşhur məhbusu, əslən azərbaycanlı olan Vəli Kiçik Paşa ilə görüşəcəyimi və çox ciddi şəkildə qorunan Silivri həbsxanasında ondan müsahibə ala biləcəyimi, açığı, təsəvvürümə gətirə bilmirdim. Elə səfərdən öncə redaksiyada həm baş redaktor, həm də həmkarlarımla söhbətimizdə belə düşünürdük ki, ən yaxşı halda mən Vəli Kiçik Paşanın ailə üzvləri ilə görüşə bilərəm. Amma İstanbul səfəri zamanı bir daha əmin oldum ki, mümkün olmayan nəsə ya yoxdur, ya da çox azdır. Vəli Kiçik Paşanın ailə üzvləri - xanımı Nejla Kiçik və qızı Zeynəb Kiçiklə görüşmək üçün xeyli çalışmalı oldum və sağ olsun Türkiyədəki dostlar; bu işdə əllərindən gələni etdilər. Qeyd edim ki, Zeynəb xanım həm də Vəli Kiçikin vəkilidir. Bu məqamda onu qeyd edim ki, İstanbul ərazisi sayılsa da şəhərdən Silivriyə gedib çıxmaq o qədər də asan deyil. İstanbulun mərkəzi hissələrindən hesab olunan Taksim meydanından Silivri həbsxanasına təxminən 160 kilometr yol var. Amma “Ergenekon” işində tutulan bir neçə məşhur şəxsin vəkilinin köməyi sayəsində bu məsafəni çox asanlıqla qət etdik və mən Silivri həbsxanasına daxil ola bildim (Bu həbsxanaya necə girə bilməyim və ordakı vəziyyət, keçirilən məhkəmə prosesi barədə növbəti yazıda oxuya biləcəksiniz). Həbsxananın həyətində Vəli Kiçiyin xanımı və qızı ilə tanış olduq. Hər ikisi Azərbaycandan olduğumu biləndə çox sevindi. Həm Nejla xanım, həm də atasına vəkillik edən Zeynəb xanım Vəli Kiçiyin Azərbaycanı çox sevdiyini, bu ziyarətimizdən də çox sevinəcəyini dedilər. Zeynəb xanımdan ilk xahişim atasını bir neçə yazılı sualımıza cavab verməyə razı salmaq oldu. Buna cəhd göstərəcəyini, amma müsbət nəticəyə inanmadığını bəri başdan dedi. Beləliklə, 6 fevral 2009-cu il. Türkiyənin məşhur Silivri həbsxanası. Aralarında generallar, çox məşhur simalar da olmaqla 41 nəfər tutuqlu məhkəmə salonuna gətirilir və proses başlayır... İki saatdan sonra fasilə elan olundu, prokurorlar, məhkəmə heyəti salonu tərk etdilər, zalda məhbuslarla onların yaxınları, jurnalistlər arasında canlı sədd çəkən əsgərlər qaldı. Artıq Zeynəb xanım mənim zalda olmağımı Vəli Kiçiyə çatdırmışdı və fasilə başlayan kimi Paşa ayağa qalxıb başı ilə mənimlə salamlaşdı. Ancaq bununla kifayətlənmək olmazdı və məhbusların yaxınlarının tutulanlarla görüşmək istəməsi səbəbindən zalda əsgərlərlə onlar arasında yaranan gərginlikdən istifadə edib Vəli Kiçiyə yaxınlaşdım. Azərbaycandan olan jurnalistin bu məhkəmədə iştirakından məmnun olduğunu söylədi və Azərbaycana salamlarını çatdırmağımızı xahiş etdi. Yazılı bir neçə sualımıza cavab verməyini xahiş etdikdə həbs olunandan bu yana heç bir jurnalistə müsahibə vermədiyini dedi; israrlı xahişimizdən və qızı Zeynəb xanımın da köməkliyindən sonra razılaşdı. Amma məhkəmə fasilədən qayıtdığından daha danışa bilmədik və yazılı suallarımı Zeynəb xanım vasitəsilə Vəli Kiçiyə göndərdim. Beləliklə, həbsindən sonra Vəlı Kiçik Paşa ilk müsahibəsini “Yeni Müsavat” qəzetinə verdi. - Həm siz, həm də vəkillər “Ergenekon” iddianaməsinin qondarma olduğunu deyirsiniz. Əgər bu doğrudursa, niyə belə bir iddia çıxıb ortaya? Bunun arxasında kimlər durur və məqsəd nədir? - Əvvəla, Azərbaycanda yaşayan və dünyadakı bütün soydaşlarımıza “Yeni Müsavat” vasitəsilə sayğılarımı, salamlarımı çatdırıram. “Ergenekon” adında bir terror təşkilatının olduğunu bildirmək və belə bir məsələni gündəmə gətirmək, iddia ortaya qoymaq ən böyük xətadır. “Ergenekon” adı bu işə məqsədli şəkildə verilib. “Ergenekon” türkün Kəbəsidir. Bu adda hansısa terror təşkilatının olduğunu iddia etmək təkcə məni yox, türklük hissini duyan hər kəsi narahat edir. Bu işlə bağlı iddianamə qüsurlu hazırlanıb və iddianamədən çox iftiranamədir. 2455 səhifəlik iddianamə tamamən telefon danışıqları əsasında hazırlanıb. Hər telefon danışığı təkrar-təkrar 15-20 dəfə ayrı-ayrı yerə yazılıb və iddianamə bununla da məqsədli şəkildə oxunmayacaq hala gətirilib. Bütün hüquqşünasların dediyi kimi, bu iddianamə boş ittihamlarla doludur. Məsələn, iddiada göstərilir ki, mən Azərbaycandan 10 min ədəd zirehli geyim sifariş etmişəm. Guya ki, onları 10 min nəfərə geydirib çevriliş edəcəkmişəm. Axı mən nədən Azərbaycandan 10 min zirehli geyim sifariş etməliydim? Zirehli geyimlə çevriliş etməkmi olur? Bu dava türk millətçilərini sındırmaq üçün Avropa və Amerikanın istəyi ilə hazırlanıb. Yavaş-yavaş bunun bütün qaranlıq tərəfləri üzə çıxmaqdadır. - Silahlı Qüvvələrin “Ergenekon” məsələsinə münasibəti normaldırmı? - Mən Türkiyə Silahlı Qüvvələrində çox sevilən bir generalam. Bu iddianamə türk ordusunu toplumun gözündən salmaq, ordunu rəncidə etmək məqsədilə hazırlanıb. Türk ordusu durduqca, xalqın gözündə etibarı yüksəldikcə Türkiyəni istədikləri hala sala bilmirlər. Türk ordusu qüdrətli olduqca Avropa dövlətləri və Amerika Qafqazlarda, Orta Doğuda və Türkiyədə istədikləri kimi at oynada bilmir. Bunu edə bilmədikləri və mən də orduda sevilən bir şəxs olduğum üçün bu prosesi məndən başlatdılar. Silahlı Qüvvələrin baş verənlərə münasibətinə gəlincə, ordu bu oyunları çox yaxşı bildiyi üçün baş verənlərə çox qarışmır və ən doğrusu da budur. Xarici güclər isə ordunu əzmək və xalqın gözündəki etibarını yox etmək üçün Silahlı Qüvvələrin bu məsələyə müdaxilə etməsinə çalışır. - Bu işlərin sonu necə olacaq? - Bu işin sonu fiaskodur. Çünki ortadakı iddialar tamamən yalan və qondarmadır. İddianamədəki heç bir məqamın dəlili yoxdur. Vətənsevərləri, milliyyətçiləri, AKP və Amerikaya qarşı olanları fəaliyyətsiz vəziyyətə gətirmək istəyirlər. Ancaq inanıram ki, Türkiyə ədaləti həqiqəti ortaya çıxaracaq. - “Ergenekon” iddianaməsində sizin Azərbaycanda hakimiyyət dəyişikliyi etmək istəyiniz də yer alıb. Bununla bağlı nə deyərdiniz? - İddianamədə mənim Azərbaycan ordusuna silah göndərməyim, Azərbaycan ordusu üçün pul topladığım və orada çevriliş etmək istəməyimlə bağlı iddialar var. Özünüz düşünün, mənim Azərbaycan ordusuna silah göndərməyim mümkünmü? Azərbaycan güclü bir ölkədir, mənim nə səlahiyyətim var ki, ora silah göndərim? Azərbaycan ordusu üçün pul toplamağım barədə deyilənlər də yalandır və bu iddia Azərbaycana həqarətdir. Azərbaycanda çevriliş etmək istəməyimlə bağlı yazılanlar isə iddia yox, dəlilikdir. Mən çevrilişi kimə qarşı edəcəkdim və hakimiyyətə kimi gətirəcəkdim? Mən Azərbaycanın bir nəfəriyəm. Azərbaycan üçün gərəkirsə savaşaram, canımdan keçərəm, Azərbaycanın bütün yetkililəri və insanları mənim üçün möhtərəm və sayğı duyduğum adamlardır. Mən hər yerdə demişəm ki, ermənilər işğal etdikləri AZƏRBAYCAN TORPAQLARINDAN ÖZLƏRİ ÇIXACAQLAR, ÇIXMASALAR - ÇIXARACAĞIQ. Bu şəkildə danışdığıma görə və Azərbaycandakı dostlarımla mənim münasibətlərimi korlamaq üçün belə qondarma məsələləri iddianaməyə salıblar. Belə bir niyyətim olsaydı, bunu indiyə kimi Azərbaycanda bilməzdilərmi? - Adınız mafiya babaları ilə bir yerdə çəkilir. Onlarla hər hansı əlaqələriniz olubmu? - “Ergenekon” iddianaməsinin qondarma olduğu qısa müddətdə məhkəmədə sübuta yetiriləcək. Adımın müxtəlif məsələlərdə hallandırılması mənim üzərimdən silahlı qüvvələri əzmək istəyi ilə bağlıdır. Haqqımda deyilənlər iftiradır. İndiyədək hansısa bir açıq işim tapılmayıb. Əgər hansısa bir açığım olsaydı, onu bütün dünyaya yayardılar. Şükürlər olsun ki, nə məsləkimə, nə də vətənimə heç bir yanlış yapmamışam. - “Qurdlar vadisi pusu”dakı İsgəndər Böyük obrazının sizə işarə olduğu söylənilir. Özünüz necə düşünürsünüz, doğrudanmı İsgəndər Böyük sizin prototipinizdir? - “Qurdlar vadisi pusu”dakı İsgəndər Böyüyün mənim olduğumu burada da deyirlər. Mən o seriala bir dəfə baxmışam, amma söhbətin nədən getdiyini bilmirəm. - Özünüzü necə müdafiə edirsiniz məhkəmədə? - Vəkilim qızım Zeynəbdir. Özüm isə bu işlə bağlı 100 səhifəlik müdafiə çıxışı yazmışam və nədən həbsxanada olduğumu göstərmişəm. Həbsdən çıxanda həmin çıxışı sizə də göndərə bilərəm. Müdafiə çıxışımda Amerikaya, Avropa Birliyinə qarşı olduğum, can Azərbaycanın 17000 kvadratkilometrlik torpağının erməni işğlı altında olduğunu, 1 milyon soydaşımızın qaçqın düşdüyünü, ermənilər torpaqlarımızdan çıxmasa, çıxarılacaq dediyimi, “mən türk millətçisiyəm, mənə Avropa Birliyi lazım deyil, 300 milyonluq Türk Birliyi lazımdır, onun da yolu Diyarbəkirdən yox, Tanrı dağından, Ergenekondan, Ankaradan keçəcək” dediyim üçün tutulduğumu yazmışam və bağırmışam. Bu yazdıqlarımı hər zaman söyləyəcəm. Kimsə məni həbslə qorxuda bilməz. Uca türk millətim üçün hər şey edərəm. Əgər həbsdən buraxılsam, ilk öncə Azərbaycana, can qardaşlarımın yanına gələcəm. Başda dövlət yetkililəri olmaqla bütün azərbaycanlılara bir daha sayğılarımı bildirirəm. Allaha əmanət olun. Türk türkü, Tanrı türkü qorusun. Zabil MÜQABİLOĞLU, İstanbul, Silivri həbsxanası http://chudaferin.azeriblog.com/2009/02/08/veli-kichik-pasha-azerbaycan-uchun-gerekirse-savasharam-canimdan-kecherem