ABŞ 800 milyonluq silah qalmaqalına ilk münasibətini bildirdi Bu il Birləşmiş Ştatlar Azərbaycanın hərbi potensialının gücləndirilməsinə 9,5 milyon dollar vəsait ayıra bilər Ermənistana isə belə yardımlar 3 dəfə azaldılaraq 2,5 milyon dollara edirilib ABŞ hökuməti Azərbaycanın hərbi potensialının gücləndirilməsinə, eyni zamanda ölkə sərhədlərinin mühafizəsilə bağlı tədbirlərin həyata keçirilməsinə 2009-cu ildə 9,5 milyon dollar vəsait ayıracaq. Ermənistana isə yardımlar 3 dəfə azaldılaraq 2,5 milyon dollara endirilib. Məlumata görə, hazırda bununla bağlı müzakirələr davam etdirilir. Konqresdə keçirilən müzakirələrin ilkin mərhələsi Azərbaycan üçün ürəkaçan olub. ABŞ hökuməti 2009-cu ilin federal büdcəsində Azərbaycana ayrılan yardımın məbləğini artırmağı planlaşdırır. Konqresə göndərilən məktubda Azərbaycana maliyyə yardımlarının artırılması zərurəti son illər ölkənin beynəlxalq antiterror əməliyyatlarında fəal iştirakıyla əlaqələndirilib. Məktubda qeyd olunur ki, Azərbaycan höbkuməti terrorrizmlə mübarizədə beynəlxalq birliyin səylərini dəstəkləməklə yanaşı, ABŞ-la da fəal əməkdaşlıq edir. Arzu Şirinova Qeyd edək ki, bu fikirlərin heç biri Ermənistana münasibətdə səslənməyib. Əksinə, konqresdə aparılan müzakirələr zamanı bəzi parlamentarilər Ermənistanı son illər ABŞ-ın mənafelərinə zidd addımlar atmaqda günahlandırıblar. Siyasi ekspertlərin fikrincə, bu isə bir daha təsdiqləyir ki, erməni lobbisinin ABŞ-ın xarici siyasətinə təsiretmə imkanları müəyyən qədər zəifləyib. Ağ Evdəki yeni adminstrasiya da Azərbaycanı daha yaxın strateji tərəfdaş sayır. Bu tendensiya Dağlıq Qarabağ münaqişəsinin həlli prosesində yeni elementlərin ortaya çıxmasına da zəmin yarada bilər. Bəlli olduğu kimi, son illər bir-birini sürətlə əvəzləyən hadisələr elə bir intensiv xarakter alıb ki, Dağlıq Qarabağ münaqişəsinə getdikcə artan diqqətin təsadüfi olmadığını deməyə əsas verir. Müşahidəçilərin sözlərinə görə, Dağlıq Qarabağ münaqişəsini gündəmin ən aktual mövzusuna çevrilməsini şərtləndirən digər amillərdən biri də, ATƏT-in Minsk qrupu həmsədrlərinin bəyanladıqları yeni prinsiplərdir. Danışıqların şərtlərinə uyğun olaraq bü təkliflər konfidensial saxlanılsa da, çox güman həmsədrlər əvvəlki illərlə müqayisədə bu dəfə geosiyasi reallıqları daha çox nəzərə alıblar. "Vaşinqton Times" qəzeti yazır ki, 11 sentyabr hadisələrindən sonra ABŞ-ın Dağlıq Qarabağ münaqişəsinin həlli prosesinə açıq müdaxilə etməsi qaçılmaz geosiyasi şərtdir. Rəsmi Vaşinqtonu bu gün Cənubi Qafqaz bölgəsinə bağlayan təkcə iqtisadi maraqlar deyil, bu bölgənin antiterror əməliyyatlarının keçirildiyi regionlarla coğrafi yaxınlığı ABŞ-ı öz qərarında ciddi və birmənalı olmağa məcbur edir. ABŞ hökumətinin Azərbaycana hərbi yardımla bağlı konqresə göndərdiyi məktub sözsüz ki, Rusiyanın məkrli fəaliyyətinə passiv də olsa, ilk cavabdır. Moskvanın Ermənistana növbəti dəfə 800 milyon dollardıq hərbi texnika və silah-sursat satması, fevralın 4-də Kollektiv Təhlükəsizlik Müqaviləsi Təşkilatının üzvü olan ölkələrin qurumun birgə sürətli çevik reaksiya qüvvələrinin yaradılmasıyla bağlı razılaşma imzalamasıdır. Təbii ki, bu birbaşa Rusiyanın istəyidir ki, həyata keçirilib. Qeyd edək ki, imzalanma prosesindən sonra Dmitri Medvedyev kollektiv çevik qüvvələr kontingentinin Rusiya ərazisində dislokasiya olunacağını bildirib. Əvvəl isə vurğulanırdı ki, həmin qüvvələr öz ölkələrinin ərazisində dislokasiya ediləcək və yerli müdafiə strukturlarına tabe olacaqlar. Bu qüvvələr öz döyüş imkanlarına görə NATO-nun hərbi birləşmələrindən geri qalmayacaqlar. Prezidentin köməkçisi Sergey Prixodka bildirib ki, kollektiv çevik qüvvələr kontingenti hərbi təcavüzün dəf edilməsi, beynəlxalq terrorrizmə qarşı mübarizə məqsədilə xüsusi əməliyyatların keçirilməsində, böhran vəziyyətlərinin nəticələrinin aradan qaldırlımasında istifadə olunacaq. Xatırladaq ki, yalnız Özbəkistan yeni imzalanan sənədə şərtlərlə qoşulub. Belə ki, bu ölkə yeni yaradılan qüvvələrin tərkibinə bütün xüsusi xidmət strukturlarının, o cümlədən fövqəladə hallar nazirliklərinin daxil edilməsilə hələlik razılaşmır. ABŞ-ın qaradərili prezidenti Barak Obama hələ seçkilər öncəsi vəd vermişdi ki, seçiləcəyi təqdirdə qondarma erməni soyqırımını tanıyacaq. Buna baxmayaraq ekspertlər bildirirdilər ki, bu, Obamanın seçkilərə hasablanmış vədidir. Yəni ABŞ-ın neçə illərdir dövlət siyasəti var və bu siyasətə həm də Türkiyə ilə münasibətlərin müttəfiqlik səviyyəsində olması daxildir. Beləliklə, Barak Obama prezident seçildi və ilk qərarlarından biri də lobbiçilik fəaliyyətinə məhdudiyyət qoyması oldu. Həmin qərara görə, əvvəllər lobbiçiliklə məşğul olan şəxs Ağ evdə vəzifə tutacağı halda, lobbiçilik fəaliyyətilə vidalaşmalıdır. Eyni qayda həmin şəxs vəzifədən gedəcəyi halda da lobbiçiliklə məşğul ola bilməz. Mətbuatın yazdığına görə, ABŞ prezidenti Barak Obama ilk xarici səfərini Türkiyədən başlamaq istəyir. Ehtimal etmək olar ki, Barak Obama ABŞ-ın dövlət siyasətində müsbət dəyişikliklər etməkdə qərarlıdır.