ERMƏNİSTAN İKİNCİ «SOYQIRIM» CƏBHƏSİ AÇIR Elxan ŞAHİNOĞLU «Atlas» Araşdırmalar Mərkəzinin rəhbəri [email protected]/* */ elxan.azeriblog.com Ermənistan kiçik dövlət olsa da, qonşularına və dünyaya başağrısı yaratmaqda mahirdir. Əvvəlcə soydaşlarımızı Ermənistandan qovdular, bir az sonra torpaqlarımızı işğal etdilər, ardından keçdilər Gürcüstana, ordakı erməniləri qızışdırdılar. Bununla paralel olaraq 1915-ci ildəki “soyqırımın” tanınması tələbiylə ABŞ və Avropa ölkələrinin yaxasından yapışdılar. Onların da bir qismi erməni lobbisinin təzyiqindən yaxa qurtarmaq və seçkilərdə ermənilərin səsini qazanmaq üçün ya bu “soyqırımı” tanıdı, ya da “tanımaq” barədə düşünür. ABŞ-ın yeni seçilən prezidenti Barak Obamanın andiçmə mərasiminə bir neçə gün qalıb. Erməni lobbisi Obamanın prezident kürsüsünə oturmasını gözləmədən ona ard-arda “bax ha, bizə soyqırımı tanıyacağını söz vermişdin” ismarıcını yollayır. Erməni lobbisi hələ dövlət katibi kreslosuna oturmağa macal tapmamış Hillari Klintonu da indidən güncə sıxıb. Üstəlik, ermənilər bir “soyqırımla” qurtarmamış ikinci “soyqırım” barədə düşünürlər - onlar ikinci “soyqırım” cəbhəsi açmaq həvəsinə düşüblər. Bu dəfə hədəf Azərbaycandır. Azərbaycan Erməniləri Assambleyasının rəhbəri Qriqori Ayvazyan adlı bir şəxs İrəvanda mətbuat konfransı keçirərək deyib ki, “İrs” müxalifət fraksiyası parlamentin qış sessiyasında Azərbaycanda 1988-1992-ci illərdə ermənilərə qarşı həyata keçirilən “soyqırımın” tanınması məsələsini qaldıracaq. Ermənistanın Azərbaycandakı “soyqırımı” tanımasını vacib sayan Ayvazyan daha sonra xarici ölkələrə müraciət edəcəklərini deyib. Ayvazyanın bu açıqlamasıyla eyni gündə İrəvan Dövlət Universitetinin fəlsəfə kafedrasının müdiri, politoloq Aleksandr Manasyan bənzər fikirlər söyləyib. Manasyan Azərbaycandan köçürülən ermənilərdən Azərbaycana qarşı təzyiq vasitəsi kimi istifadə etməyin gərəkliyindən söz açıb. O, bu amilin Dağlıq Qarabağ danışıqlarında Ermənistanın işinə yarayacağını söyləyib. Ayvazyan və Manasyan “Azərbaycanda erməni soyqırımı” məsələsini təsadüfən ortaya atmayıblar. Yeni “soyqırımla” bağlı Ermənistan parlamentində hələlik müxalifət fraksiyası irəli çıxsa da, təşəbbüsün arxasında rəsmi İrəvanın dayandığını söyləmək mümkündür. Ayvazyanın dilindən qaçan bir cümlə bunu açıq-aşkar ortaya qoyur: “Ermənistan xarici işlər nazirinin müavini Şavarş Köçəryanın təklifiylə parlament fraksiyalarına müraciət etdik”. İrəvanın “1988-1992-ci illərdə Azərbaycanda ermənilərin soyqırıma uğraması” mövzusunu gündəmə gətirməkdə məqsədi nədir? Onların strateji məqsədi “1915-ci il soyqırımını” dünyaya tanıtdırmaqdır, “Azərbaycanda 1988-1992-ci il erməni soyqırımı” isə ermənilərin taktiki maraqlarına xidmət edir. Ermənistan və erməni lobbisinin nə qədər böyük havadarları olsa da, onlar çiyinlərində “iki soyqırım” daşıya bilməzlər. Xocalı soyqırımının növbəti ildönümü yaxınlaşır. Azərbaycanın Qərbdə ermənilərə verilən qədər dəstəyi olmasa da, dünyada 1992-ci ildə azərbaycanlıların erməni soyqırımına məruz qalması barədə danışırlar. Bu isə ermənilərin “məzlum” millət olması imicinə böyük zərbə, “erməni soyqırımının” tanınması istiqamətində çalışmalara az da olsa əngəldir. Odur ki, rəsmi İrəvan və erməni lobbisi Xocalı soyqırımının effektini azaltmaq üçün eyni illərdə Azərbaycanda ermənilərin “soyqırıma” məruz qaldığı barədə təbliğata start vermək istəyirlər.