SƏRKİSYAN SÖZLƏRİNƏ DÜZƏLİŞ VERDİ “Mən Dağlıq Qarabağın bəlkə Azərbaycanın tərkibində qala biləcəyini deməmişəm” Ermənistan prezidenti Serj Sərkisyan dünən BBC radiostansiyasının Azərbaycan xidməti tərəfindən yayılan və ölkəmizdə rezonans doğuran açıqlamalarına düzəliş verib. Ermənistan prezidenti özünün mətbuat xidməti vasitəsilə yaydığı açıqlamada bildirib ki, o, BBC əməkdaşı ilə söhbəti zamanı investisiyalar qoyulsa, gələcəkdə Dağlıq Qarabağın bəlkə Azərbaycanın tərkibində qalmağa razılıq verə biləcəyini deməyib. Xəbər verildiyi kimi, Ermənistan hakimiyyəti ölkənin müstəqillik günü münasibətilə bir qrup xarici jurnalisti İrəvana dəvət edib. Jurnalistlər prezident Serj Sərkisyanla görüşüblər, onların arasında BBC-nin Moskva müxbiri də olub. BBC müxbirinin “Dağlıq Qarabağın Azərbaycanın tərkibində qalması nəzəri baxımdan da olsa mümkündürmü” sualına cavab verərkən bu sözləri işlədib: “Mən Azərbaycan prezidenti İlham Əliyevə təklif etmişəm ki, o, mövcud dövrdə Qarabağın xoş güzəranı, təhlükəsiz yaşayışı və gələcəyində azərbaycanlıların ciddi maraqlı olduqlarını göstərmək üçün Qarabağa investisiyalar qoymağa çalışsın. Bəlkə ondan sonra qarabağlılar referendum zamanı Azərbaycanın tərkibində yaşamaq istədiklərini bildirdilər”. Lakin dünən Sərkisyanın adından yayılan açıqlamada deyilir ki, Azərbaycan KİV-ləri onun sözlərini təhrif edib. Bildirilir ki, Sərkisyan yaxın zamanlarda keçiriləcək istənilən referendumda Qarabağ ermənilərinin Azərbaycandan ayrı yaşamağa səs verəcəklərini deyib. “Prezident müsahibəsində deyib ki, o, Azərbaycan prezidenti İlham Əliyevi Dağlıq Qarabağ əhalisinin təhlükəsizliyində və rifahında maraqlı olduğunu göstərmək üçün Qarabağa investisiya qoymağa çağırıb. Lakin Ermənistan prezidenti bu investisiyalar nəticəsində Qarabağ ermənilərinin Azərbaycanın tərkibində yaşamağa razılıq verə biləcəyini deməyib. Bundan əlavə, Sərkisyan deyib ki, ”əgər Qarabağ Azərbaycana qaytarılsa orada qısa müddətdə bir erməni də qalmaz"- deyə Ermənistan prezidentinin mətbuat xidmətinin yaydığı yazılı açıqlamada bildirilir. Açıqlamada deyilir ki, Ermənistan prezidenti “Qarabağ erməniləri Azərbaycanın tərkibində yaşamağa səs verə bilərlər” ifadəsini işlədə bilməz. “Bu, sadəcə olaraq, mümkün deyil, Azərbaycan KİV-ləri prezidentin açıqlamalarından ayrı-ayrı sözləri və sitatları kontekstdən çıxararaq veriblər”. Göründüyü kimi, Ermənistan prezidenti Azərbaycanın yatıracağı investisiyalardan sonra ermənilərin müstəqillik ideyasından əl çəkməsinin mümkünlüyü haqda sözlərini təkzib etsə də, hər halda, Bakını Dağlıq Qarabağa investisiyalar qoymağa çağırır. Bu ideya isə Azərbaycanla Ermənistan arasında neçə vaxtdır aparılan danışıqların məğzindən qaynaqlanır. Belə ki, həmin danışıqlarda Dağlıq Qarabağın gələcək statusunu referendumda müəyyən etmək prinsipinin müzakirə olunduğu haqda artıq yazılıb. Sözügedən prinsipi hazırda danışıqlar masası üzərində olan “Madrid prinsipləri” adlı sənəddə də yer alır. Vasitəçilər bu planı “hər iki tərəfi qane edə biləcək ən mükəmməl sülh variantı” kimi təqdim edirlər, ancaq məsələ mükəmməl olmaqdan daha çox sadə və Azərbaycan üçün təhlükəlidir. Plana görə, Dağlıq Qarabağda referendumu, yaxud səsverməni ətraf ərazilərin boşaldılmasından və qaçqınların qayıtmasından sonra 5-10 il ərzində keçirmək nəzərdə tutulur. Bu müddət ərzində isə nəzəri olaraq Azərbaycan erməniləri onun tərkibində yaşamağa inandıracaq tədbirlər görə bilər. Söhbət neft pulları hesabına Dağlıq Qarabağa böyük həcmdə investisiyaların yatırılmasından gedir. Lakin Sərkisyanın da dediyi kimi, sonda hər şey yenə Dağlıq Qarabağ ermənilərinin əlində olacaq. Onlar milyardlarla dollarlıq investisiyalara baxmayaraq əvvəlki mövqelərində də qala bilərlər. Prinsipcə, Dağlıq Qarabağa investisiyalar qoyulmasını və orada yaşayan ermənilərin həyat şəraitinin yaxşılaşdırılmasını münaqişənin dinc yolla nizamlanmasına yönələn ən məqbul variant saymaq olardı. Bir müddət əvvəl Avropa Birliyi də tərəflər arasında razılaşma əldə edilməsinə həvəsləndirmək üçün təqribən 5 milyard dollarlıq yardım paketi təklif edib. Bu pulların böyük hissəsi Qarabağa yönəlməlidir. Sərkisyanın açıqlamaları da təsdiq edir ki, münaqişənin həlli üçün pul amili, hər halda, müzakirə edilir. Hətta Sərkisyan sözlərinə düzəliş verdikdən sonra belə onun dediklərini qısaca bu cür izah etmək olar: “Azərbaycan Qarabağa investisiyalar qoysun, sonrasına baxarıq”. Ortada pul söhbəti olduğuna görə Qarabağ danışıqlarını həm də biznes danışıqlarına bənzətmək olar, lakin istənilən biznesdə söhbət puldan gedirsə, təminat da olmalıdır. Yəni Azərbaycan bilməlidir ki, Dağlıq Qarabağa Sərkisyanın təklif etdiyi kimi investisiyalar qoysa, əvəzində konkret nə gəlir götürəcək. “Bəlkə, baxarıq” kimi sözlər isə biznesdə təminat rolunu oynaya bilməz. Digər tərəfdən, indiki şəraitdə Azərbaycanın Dağlıq Qarabağa investisiyalar yatırması üçün şərait də mövcud deyil. Bunun üçün ən azından ətraf rayonlar boşaldılmalı, kommunikasiyalar açılmalı və bərpa edilməlidir. Əks halda, söhbət investisiyalardan yox, Qarabağ ermənilərinə pul verilməsindən gedə bilər. Tutaq ki, Azərbaycan indiki həll modelinə razılıq verib ətraf rayonların azad edilməsi şərti ilə Dağlıq Qarabağa milyardlarla dollar investisiya qoydu, ancaq 10, yaxud 15 il sonra keçirilən səsvermədə ermənilər yenə müstəqilliyə, yaxud Ermənistana birləşməyə səs verdilər, onda necə olacaq? Bu suala Sərkisyan cavab vermir və vermək istəmir. Deməli, Azərbaycan belə təhlükəli oyuna gedə bilməz. Siyasət şöbəsi musavat