Xəyal qırıqlığına aparan yol Yaxud ermənilər Türkiyədə meydan sulayır ABŞ Konqresində Ermənistanla bağlı dinləmələrdən və rəsmi Vaşinqtonun mövqeyini ifadə edən Deniel Fridin bəyanatlarından sonra Ankarayla İrəvan arasında media mesajlaşması davam edir. Artıq Türkiyə və Ermənistan mətbuatı Ankara-İrəvan münasibətlərinin istiləşməsilə bağlı çeşidli yazılar yayımlayır, müxtəlif təbəqələri təmsil edən şəxslərin "pozitiv və ümidverici" açıqlamalarını cəzbedici sərlövhələrlə ictimai rəyə təqdim edir. Türkiyə ilə Ermənistan arasında ticarət məqsədilə həyata keçirilən "çarter diplomatiyası"ndan sonra başlayan "buz əriməsi" prosesi indi turizm sahəsinə də sirayət etməyə başayıb. Elçin Mirzəbəyli Rəsmi Ankara Ermənistandan Türkiyənin Antalya və Bodrum bölgələrinə birbaşa uçuşlara icazə verib. Türk mediasının məlumatına görə bu il Ermənistandan Türkiyəyə 50 min turistin gələcəyi gözlənilir. Əslində bu xəbərin doğruluğunu təsdiqləmək üçün Türkiyə mediasından xüsusi iqtibas gətirməyə də ehtiyac yoxdur. Çünki hər şeyi öz gözlərimlə görmüşəm. Bir neçə gün öncə Antalyadakı turist bölgələrində istirahət edən bir neçə erməni ailəsilə qarşılaşdım. Özlərini həddən artıq rahat hiss edir, kobud və ürəkbulandırıcı nitqlərilə "meydan sulayırdılar". Təxminən 15 nəfərdən ibarət olan erməni turistləri qırıq rus və ingilis kəlmələrilə ətrafdakılara çəkinmədən "soyqırımından" söhbət açır, hətta bu mövzuda başı ticarətdən ayılmayan bəzi Türkiyə vətəndaşlarına da "dərs" keçirdilər. Adını çəkmədiyim istirahət mərkəzində təşkil edilən müxtəlif əyləncə proqramlarında iştirak edən soydaşlarımızın fəallığı nəticəsində aparıcılar tərəfindən "Azərbaycan" sözünün tez-tez dilə gətirilməsi isə erməniləri açıq-aşkar qıcıqlandırırdı. Hər dəfə Azərbaycan adının çəkilməsi erməni dilində donqultularla, bəzən isə nümayişkəranə etirazlarla müşaiyət olunurdu. Türkiyə mətbuatı isə ölkəyə işləmək üçün gələn qanunsuz Ermənistan miqrantlarına daha münbit şəraitin yaradılmasıyla bağlı hökumət tərəfindən xüsusi göstərişin verildiyini yazır. Hazırda Türkiyədə müxtəlif sahələrdə çalışan Ermənistan vətəndaşlarının sayı 70 min nəfəri ötüb. Bununla bağlı baş nazir Ərdoğana gözaydınlığı verməyə dəyər. Xatırlayırsınızsa, Türkiyənin baş naziri bir neçə müddət öncə Almaniyada keçirilən beynəlxalq tədbirdəki çıxışında ölkəsində 60 min Ermənistan vətəndaşının çalışdığını qürur hissi ilə bəyan etmişdi. O zaman Ərdoğanın məlum çıxışını dinləyəndə Azərbaycan Kommunist Partiyasının birinci katibi, el arasında "bambılı" kimi tanınan Əbdülrəhman Vəzirovun ermənilərin Bakıya qayıtması münasibətilə xalqa verdiyi gözaydınlığını xatırlamışdım... Türkiyədə 70 min, bəlkə də 100 mindən daha artıq Ermənistan vətəndaşı iki ölkə arasında diplomatik əlaqələr, viza rejimilə bağlı ikitərəfli müqavilələr olmadan qanunsuz fəaliyyət göstərirlər və onlara "gözün üstə qaşın var" deyən də yoxdur. Əksinə Türkiyədə işləyən Ermənistan vətəndaşlarının sayı artdıqca rəsmi Ankaranı təmsil edən bəzi şəxslərin Avropa Birliyi və ABŞ qarşısında anlaşılmayan səbəbdən "təmizə çıxmaq" üçün statistik göstəriciləri də çoxalır. Azərbaycan türkləri isə təəssüf ki, "iş başında" yaxalanan kimi sınırdışı edilirlər. Bununla bağlı son 1 ay ərzində "Xalq Cəbhəsi" qəzetinə edilən müraciətlərin sayı az qala 100-dən artıqdır. Hər şeyi gözlərimlə görənədək susmağa üstünlük vermişdim. Getdim və gördüm. Təəssüfləndim, təbii ki... Türkiyə ilə Ermənistan arasında illik ticarət dövriyyəsi 160 milyon dollar təşkil edir. Bəlkə də daha artıq. Çünki bu məsələdə konkret statistik göstərici əldə etmək çox çətindir. Bütün hallarda "Hürriyyət" qəzetinin təqdim etdiyi rəqəmi əsas gimi götürsək, Türkiyə Ermənistanın üçüncü ticarət tərəfdaşıdır. Bunları qardaş Türkiyədən hansısa umacağımız olduğu üçün yazmıram. Sadəcə, ermənilərə Türkiyədə daha gözəl şərait yaratmaqla onların türklərə qarşı aqressiv münasibətlərinin dəyişəcəyinə, nifrətin sevgiyə dönəcəyinə zərrə qədər də inanmıram. Çünki biz bu "tarixi" bir neçə dəfə yaşamışıq. Hər dəfə verilən "gözaydınlıqları"ndan sonra öncə yeni aldanışlar və məyusluq mərhələsi başlayıb. ..."Allah bazar versin", ancaq soydaşlarımın növbəti dəfə xəyal qırıqlığına uğrayacağı məni indididən narahat edir. xalqcebhesi