Ergeneson Türkiyədə yüksək rütbəli hərbçilərin də olduğu daha 17 nəfər həbs olunub Dünən Türkiyənin siyasi həyatını şoka salan həbslər həyata keçirilib. Həbslər bir müddət əvvəl tutulan ordu generalı Vəli Küçük Paşaya bağlı olduğu bildirilən "Ergenekon" adlı qeyri-leqal təşkilatla əlaqədar bir neçə aydır aparılan istintaq çərçivəsində gerçəkləşdirilib. Türkiyə vaxtı ilə səhər saat 07:00-da başladılan və eyni vaxtda həyata keçirilən əməliyyat nəticəsində Yandarma Qüvvələrinin keçmiş komandanı, Atatürkçü Düşüncə Dərnəyinin sədri, istefada olan ordu generalı Şənər Əruyğur, 1-ci ordunun sabiq komandanı, istefada olan ordu generalı Xurşid Tolon, Ankara Ticarət Odasının (Palata) sədri Sinan Aygün, "Cumhuriyyət" qəzetinin əməkdaşı, tanınmış yurnalist Mustafa Balbay və daha 17 nəfər həbs olunub. Tutulanların hamısının evlərində və ofislərində axtarış aparılıb. Saxlanılan şəxslər bir qədər sonra İstanbula aparılılıb. Məlumata görə, həbslər Respublika Baş Prokurorluğunun təlimatı ilə həyata keçirilib. Həbs edilən Mehmet Şənər Əruyğur 1941-ci ildə Ərzurumda anadan olub. 1971-ci ilə qədər müxtəlif birliklərdə məsul vəzifələrdə çalışıb. 1971-73-cü illərdə Hərbi Akademiyanı, 1973-74-cü illərdə Atatürk Universitetinin işlətmə fakültəsini, 1975-ci ildə isə NATO-nun Müdafiə Kollecini bitirib. 1976-78-ci illərdə Türkiyənin Rumıniyadakı səfirliyində hərbi attaşe olub. Türkiyə Silahlı Qüvvələrində müxtəlif yüksək vəzifələrdə çalışaraq, ordu generalı rütbəsində təqaüdə çıxıb. Son olaraq Türkiyə Yandarma Qüvvələrinin komandanı vəzifəsində çalışıb. "İstiqlal" və Türkiyə Silahlı Qüvvələrinin "Üstün Hizmet" medallarına sahib olan Şənər Əruyğur evlidir, iki övladı var. Fransız və ingilis dillərini bilir. Digər general Əhməd Xurşit Tolon 1942-ci ildə İstanbulda doğulub. Türkiyənin ABŞ-dakı səfirliyində hərbi attaşe vəzifəsində çalışıb. Türkiyə Silahlı Qüvvələrində müxtəlif yüksək vəzifələrdə çalışaraq, ordu generalı rütbəsində təqaüdə çıxıb. Son olaraq 1-ci Ordunun komandanı vəzifəsində çalışıb. Bir məsələni də qeyd etmək yerinə düşər ki, "Ergenekon"la bağlı istintaqa iddianamə təqdim edilib və iddianın bu həftə açılması gözlənilirdi. Adıçəkilən şəxslər Türkiyənin mövcud hökumətinə qarşı müxalif mövqeləri ilə tanınırlar. Atatürkçü Düşüncə Dərnəyi isə məşhur cümhuriyyət mitinqlərinin əsas təşkilatçısı olub. Xatırladaq ki, indiyə qədər "Ergenekon" əməliyyatı çərçivəsində 49 nəfər saxlanılıb. Türkiyədə "Ergenekon" əməliyyatı çərçivəsində həyata keçirilən həbslərin məhz dünənə təsadüf etməsi müşahidəçilərin marağına səbəb olub. Türkiyə KİV-nin məlumatına görə, həbslər hakim Ədalət və İnkişaf Partiyası üçün çox önəmli bir gündə başlayıb. AKP-nin bağlanması tələbi ilə iddia irəli sürən Türkiyənin baş prokuroru Əbdürrəhman Yalçınkaya dünən Konstitusiya Məhkəməsində iddiasını əsaslandıran açıqlama ilə çıxış edib. Qəzetlər baş prokurorun önəmli çıxışa hazırlaşdığı bir vaxtda həbslər həyata keçirilməsinin Türkiyəni sarsıtdığını vurğulayıblar. Ekspertlər həbslərin baş prokurorun açıqlaması ilə eyni gündə həyata keçirilməsinin diqqət çəkdiyini qeyd edirlər. Axşama yaxın bəlli olub ki, "Tərcüman" qəzetinin baş redaktoru Ufuk Büyükçələbi də həbs olunub. "Cümhuriyyət" qəzetinin Ankara təmsilçisi Mustafa Balbayın həbsindən sonra isə qəzetin ofisi polislərin nəzarəti altına alınıb. Ofisin qarşısında 15-dən çox polisin növbə çəkdiyi bildirilir. Təhlükəsizlik orqanları Balbayın kompüterini və dosyelərini həbs ediblər. Türkiyənin baş naziri, AKP-nin sədri Rəcəb Tayyib Ərdoğan paytaxt Ankarada və İstanbulda aparılan həbslərdən xəbəri olmadığını söyləyib: "Ümid edirəm ki, bu istintaq nəticəsində qaranlıqlar aydınlığa çıxacaq. Təbii ki, biz də iddianın tez bir zamanda hazırlanmasını gözləyirik. Bunu iddianın tamamlanmasına yönəldilmiş addım kimi görürəm. Bu, prokurorun 10-cu Ağır Cəza Məhkəməsinin qərarı ilə atdığı addımdır. Təhlükəsizlik orqanlarımız da məhkəmənin qərarını həyata keçirib. Həyata keçirilən həbslərin nəticəsi budur. Bizim də bununla bağlı gözləntilərimiz var. Xahişimiz odur ki, istintaq nəticəsində qaranlıq məqamlara aydınlıq gətirilsin". AKP-nin sədr müavini, millət vəkili Dengir Mir Mehmet Fırat bildirib ki, məhkəmə qərarlarına hamı hörmət göstərməlidir. Ana müxalifət - Cümhuriyyət Xalq Partiyasının (CHP) üzvü, millət vəkili Məhərrəm İncə isə cəmiyyətdə atatürkçü, ulusalçı (milli dövlətçi) kimi tanınan şəxslərin həbsinə sərt şəkildə etiraz edib. O, "mən də ulusalçıyam, məni də həbs edin" - deyə hakimiyyətə səslənib. M.İncə "Ergenekon" adlandırılan təşkilatla bağlı istintaqın bir ildir davam etdiyini və hələ də ittiham aktının hazırlanmadığını vurğulayıb: "Son bir ildə bu istintaq çərçivəsində həbs olunanların ortaq özəlliyi AKP-yə qarşı müxalifətdə olmalarıdır. Bu həbslər Türkiyədə böyük olayların olacağını göstərir. Türkiyənin mənafeyini qorumaq, ölkənin təbii ehtiyatlarının, sərvətlərinin gecəyarısı xaricilərə satılmasına qarşı çıxmaq, hökumət mənsublarının xaricdə Türkiyəni tənqid etməsini pisləmək, hökumətin əleyhinə çıxmaq cinayətdirsə, mən də cinayətə yol verirəm. Məni də tutsunlar". Polis əməliyyatının əsas hədəfi - Atatürkçü Düşüncə Dərnəyinin baş katibi Suay Karaman isə baş verənləri "mülki çevriliş" kimi qiymətləndirib: "Türkiyədə iqtidar tərəfindən mülki çevriliş həyata keçirilir. Bunun nəticələrini yaxın vaxtlarda görəcəyik. Bu proses hansısa mərhələdə mütləq dayanacaq". "Ergenekon qalmaqalı" çərçivəsində İstanbuldan verilən təlimat əsasında Trabzonda da həbslərə başlanılıb. Bir qədər əvvəl Trabzonda fəaliyyət göstərən "Ati Teknoloyi" Özəl Səhiyyə Xidmətləri Sənaye və Ticarət Şirkətinin rəhbəri professor Ərcümənt Ovalı həbs olunub. O, Trabzon Əmniyyət Müdürlüyündə istintaqa ifadə verib. Türkiyənin yeganə immun sistemi mərkəzi olan "Ati Teknoloyi" rəhbəri olan professor Ərcümənt Ovalı bundan əvvəl Qara dəniz Texniki Universitetində tibb fakültəsində çalışıb. kaspi