Yuri Merzlyakovun bədbinliyi "Qarabağ münaqişəsi olmasaydı, Rusiya ilə Ermənistanın strateji müttəfiqliyinə ehtiyac qalmazdı" Dağlıq Qarabağ münaqişəsinin həlliylə bağlı avropalı rəsmilərin nikbin bəyanatlar səsləndirdiyi bir vaxtda ATƏT-in Minsk qrupunun həmsədri Yuri Merzlyakov danışıqlar prosesinin gerilədiyini bəyanlayıb. Rusiyalı həmsədr baza danışıqlarında 4 prinsipin razılaşdırılmadığını vurğulayıb. Politoloq Leyla Əliyeva indi danışıqlarda ciddi irəliləyişlərin olmasını inandırıcı saymadı: "Əslində avropalı rəsmiləri aldadan müəyyən amillər yaranıb. Tural Həmsədrlər bundan çıxış edərək münaqişənin həlliylə bağlı bəzi fikirlər ortaya qoyurlar. Amma Yuri Merzlyakovun fikirlərində inandırıcı məsələlər ola bilər. Bunlardan biri də hələlik bir neçə məsələ ətrafında razılaşmanın olmaması və nəticədə danışıqların irəli getməməsidir. Doğrudan da siyasi prosesləri diqqətlə izlədikdə görürük ki, hər iki tərəfin ciddi razılığa gəlməsi üçün belə bir məqam da yaranmayıb". Leyla Əliyeva Rusiyanın Yuri Merzlyakovun dilindən bədbin fikirlər səsləndirməsinin bu ölkənin münaqişənin mahiyyətini daha yaxşı anlamasından xəbər verdiyini düşünür. Bu, həm qonşu ölkənin maraqlarını, həm də prosesin doğru gedişini əks etdirir. "Atlas" Araşdırmalar Mərkəzinin rəhbəri Elxan Şahinoğlu Yuri Merzlyakovun baza prinsiplərində razılaşdırılmamış 4 məsələnin status və azad olunacaq bölgələrin konkret siyahısının ortaya qoyulması ilə bağlı olmasını mümkün saydı: "Bu gün əsas şərtlər də bunlardı və danışıqlarda prinsipial məqamlar bu kimi tələblərdən ibarətdir. Əslində avropalı diplomatların açıqlamalarında da müəyyən mənada Yuri Merzlyakovun söylədiyi kimi bədbin fikirlər səsləndirilir. Diqqətlə təhlil etsək görərik ki, danışıqlarda geriləmə elementləri var". Əslində Rusiyanın münaqişənin həllində maraqlı olmadığını deyən ekspert bu səbəbdən də bizim üçün arzuolunmayan fikirlərin ilk olaraq Yuri Merzlyakovun dilindən səsləndiyini bildirdi: "Dağlıq Qarabağ münaqişəsi olmasaydı, Azərbaycanla Ermənistan, eləcə də işğalçı dövlətlə Türkiyə arasında normal münasibətlər yaranardı. Bu zaman Rusiya ilə Ermənistanın strateji müttəfiqliyinə ehtiyac qalmazdı. Odur ki, Rusiya Cənubi Qafqazda olan forpostunu əldən vermək istəmir. Sergey Lavrovun Türkiyəyə rəsmi səfəri çərçivəsində Ankaradakı müzakirələrdə Türkiyə-Ermənistan münasibətlərini də gündəmə gətirəcək. Çünki Ermənistan prezidenti bu yaxınlarda Moskvada olarkən Rusiyanın Türkiyə ilə münasibətlərinin nizamlanmasında yardımçı olmaq üçün vasitəçiliyini xahiş etmişdi. Ola bilsin ki, Sergey Lavrov burada imitasiya rolunu oynasın. Ankarada bu məsələr ətrafında danışıqlar aparılsa da, əslində Rusiya bu münasibətlərin nizamlanmasında maraqlı deyil. Yəni bu baş verərsə, Rusiyanın Cənubi Qafqazda siyasi varlığına ehtiyac qalmayacaq. Bu səbəbdən də Qarabağ münaqişəsi ilə bağlı rusiyalı həmsədrin avropalı rəsmilərdən fərqli bəyanatı da başadüşüləndir. Əslində Yuri Merzlyakov Dağlıq Qarabağ məsələsinin həlliylə bağlı yeniliklərdən ilkin xəbərdar olunan şəxslərdən sayılır". xalqcebhesi