AŞ PA prezidenti Ermənistanı işğalçı adlandırdı Luis Mariya de Puç bu fikri Yerevanda da səsləndirəcəyini vəd etdi Dünən Avropa Şurası Parlament Assambleyasının (AŞ PA) prezidenti Luis Mariya de Puçun Azərbaycana səfəri başlayıb. Bakıda yurnalistlərin suallarını cavablandıran AŞ PA prezidenti qeyd edib ki, Azərbaycana səfəri zamanı hakimiyyət nümayəndələri ilə aparacağı danışıqlarda demokratiyanın daha da təkmilləşdirilməsi xüsusilə diqqət mərkəzində olacaq. "Mən tam əminəm ki, Azərbaycan artıq demokratiya yolundadır, ölkədə insan hüquqlarına riayət olunur, eyni zamanda hüquqi dövlət qurulur" - deyə o bildirib. AŞ PA prezidenti əlavə edib ki, Bakıda hakimiyyət və parlament nümayəndələri ilə aparacağı danışıqlarda demokratiyanın inkişaf etdirilməsi, insan hüquqlarının qorunması və hüquqi dövlət quruculuğu prosesində Avropa Şurasının hansı yardımlar edə biləcəyini müzakirə edəcək. L.M.Puç bildirib ki, Azərbaycan Avropa Şurası qarşısında demokratiya, qanunun aliliyi və insan haqları ilə bağlı götürdüyü öhdəliklərə sadiqdir. Onun sözlərinə görə, səfərdə məqsədi AŞ PA-nın yay sessiyasında Azərbaycanla bağlı qəbul edilən qətnamənin yerinə yetirilməsinə dair danışıqlar aparmaqdır. "Azərbaycana səfərim xoşməramlı xarakter daşıyır. Mənim Azərbaycanda hər hansı təftiş aparmaq məqsədim yoxdur. Müvafiq qətnamənin yerinə yetirilməsi üçün Azərbaycana əlimdən gələn köməyi etmək istəyirəm" - deyə AŞ PA prezidenti vurğulayıb. L.M.Puç yurnalistlərin AŞ PA-nın Ermənistanda bu ilin fevralında keçirilən prezident seçkisindən sonra baş verən hadisələrə adekvat reaksiya verməməsi ilə bağlı sualını cavablandırmaqdan imtina edib. O deyib ki, Bakıya Erəmnistanda baş verən prosesləri şərh etmək üçün yox, Azərbaycanla bağlı danışıqlar aparmaq üçün gəlib: "Yalnız onu deyə bilərəm ki, AŞ PA bu yaxınlarda Azərbaycanda demokratik institutların fəaliyyəti ilə bağlı qətnamə qəbul edib. Həmin sənəddə Azərbaycanın ərazi bütövlüyü tanınıb. Avropa Şurası Azərbaycanın ərazi bütövlüyünü dəstəkləyir". Artıq dünəndən AŞ PA prezidenti Bakıda görüşlərə başlayıb. İlk görüşlər Milli Məclisdə keçirilib. L.M.Puç əvvəlcə Milli Məclisdə Azərbaycanın AŞ PA-dakı nümayəndə heyətinün üzvləri ilə görüşüb. Qonaqları salamlayan nümayəndə heyətinin rəhbəri Səməd Seyidov bildirib ki, Azərbaycan 2001-ci ildən Avropa Şurasının tamhüquqlu üzvüdür. Azərbaycan nümayəndə heyəti AŞ PA-nın toplantılarında fəal iştirak edir. S.Seyidov L.M.Puçun AŞ PA prezidenti kimi ilk səfərini Azərbaycana etməsini alqışlayıb. Nümayəndə heyətinin rəhbəri xatırladıb ki, L.M.Puçla münasibətləri o, hələ AŞ PA prezidenti seçilməmişdən əvvəl də mövcud olub. Həmin vaxt Azərbaycan nümayəndə heyəti ilə sıx əlaqələri olan L.M.Puç problemlərimizə də obyektivliklə yanaşıb. Nümayəndə heyətinin rəhbəri L.M.Puçun AŞ PA prezidenti kimi də bu mövqeyi davam etdirəcəyinə inandığını bildirib. S.Seyidov İspaniya vətəndaşı olan AŞ PA prezidentini İspaniya yığmasının Avropa çempionatındakı qələbəsi münasibəti ilə təbrik də edib. Təbrikə görə təşəkkürünü bildirən AŞ PA prezidenti qələbəyə görə çox sevindiyini bildirib. O qeyd edib ki, sevincli olmasının əsas səbəbi İspaniya yığmasının çempion olması deyil, qələbənin layiqli qazanılmasıdır. AŞ PA prezidenti bu vəzifədə ilk səfərini Cənubi Qafqaz ölkələrinə etməsindən şad olduğunu bildirib. "İnanıram ki, Bakıda keçirəcəyimiz görüşlər çox maraqlı alınacaq. Azərbaycan və Avropa Şurası birgə qəbul etdikləri yolu bundan sonra da birgə davam etdirəcəklər" - deyə L.M.Puç vurğulayıb. Öz növbəsində S.Seyidov Azərbaycanın Avropaya inteqrasiya, Avropa dəyərlərinə hörmətlə bağlı seçdiyi yolu bundan sonra da davam etdirəcəyini bildirib. Günün ikinci yarısında L.M.Puç Milli Məclisdə təmsil olunan siyasi partiyaların rəhbərləri ilə görüşüb. Qonağı salamlayan hakim Yeni Azərbaycan Partiyasının sədr müavini, millət vəkili Əli Əhmədov bu səfərin Avropa Şurası ilə Azərbaycan arasında əlaqələrin inkişafına xidmət etdiyini bildirib. Onun sözlərinə görə, Azərbaycan üzv olduğu bütün beynəlxalq təşkilatlarla səmərəli əməkdaşlıq edir və bu əməkdaşlığın faydasını yüksək qiymətləndirir: "Hesab edirik ki, bütün bunlar Azərbaycanın demokratiya yolunda inkişafına böyük kömək göstərir. Arzu edirik ki, bu əməkdaşlıq daha da səmərəli və faydalı olsun". Ermənistanın Azərbaycana qarşı təcavüzünə toxunan YAP-ın sədr müavini deyib ki, torpaqlarımızın 20 faizinin işğal olunması və bununla da resurslardan tam istifadə edilə bilməməsi ölkəmizin hərtərəfli inkişafına çətinlik törədir. "Bu münaqişənin həllində AŞ PA imkanı daxilində daha effektli kömək göstərməlidir. Azərbaycan qarşılaşdığı bu problemin həllində beynəlxalq qurumların daha qətiyyətli fəaliyyət göstərməsini tələb etmək haqqına malikdir. Məhz Azərbaycan ictimaiyyətinin beynəlxalq təşkilatlara münasibətində də bu məsələ əsas götürülür. İctimai rəydə belə bir fikir var ki, bəzi hallarda beynəlxalq qurumlar ikili standartlar deyilən ədalətsizliyə yol verirlər. Cənubi Qafqaz regionunda ədalətin bərqərar olunması üçün Ermənistanın Azərbaycana qarşı təcavüzünün aradan qaldırılması istiqamətində beynəlxalq qurumlar əməli tədbirlər görməlidir və bu prosesin həyata keçirilməsində dəyişikliyə ehtiyac var" - deyə Ə.Əhmədov vurğulayıb. Öz növbəsində AŞ PA-nın sədri L.M.Puç Azərbaycana səfər etməsindən məmnun olduğunu bildirib: "Azərbaycana səfərimin məqsədi problem axtarmaq deyil, demokratik inkişaf prosesi ilə bağlı dialoqu davam etdirmək və bu yolda daha da irəli getmək üçün yardım göstərməkdir. AŞ PA Azərbaycanda son illər həyata keçirilən demokratik islahatları dəstəkləyir. Həqiqətən ölkənizdə insan haqlarına riyaət olunur, hüquqi dövlət qurulur. Artıq bu istiqamətdə Azərbaycan yüksək nailiyyətlər qazanıb". O həmçinin deyib ki, Avropa Şurası Azərbaycanın ərazi bütövlüyünü dəstəkləyir. "Dağlıq Qarabağ Ermənistan tərəfindən işğal olunub. Amma buna baxmayaraq, Avropa Şurası Azərbaycanın ərazi bütövlüyünü dəstəkləyir, beynəlxalq sənədlərdə əksini tapmış sərhədlərini tanıyır. Bu fakt AŞ PA-nın yay sessiyasında qəbul olunmuş qətnamədə bir daha qeyd edilib. Bir həftə sonra Ermənistana səfərim zamanı da bu fikirləri orada səsləndirəcəyəm" - deyə AŞ PA sədri qeyd edib. Dünən qonağı Milli Məclisin sədri Oqtay Əsədov da qəbul edib. AŞ PA prezidenti görüşdə Azərbaycanda insan haqlarının qorunmasını yüksək qiymətləndirib. O, Azərbaycanla AŞ PA arasında əməkdaşlığın yüksək səviyyədə inkişaf etdiyini, Azərbaycan nümayəndə heyətinin qurumun sessiyalarına aktiv qatıldığını bildirib. Öz növbəsində Milli Məclisin sədri O.Əsədov L.M.Puçun Azərbaycana səfərini yüksək qiymətləndirib. Spiker AŞ PA prezidenti ilə Strasburqda və Sankt-Peterburqda keçirdiyi görüşlərin əhəmiyyətli olduğunu vurğulayıb: "Milli Məclis dünyanın müxtəlif beynəlxalq təşkilatları, o cümlədən Avropa Şurası ilə uğurlu əməkdaşlıq edir". Xatırladaq ki, AŞ PA prezidenti Bakıda vətəndaş cəmiyyəti təmsilçiləri, KİV və diplomatik korpusun nümayəndələri ilə də görüşlər keçirəcək. L.M.Puç səfər zamanı Azərbaycan prezidenti İlham Əliyev, baş nazir Artur Rasizadə və xarici işlər naziri Elmar Məmmədyarovla görüşməyi də planlaşdırır. İlham QULİYEV kaspi