Rəsul Rəzəvi aclıq aksiyasının 9-cu günündə...

SON XƏBƏRLƏR

Rəsul Rəzəvi aclıq aksiyasının 9-cu günündə...

2021.10.20, 07:36

Gunaz.tv

GünAz TV: Azərbaycanlı milli-mdəni fəal Rəsul Rəzəvi oktyabrın 4-də Təbriz zindanında yenidən aclıq aksiyasına başlayıb.

Oktyabrın 12-də aclıq aksiyası 9-cu günə daxil olan fəal başlatdığı aksiyanı hələ də davam etdirir.

ETTELAAT (İran Kəşfiyyat Nazirliyi) İdarəsinin onunla bağlı dosye təşkil etməsi və zindanda qeyri-insani davranışlar və işgəncələrə məruz qaldığına etiraz olaraq aclığa başlayan fəal, azadlığa buraxılanadək aksiyanı davam etdirəcəyini bildirib.

Bundan öncə R.Rəzəvi yaydığı Səs Faylında aclıq aksiyasına başladığını elan edib. “Azərbaycan millətinin hüquqlarının tapdalanması və fars irqçiliyinin kökü Pəhləvi dövrünün əvvələrinə söykənir, bu vəziyyət İslam Cümhuriyyəti dövründə də davam etdirilib və edir. Sistemin əsas məqsədi, İranda yaşayan qeyri-fars millətlərinin dil və mədəniyyətinin məhv edilməsi və fars dilinin onlara sırınmasıdır. Mən bu vəziyyətə etiraz edən bir şəxs kimi, 5 dəfə təhlükəsizlik qüvvələri tərəfindən yaxalanıb və oğurlanmışam. Saxlanıldığım müddətdə isə müxtəlif işgəncələr və təhqirlərə məruz qalmışam. 28 gün aclıq aksiyası keçirdikdən sonra Azərbaycan Milli Hərəkatı ağsaqqlarının müraciətindən sonra aksiyanı dayandırdım, lakin zülmkarların qeyri-insani rəftarları davam etdiyinə görə yenidən aclıq aksiyasına başlamağa qərar verdim, bundan başqa heç bir çıxış yolum yoxdur.”- deyə R.Rəzəvi yaydığı Səs Faylında bildirib.

Budan öncə R.Rəzəvi müxtəlif zindanlarda saxlanılan bir neçə digər məhbusla birlikdə tanınmış fəal Abbas Lisaniyə dəstək məqsədilə ötən may ayının 19-da aclıq aksiyasına başlamışdı. Lakin, o, Lisaninin sərbəst buraxılması ilə aclığa son qoymadı və başlatdığı aksiyanı davam etdirdi. O daha əvvəl şərti azadlıq qanununa şamil olan 6 ay həbs müddətinin təkrar icraya qoyulması və haqqında başladılmış əlavə bir məhkəmə prosesinin gedişatına etiraz bildirmək üçün aclıq aksiyasına başlamışdır. Fəal 28 gün aclıqdan sonra Azərbaycan Milli Hərəkatı ağsaqqlarının müraciətindən sonra aksiyanı dayandırmışdır.

Xatırladaq ki, Rəsul Rəzəvi ötən ilin noyabrında məlum "Fitilə" verilişinə qarşı keçirilən etiraz aksiyalarına qoşulması səbəbi ilə həbs edilib. Məhkəmənin qərarı ilə milli fəal Qüds günü aksiyalarında uyğur türklərinə edilən zorakılıqlarla bağlı Çin hökumətinə etiraz etdiyinə görə 1 il həbs cəzası almışdı.

Rəsul Rəzəvi bundan əvvəl də 2010-cu il aprelin 2-də Urmu gölünün qurumasına etiraz olaraq keçirilmiş aksiyada iştirak etdiyinə görə 2011-ci ilin oktyabrında işdən evə qayıdarkən saxlanılmışdı. 16 gün həbsdə saxlanılan milli fəal 30 milyon tümən qarşılığında Təbriz şəhərinin mərkəzi həbsxanasından müvəqqəti azadlığa buraxılmışdı.

N.S

GUNAZ.TV

SON XƏBƏRLƏR